Colossenses 4
4
1Hixa ktowutaklerunhi hihle hetletanna hkamrurewkakjetanune hiyrunu htshinyawak-potuko hixanna. Himatanu hix-koxa tenhohne rawyahi htowutjeru Wutsrukate Cristo.
Hiykolukaka Piranapni
2Hi hituk-hanjihohneretanu. Hi himnanhanu hanjihohnereya. Hoyakalu hpoyahnutanu.
3Hanjihohnexini hix-koxa hanjihohneyehitanu, Hoyakalu himukata hikchika yapawaklexyawakapwu wunkaklexyawakaplu Cristo pirana mpohitakanatkotu pirana. Cristo pirana npohitle tshinanu kapna nutakka.
4Hanjihohneyehitanno phujetanuwaka potuko ntshina hinkakletlexyawakaplu hiwekkaklewatatshri pirana rixpiranaxyawak-potuko.
5Himatkalnuyma hiwekanu malixkane hetanuya. Hiwekka pchinika hi hetachaxinwa.
6Htokanu ptowru hohneruka kihleru tokantshi hyanumaxini, chinikantshi hepixatshri tokantshiko, himat-hihixyawakapna hepomhakjene ptowruneka.
Tíquico Hiyrunu Onésimo Tshinkalune Hyokananwakaxyawakna Paulo Piranapni
7Wuchinikanru Cristo tshinanu wmoletanru Tíquico tshinkaluru, kamrurewatatshri halikak-potuko, wimotslu Tsru Hixikatshriwa Cristo kamrure tshinanu, hinkakanhi hita nopirana psoluka.
8Wale tshinanukni wale nyokananwakathi hixa himatpiranyehixyawakapwu, hixa hapnanuhchinikanuxyawakapa.
Haliklewlu Piranapni
9Waleymalu Onésimo tshinkaluru, Cristo tshinanu wmoletanru, wuchinikanru potuko poyehi halixleru, hix-yehi hichpajikatshrini. Wanna hinkakanhi ptowruka hewi hajeru pirana.
10Aristarco tshinkaluru hitayma preso hwa ralikanwakathi. Hiyrun-koxa Marcos tshinkaluru Barnabé tshinkaluru palikleru halikhi. Marcos pirana mitshi nunkakatkahi hanu potu hixanru. Wale yanwakaxiniphi kihle hixa yoptoletanru.
11Josué koxa Potukalu tshinkaluru halikanwakathi. Nyi mapa jejine tsonu judeu-ne halixatshine pejnu nikamrurewatjene Hoyakalu pohirewaxyawaka tshinanu. Nyi hepixpotutatkano.
12Epafras, satutnaka hix-yehi hichpajikatshritka, Cristo towreru halikhi. Hi rutuk-hanjihohneyehrethi seyni ranjijetlu Hoyakalu hpoyehiwa halixlekakanhi, tsrune rixkakanhi halixlewluya, psoluka Hoyakalu halukanru hixa tshinanu.
13Klu tshinanu hitni hapak-hetatshrino repixlewaxinri hixa repixyawaka tshinanu hiyrun-koxa Laodiceia hajene hiyrunu Hierápolis hajene tshinanu.
14Lucas tshinkaluru halikanwakathi. Wale honra kpinrewakleru wuchinikanru potuko. Hiyrunu Demas tshinkaluru halikanwakathi.
15Walikanwakatna Cristo tshinanu wmoletanune Laodiceia poktshi hajene hiyrunu Ninfa tshinkaluro, hiyrunu Cristo halixatshine hapatjetatshine walapji hapatjexikatshine.
16Hixa hali hethalexinro twu yonawahlo waneya Cristo halixatshine hapatjetatshine Laodiceia poktshi hajene hethakjixanro yonawahlo. Yonawahlo Laodiceia hajene tshinanu nyokanrero, hix-koxa het-yonhatanro xako.
17Hiyrun-koxa wla htshinanru Arquipo tshinkaluru: Pujha kamhalpotutanru kamrurtshi penejikolu Tsru Hixikatshriwa Cristo kamrureya, ppoyahokajyawakaplu.
Haliklu Hmahleta
18Hitni Paulo-no halikhi. Hitako yonatlo twu. Hi hamtakanno hostutkalurutkano. Nanjitlu Hoyakalu, Hoyakalu hihlenu henekachaleymapyi.
Currently Selected:
Colossenses 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
