2 Coríntios 6
6
1Hiyáhoni hixa rikamrurewatanunwu hanjithi Hoyakalu kamrureya: Hi himnanhinri Hoyakalu hihlenu wale honukla renekatkahi Hoyakalu.
2“Hyijnakotanru Hoyakalu tshinyawaka: Hijhiniklunru hohneno nyijnakothi, Nepixatkahi hiwekkajikolu hohne tshinanuya.” Hyijnakotanu. Xawakni halikaka hipapkolutkani hyoptoxikowaka Hoyakalu hepixle. Xawakni potuko hihohnerutkani hiwekkajikowaka hixa.
3Hi waluklu satu yineru het-himtuknuxyawaklu wkamrure hma mukolukanuwniywakanupa wkamrure tshinanu.
4Seyni ptowru piranako wekhithi Hoyakalu kamrurewyehitatshinwu wixyawaka. Hi wkaheknanuwata wsalewnini, wmahaxinri tshinanuya hiyrun-koxa wkojwawninri tshinanuya.
5Wuylakjetka, kapna wyochmakjetka, sejirtshiyma wsaletjetka. Wkamrurewpotjeta, mamkanwu, wnatshita.
6Wuphujetlu Hoyakalu kamrurewyehitatshinwu wixyawaka. Wpotuknu tshinanuya, wimatkalnu tshinanuya, wsalewaklu wakotle tshinanu hiyrun-koxa wuhlenuhchinikanu tshinanu. Hoyakalu Hiwejikaluru hoho wyapa hiyrun-koxa hichiniklewlu halikakalutu potuko tshinanu wane wixa.
7Hinkaklu halikaka tokantshirutu, Hoyakalu pixkonuya, winotjerni potuknutshi hchinikanu wkamnitjene ptowru sretako hichpajikatshine tshinanu, wpotukle sreta, pa sta sreta koxa.
8Kihle piranyehirunwu hiyrun-koxa hektu pirana yehirunwu. Kihle piranalu wtshinanwakatka, weyikka koxa. Halikaka pirana hinkakletatshinwu seyni kayloklerune wkahwakka.
9Mimatletkone pixkalunwu hiyrun-koxa himatletkalune pixkalun-potwu. Hipnatshine pixkalunwu seyni hetwu hiwekatshinewawu haté xawakni. Hapnokatkalunwu seyni hi wuylatka.
10Wamonuwnatshine hikahwakkalunwu seyni hi wutuk-poyikowleta. Hike mwikane pixkalunwu seyni hixolune yine wpohirewnakaka. Hatatjewa mejnunkatenwu seyni halikaka ptowru potuko wimwa.
11Wuchinikanune wimatletanune Corinto poktshi hajene, wunkakpotuthi hixa, wuchinikpotuthi.
12Hi hkahwakanu wma muchinijyawakanhi seyni hix-hetko halikaka hi hichinikjetwu hixa.
13Nowhenene pixka nixa yanumsayehrethi. Wuchinijyawakhi pixka hixa hichinikletanwu hixa.
Malixkane Wma Miyanyawakanupa Piranapni
14Hi malixkaneyma hyananu. Hanhe xawaka rumukata pixkakaklu hixleta halikakalutu pirana weyawluyma? Hanhe xawaka rumukata pixkakaklu hixleta katalu, mapchahaluyma?
15Hiyrun-koxa hanhe xawaka rumukata Cristo-yma pa hchinikanurutu rixyawaka kamtshi? Hanhe xawaka rumukata pixkakaklu hixleta Cristo halixatshri malixkatuyma?
16Hanhe xawaka rumukata pixkakaklu hixleta Hoyakalupji mayawletshichayma malixkane munanhaleru? Klu tshinanu hixakni Hoyakalu Hiwejikalurupjiwu. Klu tshinanu Hoyakalu potuko hali wan-tshinretatka:
“Wanna hitokote nwanu, wanna nyanini.
Royakalutepnona.
Wannapni nayinetene.”
17Tsru Hixikatshriwa Hoyakalu wan-tshina hiyrunukotnaka:
“Hiyáhoni wanna yehi hichpajini
Wanna yehi hkotspalaxinwa.
Kaptsholu, himtuklewatatshri hi hyotnekanu.
Wan-hixatshri kihle yoptole nixanu.
18Hirpakno hita,
hixpakni nowhenene hiyrun-koxa nwuheneronephi —
wane htshina Tsru Hixikatshriwa Hoyakalu ptowru potuko himukatatshri.”
Currently Selected:
2 Coríntios 6: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
