2 Coríntios 11
11
Paulo Hiyrun-koxa Mnuretkone Minje Piranapni
1Nalukmaklu hakotachaxyawakno pchini tsonu mchinikanutu pixka nixyawaka. Halikaka xako hakotachatanu hitayma.
2Klu tshinanu nhokothi. Hoyakalu henekno nhokoxyawakaphi. Klu tshinanu hixa hatatjewa makloji hike myanwakatanutowa hike mixkotowa pixka hixatshinhi. Nunkaklexyahi satupka hhanuruxyawakapa walekni Cristo.
3Seyni npiklu himnu yokwijexyawakanro Eva-ni kihlewaka htshinreyma pixka hixikowaka, waneko pixka hixa himtuklehchinikanutkonmaka hixapni. Wan-hixkanmaka hiknoklewatanuna hihchinikanu halikakalutu, potukalu Cristo hichpajikatshri chinikantshi.
4Klu tshinanu hixa kihle yoptole hixinri poyikowluyma hanu hixatshriktako satu yineruko Jesus pirana hinkakletatshri, hi Jesus piran-potuko wunkakletleru pirana munkakletkatuko. Hiyrun-koxa hyoptoxiniplu satuko hiwejikaluru, hiyrun-koxa satuko hiwekkaklewatatshri pirana pnuko hixatshri hi Hoyakalu Hiwejikalurni, hiyrun-koxa hi Cristo pirana, kihle piranalu potuko hiwekkaklewatatshri pirana wunkajyatkahi walekni halixpiranatanrutka.
5Klu tshinanu hi nkahwajnawa wanna nuretkalune yokanatkalune tshinikatshinwa kayahoko hitakkalurno nixyawaka.
6Himka nimat-hinkaklewpotuta wanna pixka seyni hi hapkatatatshrino rimatkalnuyna. Ptowru hohneruka ptowru potuko wuphujexnawa hix-yehiya ptowru pirana tshinanuya.
7Kihle piranalu potuko hiwekkaklewatatshri pirana, Hoyakalu pirana nunkajinixkahi, hi nujhawenrutlu. Nmasaxnawa hixa tsrun-potu hixyawakapa. Hixlahe kahwaklu numtukhi wane nixyawaka tshinanu?
8Hix-yehi nkamrurewakanaxika pchinika pimrine Cristo halixatshine hapatjetatshin-yehkaka hepixjekanatno tiyiroya. Hatatjewa pimrine nkontiyirotekanata hixa nepixyawakapa.
9Hiyrun-koxa hix-yehi nwaka pchinika, tiyiro nmahaxinri tshinanu hi nkojwakna wane hajene. Halikaka Cristo tshinanu wmoletanune Macedônia tshijne hichpajikatshine henekno ptowru nmahakanaxinri. Waneklu ptowru nmahakanaxinri tshinanu hi nkojwakatkahi hiyrun-koxa xye pnut-hohnepatka hi nkojwakanhi nmahaxinri tshinanu.
10Cristo pirana halikakalutu nimwaleru tshinanu wane ntshina hinkaklethi. Hike yineru konanno xye npoyikowle Cristo pirana nunkaklexyawaka mujhawenutkatno ptowru Acaia tshijneya.
11Kluneru tshinanhe wane ntshina? Hixlahe kahwakno nma muchinijyawakanhi? Hoyakalu himatlu nuchinikhi.
12Nasruha hixlexyawaka nixanu nimalexyawakapna nuretkalune yokanatkalune tshinikatshinwa hma tserutpiranyehixnawakanupwana wane hma tshinyawakanupna Paulo-ne pixka wixa kamrureta.
13Wanna jejine nuretkalune yokanatkalune minjenni hixachatatshinni. Hi halikakalunni. Hkamrurna pirana weyatatshinni hiyrun-koxa Cristo nuretanune yokanatkalune hixachatatshine rixnawana.
14Hiyrun-koxa hi wimyekanu, Satanás honra hiwejikaluru Hoyakalu towreru tenhohne hajeru hatawnatshri kohetkowakhatshri.
