1 Tessalonicenses 1
1
Hichiniklewlu
1Hita, Paulo-no, Silas tshinkaluruyma hiyrunu Timóteo tshinkaluruyma wyonatlo twu yonawahlo hixa Cristo halixatshine hapatjetatshinhi tshinanupa Tessalônica poktshi hajenhi. Hixa Hoyakalu Hirtshinunhi hiyrunu Tsru Hixikatshriwa Jesus Cristo-nunhi. Hoyakalu henekachale hihlenu yoptotatshinephi, kihlehchinikanurunephi Wuru Hoyakaluya hiyrunu Wutsrukate Jesus Cristo tshinanuya.
Tessalônica Poktshi Hajene Halixle Hiyrunu Riwejinrina Piranapni
2Hoyakalu wimalwuhohnejeta hixa ptowrunekhi tshinanu. Wuchinikhohnejethi wanjihohnereya.
3Hi wutuk-hichinikletlu hixa kamrure hixa halixle tshinanu hiyrunu Cristo hichinijyawaka tshinanu hkamrurewpotuxyawakatka hiyrunu wuchinikjetlu hanu hixa kahwakleta mchiretanutu Wutsrukate Jesus Cristo-ya Wuru Hoyakalu hetanuya.
4Wimatlu Cristo tshinanu wmoletanune Hoyakalu hichinikanunhi, hixa hnureta walenuko hixyawakapa.
5Kihle piranalu potuko hiwekkaklewatatshri pirana wunkakletanru pirana, hi tokantshichani seyni tsru pixkontshiyma, Hoyakalu Hiwejikaluruyma hix-yehi rapokpiranatatka. Wekhithi wunkakle halikak-potuko pirana rixyawaka. Hixa himatlu hanu wixa hiwekletatka hix-yehiya, hixa hepixikolu tshinanupa.
6Waneya hixa wixannu homkahitatshinetkahi mitshi hiyrunu Tsru Hixikatshriwa Cristo hixannu homkahitatshinhi mitshi. Tsru salewaktshiyma hyoptotlu Hoyakalu tokanu tsru himuwleyma Hoyakalu Hiwejikaluruya.
7Hixa hekhitatkana ptowruneka Cristo halixatshine Macedônia tshijne hajene hiyrunu Grécia hajene hixa pixka rixyawakapna.
8Klu tshinanu hix-yehi hpohitamxika Wutsrukate Cristo pirana hi Macedônia tshijne hiyrunu Grécia tshijne tsonupka seyni ptowruchaka rapokpiranata hixa Hoyakalu halixyawaka pirana hiyáhoni hi hmahata pa pirana wunkaklexyawaka wannaya.
9Nyi yine ptowruneka hinkakletlu hix-yehi wwakanaxinri pirana. Kihle yoptole wixikowaka pirana hiyrun-koxa mayawletshichakaka hichoxyawaka pirana, Hoyakalu potu halikakalutu, hiwekatshriko, homkahixyawaka pirana runkakjetna.
10Jesus, Hoyakalu whene, hipuktshi riwekkajikatka Hoyakaluya, tshiji rapokanutnaka tenhohne ruchpajini hkahwakachale pirana, kpohitka, Jesus honra wkochpakjeru wapnokaxikolu hinatshripa yehiya.
Currently Selected:
1 Tessalonicenses 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
