1 Coríntios 11
11
1Hita yimjetatshinephi hita pixka Cristo yimjetatshrino.
Suxone Halixatshrone Hixjexyawaka Piranapni
2Kihleru ntshinanwakathi klu tshinanu hita hixjexyawaka hichinikjeta hiyrun-koxa nuykoxyahi pirana homkahjexyawaka tshinanu.
3Naluklu himatjemyawaklu Cristo pirana ptowruneko yokanatatshrini. Hiyrun-koxa jeji suxo yokanatatshrini. Hoyakalu koxa Cristo yokanatatshrini.
4Jeji ranjihohnexini ruchyajiwuxini ho Hoyakalu tokanu runkaklexini hi hkahwakpiratlu Cristo hyokanatjeru.
5Seyni suxo tanjihohnexini Hoyakalu tokanu tunkaklexini tma muchyajiwutkanuklunu, hi tkahwakpiratlu thanuru. Wane tixini chichyajiwutkaluro pixka hixatshroni.
6Suxo tma muchyajiwutkanuklunupa kihlero tchichyatlahixikowaka. Hiyáhoni tipatewaxinri tchichyajiwuxikolu ho tastakjiwuxikolu waneklu tuchyajiwutko.
7Jeji hi rujhalu ruchyaljiwu klu tshinanu Hoyakalu yaholukni wale hiyrun-koxa Hoyakalu hpoyahnuta. Seyni suxo jeji tpoyahnuta.
8Klu tshinanu jeji hi suxo psojite hkamhika seyni suxo halikaka jeji psojite.
9Jeji hi suxo tshinanu hkamhaka seyni suxo halikaka jeji tshinanu tkamhaka.
10Hiyáhoni suxo hijhalu tojiwu tuchyaxyawaka tekhixyawaklu thanuru towutle tshijicha hwatshroni, hiwejikalune Hoyakalu towrerune tenhohne hajene hetanu tshinanu.
11Seyni wiwejinriya Cristo tshinanu hi rawa jeji tsonu, hi koxa twa suxo tsonu seyni ptowruneko hwa.
12Klu tshinanu halikakni suxo jeji tuyakaxya seyni jeji koxa suxo matkaklu. Seyni ptowru potuko Hoyakalu hichpajya.
13Hijhahchinikanyehkakanu hixkakluko. Kihle hetkolhe suxo muchyaljiwuto Hoyakalu tanjixini?
14Hi he hixako hixannu hasrukhi jeji rojiwuwaxini, mkahwakpiratkotu rixlu rojiwuwle?
15Seyni Hoyakalu heneklo suxo tojiwutsa. Tojiwutsa tuchyatjerupa tenekka.
16Seyni satu yineru kahwajinri xye pirana npupjexyawaka waneya wla ntshinanru. Hikeni hiyrunuko xye pixkalutu womkahleru hiyrun-koxa Cristo halixatshine Hoyakalu hapatjetanune xyekaka tsonu romkahitna.
Jesus Cristo Hipnale Hichinijikowaka Piranapni
17Xyekaka hiykolu nunkajinhi, hi nimalwuthi. Klu tshinanu hixa hapatjeru hkamhini hi repixna hapatjetatshine seyni rumtukna.
18Klu tshinanu mitshikananhapka nyijnakotlu Cristo halixatshine hapatjexikowaka hapatjexini, hixa ptohkaka hitspaljexini waneya hima hkamnikakjeta. Hiyrunu xye pirana nalixa psotsonu.
19Klu tshinanu rujhaklu hkaniprexikowakna hixkakluko ruphujewniywakapa halikaka pirana homkahitatshine hixa tskalaya.
20Klu tshinanu hixa hapatjexini, hi Tsru Hixikatshriwa Cristo hipnale hichinijyawaka tshinanu hnika.
21Klu tshinanu satkaka kochtshekhapkatlu hnikanrupa. Waneya pimrine hike nikatka seyni pimrine himetatka.
22Hi he kapjihi hnijyawaka hiryawaka? Hixlahe heyikna Cristo halixatshine hapatjetatshine Hoyakalunune? Hiyahokni hixa patetjetna hike mwikane hixa tskala hapatjexikatshine. Ha xawakni klu pirana ntshinanhi? Numukathe kihler-pirana ntshinanwakaxyawakhi? Hike, wale pirana tshinanu hi nimalwuthi.
23Klu tshinanu walekni Tsru Hixikatshriwa Jesus hinkajya piranno, walekni hix-koxa nunkakanu. Tsru Hixikatshriwa Jesus hkachixikolu yetshnopa, pão hkochtsheka.
24Hoyakalu hpoyahnuta Jesus waneya hjiknajrotlu pão waneya wane htshina: “Xyekni nomane, hixa tshinanu jiknahkaluru. Xye pixkalutu hkamhajetanu hita hipnale hichinijikowakapa.”
25Waneya waneko pixka rixlo copa stono, rali niklexinixkana. Wane htshina Jesus: “Twu copa stonha nunkakletleru waleni herotu nohraha piranni. Ptowru katako turiko copa stono wan-hixjetanu hita hipnale hichinijikolupa.”
26Klu tshinanu ptowru katako xye pão hnijini hiyrunu twu copa stonha hirini, waleni Tsru Hixikatshriwa Jesus hipnale runkakleta haté rapojinpatnaka.
27Hiyahokni katuktako Tsru Hixikatshriwa Jesus mane muchinikanretkatuko nijiniplu xye pão ho ruriniplo twu copa stonha Tsru Hixikatshriwa Jesus mane hiyrunu wale hraha hmajnakowaxya.
28Hiyáhoni rujhahchinikanuxinwa satkaka wale nanwaka. Wan-hixatshinhi nikanru xye pão hiyrunu hirinro twu copa stono.
29Klu tshinanu satu xye pão nijini ho twu copa stonha rurini hma muchinikanretkanuklunru Tsru Hixikatshriwa Jesus mane pirana waneya hnijinri hiyrunu rurinro waleko rapnokaxikolu yaholuni.
30Wale tshinanukni hixa hixolunhi hyeyixjeta, hihrokjeta hiyrun-koxa satkaka hipnatka.
31Mitshikananhapka wujhahchinikanuxinwa hix-nanuko hi rawanu jikolukanuru Hoyakaluya.
32Klu tshinanu hikolukanuwnatshinepwu, wapnokatko Tsru Hixikatshriwa Hoyakaluya wma mapnokaxikowakanupa xye psol-tshijneko hajeneya.
33Hiyáhoni Cristo tshinanu nmoletanune, hixa hapatjexini Tsru Hixikatshriwa Jesus hipnale hichinikanrexyawaka hkahwakkakanu.
34Satu yineru natshixinipa, hipjiko hnijini. Hiyáhoni hixa hi hikolukanuwnanu Hoyakaluya hapatjexinipa. Pimri pirankaka wane napojinipa nuhletanu.
Currently Selected:
1 Coríntios 11: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
