Gálatas 2
2
Paulo Hiyrunu Pimrine Nuretkalune Piranapni
1Waneya quatorze mhale hiknohinixka, Jerusalém nyatnaka, Barnabé tshinkaluruyma. Hiyrun-koxa Tito tshinkaluru nanikatka.
2Wane nya klu tshinanu Hoyakalu hekhitno satu hiphujetlu wane nyiywakapa. Waneya wane nunkajyatkana kihle piranalu potuko hiwekkaklewatatshri pirana, honra nunkakletjetanru judeu mixkane yehiya. Seyni wanna kosekatshine tsonu nunkaka nkamrure nkamhakanatanru nma mahijeru kamrurewlexyawakanupa.
3Hi nimotsluko Tito tshinkaluruko jiprojhakjixikatshriwa klu tshinanu grego-nerni mjiprojhikatwa wale.
4Seyni satkaka yineru Cristo tshinanu moletkakatshine hixachatatshine hixa tskala yokanatka. Runna potshkeruneko retapyawakapluna wmimalexikotu pirana Cristo Jesus-ya rumukata himaletlexyawakapwuna.
5Seyni hi pchinhohnejiji witshitna rimalexyawakwuna. Wan-rixa rumukata hwalhohnekanaxyawakapa halikaka pirana, kihle piranalu potuko hiwekkaklewatatshri pirana hixa tskalaya.
6Wanna kosekatshine kahwakkalune wane ntshina klu tshinanu hitaya hi hijhakalurni klu hixatshinekta hixakanata, Hoyakalu honra hi kahwakpiratlu yineru hixahoxyawaka. Wane ntshina hiyrunukotnaka wanna kosekatshine, hapatjehchinikanutatshine hike hchinikanu reneknona.
7Seyni rexinixkaluna hita renejikowaka hinkaklewlu kihle piranalu potuko hiwekkaklewatatshri pirana, judeu mixkane tshinanupa, Pedro renejikowaka pixka kihle piranalu potuko hiwekkaklewatatshri pirana hinkaklexikolu judeu-ne tshinanu pixka.
8Klu tshinanu Pedro mixkotjeru judeu-ne tshinanu hnurexikolu, hit-koxa renekkatka xye towuwlu judeu mixkane tshinanu.
9Wale tshinanu Tiago, Pedro, João tshinkalune kosekatshine kahwakkalune, rimathexinrina xye nenejikolu nenekka Hoyakaluya. Rekhitwuna pa hchinikanurune rixyawakatkana hita hiyrunu Barnabé tshinkaluruyma. Rukchikhihlenutluna malixkane judeu mixkane yehi nunkaklewaxyawakapa hita, waneya judeu-ne yehi runkaklewaxyawakapna wanna.
10Xye tsonu ranjitwuna wuchinijyawakapna hike mwikane. Xye koxa hikeklu nuchotlu wane nixyawaka.
Paulo Hijrexyawaklu Pedro Piranapni
11Pedro Antioquia hyinixka, nujretlu ptowruneka hetanu klu tshinanu hpupjepotuta Pedro.
12Klu tshinanu Tiago yokanrene jejine mapokkanuklunuwa, Pedro judeu mixkaneyma nikjeta. Seyni rapojinixkana jejine Pedro kotspalaxnawa judeu mixkane yehiya klu tshinanu jiprojhikatshinwani wanna hiyáhoni hpikna.
13Waleyma koxa wan-rixjetna pimrine judeu-ne. Haté Barnabé koxa pupjeta wanna hixachle tshinanu.
14Waneya nexinixkana hi romkahitluna kihle piranalu potuko hiwekkaklewatatshri pirana, wane ntshinru Pedro, ptowru yineru hetanu. “Pixa judeu-nerúkoyi judeu mixkane hixannu pixka pixini, seyni judeu-ne hixannu pixka pma mixkanuklunu, haklu tshinanhe judeu mixkane, judeu hixannu pkamhakakjeta?”
Pixkakaklu Rixa Powratkota Judeu-ne Tshinanu Hiyrunu Judeu Mixkane Tshinanu Piranapni
15Hixa judeu-nwu wimatutanruni. Hi hektune, judeu mixkane pixka hixatshinwu.
16Wimatlu Moisés yonreru pirana homkahixikolu hi powratlu yineru. Seyni Jesus Cristo halixikolu powratlewata halikaka. Hix-koxa Jesus Cristo walixa, wpowratka Cristo halixikolu tshinanu, hi Moisés yonreru homkahixikolu tshinanni. Klu tshinanu hi satuknako yineru powratko Moisés yonreru pirana homkahixikolu tshinanu.
17Seyni hixa judeu-nwu wpowraxikowaka hijhatshinwu Cristo-yma, hektune judeu mixkane pixka wixka, hkahwakhe Cristo hektuwakjixwu? Hikeklu!
18Klu tshinanu nyinuwaka kamhalexinixnaklu nnikatanrukakatka nekhixnawa pupjetatshrino hita.
19Klu tshinanu hita, Moisés yonreru tshinanu nupnatka. Hipnatshritkano Moisés yonreruya, Hoyakalu tshinanu niwejinripa. Cristo-yma nupnatka cruz-ya.
20Seyni niweka wanepnawaka. Seyni halikaka hiwekatshri hi hitni seyni Cristo, hita nanwaka hiwejikatshrini. Xawakni xye niwekle Hoyakalu whene halixikolu tshinanu niweka. Walekni namotjeru hiyrunu renejnawana hita tshinanu.
21Hi nmahijerkaklu Hoyakalu henekachale. Klu tshinanu Moisés yonreru pirana poyaho powratletkamkalu yineru, waneyakmakni Cristo mahijeru hipnaletanutka.
Currently Selected:
Gálatas 2: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
