Efésios 3
3
Paulo Kamrure Piranapni Judeu Mixkane Tskalaya
1Xye hikolukle tshinanu, hita Paulo-no, preso hajerno Jesus Cristo hitshre tshinanu. Hixa judeu mixkanhi nepixyawakapa.
2Hix-hetko jempiranyehitlu Hoyakalu henejya tshinanno xye kamrurtshi renekno hixa tshinanupa.
3Hoyakalu hekhitno hkamhanrupa pirana yohimakanatkaluru. Wale pirana rimatjemkakno. Xye pirana mitshikananu nyonata psotsonu tokantshi hixa tshinanupa.
4Wale het-yonhaxini himatjemanru Cristo pirana yohimakanatkaluru nimatleru.
5Mitshikananu xye yohimakanatkaluru pirana hi renekna rimaxyawakna yine wale pirana, xawakni pixka. Seyni xawakni Hoyakalu hekhitna nuretkalune wale tokantshi hiphujetatshine hiyrun-koxa nuretkalune htokanu hinkakletatshine rekhita, Hoyakalu Hiwejikaluruya.
6Xyekni tokantshi yohimakanatkaluru. Kihle piranalu potuko hiwekkaklewatatshri pirana tshinanu, judeu mixkane kwawaklena judeu-neruneyma Hoyakalu henekanwu kihler-pirana. Judeu mixkane Jesus mane psojitnina judeu-neruneyma. Hiyrun-koxa Hoyakalu judeu-nerune runkaklexinri judeu-nerune mixkanen-koxatkani Jesus Cristo tshinanuya.
7Hoyakalu, hixa ruchinijyawaka tshinanu, rutakno Cristo pirana, hiwekkaklewatatshri pirana, jinkakletakleru nixyawaka, Hoyakalu tsru pixkonu rixle tshinanu.
8Hita mpomujhakotpotno ptowruneka Hoyakalu hayineteneya. Wanepnawaka Hoyakalu henekno xye poyikowlu judeu mixkane nunkajyawaklu kihler-pirana potuko, tsru pohirewnalu honra Cristo henekwu.
9Hiyrun-koxa renekno nimatjemkajyawakna ptowru neruka hanu potu rixa yohimakanatatshri pirana, Hoyakalu hixa hichinikanretlexyawakna pirana. Klu tshinanu Hoyakalu ptowru potuko hiyakotatshri ptowru papkokananuko mitshikananu hi ruphujetakanatlu xye pirana yohimakanatkaluru.
10Hiyáhoni xawakni Cristo halixatshine hapatjetatshine tshinanu tsrukakalune hiyrun-koxa tsru hitakkalune malehohnewaka hwatshine rimathetanruna ptowruka hixatshri Hoyakalu himatkalewle.
11Ruchinikanrexyawak-potuko rixa kamhaletlu Hoyakalu honra mitshikawako raluka kamhalexyawaka hnikata kamhaletlu rixa hichinikanretlexyawaka rixa yokanretlu Wutsrukate Jesus Cristo-ya.
12Jesus Cristo wmunanhal-tshinanu hi wpika. Hiyahokni kihlehchinikanwu hiyrunu kihle hapoklepwu Hoyakalu nwaka Jesus Cristo walixyawaka tshinanu.
13Wale tshinanu nanjithi hi hihrokanu hixa tshinanu nsalewniywaka. Klu tshinanu waleni hixa hepixjeru.
14Wale tshinanu nyoptsojityehitlu Wuru Hoyakalu nanjihohnexyawaka.
15Ptowru nerukananuko tenhohne hwatshine xkehkaka Hoyakalu hiwaka renekkana hiyrun-koxa yine tshiji hwatshine xkehkaka renekka.
16Nanjitlu Hoyakalu repixyawakapna yine rimwaleru tsrur-potuko tshinanu, renejyawakhi, hixa nanwaka hmixkowaxinripa, pixkontshi Hoyakalu Hiwejikaluru tshinanu.
17Nanjitkoxlu hixa halixle tshinanu, Cristo himukata hwahajretanhi. Hiyrun-koxa nanjitlu ruchiniklewle hmixkoxyawakaphi hiyrun-koxa hpoyehiwkajyawakaphi,
18wan-hixatshinekni himukata himatjemlepotutlu ptowruka Hoyakalu homkahitatshineyma Cristo hichiniklewle. Himaxyawakaplu htsernu, rowuknu, htennu hiyrunu hi pchini hitokotlu htennu Cristo hichinijyawakwu.
19Hiyáhoni nanjitlu himaxyawaklu Cristo hichiniklewle, hixa wihchinikanu pnuterut-potni wale, Hoyakalu himukata tsepotlexyawakaplu hiwejikaluru wiwekleya psol-potuko.
20Hiyáhoni xawakni rimalwutko Hoyakalu, hpixkonu tshinanu, wmixkotjeru wiwejinriya, rumukata kamhaletanru pnut-potu wanjixyalu ho wuchinikanretleru.
21Himalwutkalurupni Hoyakalu, Cristo halixatshine hapatjetatshineya Cristo Jesus tshinanu ptowru papkoko mnikawnakatupni. Seyoka.
Currently Selected:
Efésios 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