15Hiyáhoni hi koxa kyapreru Satanás towrene, kihleru kamhatshine rixnawakwana. Hmahlepa hyoptotanruna rujhalerna.
Paulo Salewnale Piranapni
16Wane ntshinanutnaka: Hike kahwakanno mahchinikanutu nixyawaka. Seyni wan-hikahwajinipno mahchinikanutu pixka hixa yoptoletanno waneya numukata tokanuwnaleta.
17Halikaka wla ntshinyawaka hi Wutsrukate Jesus Cristo towuxyano. Seyni tokanuwnalu nyanumaxinri pirana mahchinikanutu pixka ntshinya.
18Hi heppiklu tokantshi xye tshijne hixjexyawaka pirana. Hiyáhoni hit-koxa tokanuwna.
19Hixa jimatkalerunekhi hakotachatna mahchinikanune.
20Hix-hetko hikchikhihlenutlu satu yineru towutachaxyawakhi ho hkonhejnunkatechaxyawakhi ho hyokwijexyawakhi ho hi hkahwakpiratanhi ho rumpakhojixyawakaphi.
21Npatewa hiphujetlepiranatlu klu tshinanu hi tsru hchinikanwu wanna pixka wixyawaka. Seyni satu yineru klu pirana tshinanuktako htokanuwnini, hit-koxa tokanuwnanu. Mahchinikanutu pixka ntshina yanumsaletanu.
22Hebreu-nerunrahhe? Hit-koxa hebreu-nerno. Israel-nerunrahhe? Hit-koxa israel-nerno. Abraão klopichanrahhe? Hit-koxa Abraão klopichno.
23Cristo-yma kamrurewatatshinrahhe? Seyni hit-potu kamrurewatatshrino Cristo-yma. Hatatjewa mahchinikanutno wane ntshinyawaka. Klu tshinanu wanna yohnik-kamrurewle nixa. Hiyrun-koxa wanna yohnik-kata kapna nyochmakka. Hixo kat-koxa wanna pnute nuylakka hiyrun-koxa hixo kata psokaklu nupniywaka.
24Cinco kata judeu-ne kotshipjetno trinta e nove kotshipjeru rixnona.
25Map-kata romano-ne hiylakno hahajeya hiyrun-koxa pa kata nsotlujetka. Map-kata nupkata. Pa yetshno, pa hohne honha nwa mar powhaya.
26Hixo kata yanru nkamha. Honha nyapini honha hamlenu neta. Hiyrun-koxa katshowhurune hamlenu neta, nonerune judeu-ne yowiknuya hiyrun-koxa judeu mixkane yowiknuya. Tsru poktshi hixowaka yowiknu, kahnete poktshikaka yowiknu, mar powha yowiknu, himatletkalune hixachatatshine yowiknuy-koxa.
27Tsru kamrurtshi potu neta hiyrun-koxa hamanru tsru potuko neta. Hixo kata hi numka, nnatshita, ntshiklehowata, nmahamkata.
28Hiyrun-koxa xyekaka pnute ptowru hohneruka nuchinikanretler-potni ptowruneka Cristo halixatshine hapatjetatshin-yehkaka ninotlene tshinanu.
29Kathe yijnak-hihrokleta? Hit-koxa yijnak-hihrokleta. Satu yineru himtuwnini hi he nwamonuwnahchinikanuta?
30Numukata tokanuwnalexini, nuhrokle pirana hiphujetatshri tshinanu halikaka ntokanuwnanu.
31Wutsrukate Jesus Cristo Hoyakalute ptowru hohneruka himalwutkaluru hikeklu hohne mnikawnakatupa himatlu hi nweyawata.
32Damasco poktshi nwakanaxini, wale tshijne yokanatatshri, phuru Aretas tshinkaluru hitakleru, tsru poktshi hiphaptotkaka rinotjixna soldado-ne hkachixyawakamkapnona.
33Seyni nimatletlene pantshi hiphaptoteswa tshiji rutajyanona chiwatuya. Cerca tenolu sotlu kamhikolu malekate nutakka. Hiyáhoni wane nixa hasuklexyatkana.
Currently Selected:
2 Coríntios 11: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
