1 Coríntios 12
12
Satkaka Halixatshine Renekachata Hoyakalu Hiwejikaluru Piranapni
1Cristo tshinanu nmoletanune, naluklu hixa himatjemyawaklu Hoyakalu Hiwejikaluru henekachalkaka piran-potu.
2Hixa himatlu, malixkane hixakanaxiniwa mayawletshichakaka mimat-yanumatkatu homkahjekanatatshinhi. Waneklu papko weyawlu homkahjekanatawa.
3Hiyáhoni himatjemanru xye pirana, hike yineru htowuta Hoyakalu Hiwejikaluru wla htshinyawaka — “Hamhatshripni Jesus.” — Hiyrun-koxa hike yineru himukata wla tshinreta: —“Jesus-ni Nutsrukate” — Hoyakalu Hiwejikaluru masrukkanuklunru hi rumukata wan-tshinreta.
4Kakojru Hoyakalu Hiwejikaluru henekachale seyni Hoyakalu Hiwejikaluru henekachalewatatshri satupkalu.
5Kakojru Hoyakalu kamrure seyni Tsru Hixikatshriwa Hoyakalu wtowutjeru satupkalu.
6Himatkaltshi koxa kakoje seyni walerutni Hoyakalu himatkalnutshi heneklewatatshri Hoyakalu kamrure hkamhiywakapa satkaka.
7Hoyakalu ptowru yineru repixyawaka tshinanu satkaka yineru reneklu hiphujewnakaklewatatshri pirana rimathexikowaka Hoyakalu Hiwejikaluru hixayma.
8Wan-rixa. Satu yineru renek-himatkalnuta Hiwejikaluru potukalu Hoyakalu pirana runkaklexyawaka. Waneya walekotnaka satu yineru henek-himatkalnuta Hoyakalu pirana rimatjemyawakapa.
9Walerutu Hiwejikaluru satu yineru reneka halixleta. Satuko yinerutnaka pixkontshi renekka yeyixlu rutskalajyawakapa.
10Satuko yineru yoptotlu Hiwejikaluru potukalu pixkonu himyekaklewatatshri hkamhiywaka seyni satuko yineru renekka himatkalnutshi Hoyakalu pirana runkaklexyawaka. Satuko renekka himatkalnutshi rimathexyawakaplu pixkontshi renekachaxikolu Hoyakalu henejyalu ho satuko pixkontshi pnuko hichpajikatshri rimatheta. Satuko renekka pa nrukaka hyanumaxyawaka. Seyni satuko renekka pa nrukaka hyokajinripa.
11Xyekaka ptowru potuko hkamha walerutu satupkalutu Hiwejikaluru. Satkaka reneka himatkalnuta waleko raluk-heneklexyalu pejnu.
Hi Heppika Psojitlu Cristo Mane Satupkalutu
12Klu tshinanu Cristo mane satupkalutu híxolu wale psojitenkaka. Hiyrun-koxa nyi Cristo mane psojite pixkalune, hixolune pa manepkana.
13Hiyrun-koxa hixa ptowrunekwu ho judeu-nerunwu ho judeu mixkane ho hixa towretshinwu ho hixa hichpakatshinwu, wutakka hixa ptowrunekwu pa manepka wixikowaka walerutu Hiwejikaluruya. Hiyrun-koxa wutka hixa ptowrunekwu satupkalutu Hiwejikaluruya.
14Klu tshinanu mantshi hi satupka rixka seyni hixo psojitlu mantshi.
15Jixtshi wla tshinini — “Myotshi nmixkanu tshinanu hi mantshi psojitno.” — Seyni hi wale tshinanni hi mantshi psojite hma mixyawakanutkani.
16Jeptshi wla tshinini — “Yhaltshi nmixkanu tshinanu, hi mantshi hajerno.” — Seyni hi wale tshinanni hi mantshi psojite hma mixyawakanutkani.
17Mantshi psoluka yhaltshi tsonu rixkamka, hanhe xawaka rixa jemletanu? Ha psoluka hijnako tsonu rixkamka hanhe xawaka rixa hamluretanu mantshi?
18Hiyáhoni xawakni Hoyakalu kamhalu mantshi psojitkaka kakojeru raluyjawak-potuko rixlu.
19Himane psojitkaka mwaknumka, hi mantshini.
20Hiyáhoni mantshi psojitkaka híxolu seyni pa manepka ruchpajya.
21Hiyáhoni yhaltshi hi rumukata wan-tshinretlu: “Myotshi, hi hijhakaluryi.” Jiwtshi koxa hi himukata wan-tshinretlu: “Jixtshi hi hijhakaluryi.”
22Seyni halikaka mantshi psojite mixahotkotu hijhakalurni mantshi psoluk-tshinanu.
23Hiyrun-koxa mantshi psojite mkahwakpirpotutkotu walekni wuslahpotutanu. Walekaka hipatewluru walekni winotpotutanhonuka.
24Wimane psojitkaka kihle hixahotkaluru hi rujhalu hislahikowaka. Hoyakalu wan-rixa kamhaletlu mantshi. Mantshi psoji mahaxikatshri hijhapotutlu repixikolu.
25Wan-hixatshri hi hkamnikakna wimane psojitkaka seyni wannakakluko psojitkaka hepixkaka.
26Satupka wimane psojite salewninipa, ptowruko wimane psojitkaka waleyma salewnanu. Satu wimane psojite himalwutkoklunu ptowruko wimane psojitkaka waleyma rumuwatatkana.
27Hiyáhoni hixa ptowrunekhi Cristo manenhi. Hiyrun-koxa hix-satkakhi wale mane psojithi.
28Wale tshinanu Hoyakalu satkaka himukatatshinhi rutaka Cristo halixatshine hapatjetatshineya. Mitshikananhapka nuretkalune rutaka. Waneya wane pnute Hoyakalu tokanu hinkakletatshine rutaka. Wane pnutetnaka halixatshine hapatjetatshine hasrukatshine rutaka. Waneya wane pnute koxa halixatshine hapatjetatshine hepixatshine kakojerune rutaka. Wannani hiyákolu kamhatshine, yeyixlu hitskalaklewaxikatshine, kosekatshine, kakojeru nrutshi himat-yanumaxikatshine, hapkata hitakletkalunetkani wanna.
29Ptowruneklahe nuretkalune? Ptowruneklahe Hoyakalu tokanu hinkakletatshine? Ptowruneklahe halixatshine hapatjetatshine hasrukatshine? Ptowruneklahe himyekkaklu kamhatshine?
30Ptowruneklahe renekka yeyixlu rutskalajyawakna? Ptowruneklahe pa nrukaka himat-yanumaxya? Ptowruneklahe pa nrukaka himat-yokakatshri? Hike.
31Seyni jmerpotuphi hijhakalur-potni Hoyakalu henekachalkakaya. Seyni satu chinikantshi ptowru potuko kihle hchinikan-menu nunkakanhi.
Currently Selected:
1 Coríntios 12: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
