Miqueas 2
2
Da lquesaxanaxa ná'maq pataxasoxonaxairipi
1¡'Xoraicolec ná'maq 'ue da la'deenataxanaxac quiyi pe
quiyim ỹo'uet ca se ỹa'maxañi,
ca quena' ỹovita yi na'xa'a, ca ỹo'uet,
ma' hueeto'ot dá'maq nquesaxanaxa!
2Quena' 'ue yi nqo'teu'a 'laua, ca rouootaxana'gue;
chaqai quena' 'ue na nqo'teu'a 'imec, ca' rocacha.
Pataxañi na qomyipi,
chaqai na llaalqaipi chaqai na lalamaxaret louenqaipi.
3Vichiguiño' 'naac ñi qara'gaxala':
Ỹim liỹa 'ue dá'maq sham shine'teguelo qamiri.
Selatalo qamiri ma'le ca ne'xoric lodegaxat
cá'maq sqai ỹite' ma'le naua rqosoochiri,
ca' tot qaica ma'le da nemaqajnaxaguii quiyi huoitegueri',
ma' chalego la'aaqa' ma'le naua na'xata'.
4Ca' quecajo na'xa'a, ca qaro'ueenaxantalgoto qamiri,
qam cajo no'ueenaxanaxac 'ec ỹenaxac. Qohinac caqamiri:
Ỹaatqajam qanomachichiriñom qomi':
na qouo' ná'maq lalamaxaret ñi qara'gaxala'
ỹoỹoota'a ca la'gaxala' qaica ca ishit quepaxata'guit;
naua qana'lauari shi'gue qaneuagaxachiguilo
quená'maq mashic qomi' loxonqa.
5Vichiguiño' qamiri mesqai 'iỹapegueu'a
na lalamaxareteripi ñi qara'gaxala'.
Ná'maq 'maatqaic netaxaỹaxanqajanqaipi
6Ca na'maxare 'naac:
¡Se sahoqotaque quiyim naiquena ca letaxaỹaxaqui ñi qota'olec,
ma' cá'maq ne'xoric se noviroxoua'!
7¿Peeta'a 'ue ca qainaxalec se no'uen na llaalqaipi so Jacob?
¿Peeta'a ñi qota'olec tot qaico' ca lepagaxallic?
¿Chaqaido' dá'maq 'neetari' ñi qota'olec?
¿Loqo'm tot qoshiilec da la'qaatec
quecá'maq qom na'maxateta?
8Ca' ñi qara'gaxala' 'naac:
Qamiri napaguiiteguelec na ỹalamaxareteripi.
Coñiỹalo naua loho lo'yaxanqa
ná'maq rapil queca lauataq
'neetapega mashic nca'leuec.
9O'yiỹauec na 'aallipi quenauá'maq lauochaqate' lomaate'
chaqai tot qaica ma' liỹa quiyim 'viichii
dá'maq lemaqachic saanem na llaalqaipioqui'.
10Ne'laxachishiguim, ca' quii,
ma' najo mesqaina ná'maq co'matqa';
ma' mashic chalego ná'maq se no'uen hueetalec na'maxare,
ỹaatqajam ná'ogue na'lliichiguiñi.
11No'm 'ue ca ỹo'uet ca la'maachic, ca' 'naac:
“Ỹim sa'xateta'guit ca lataxa chaqai ca 'taxat,”
ca' chaqaica cá'maq ỹaatqajam na'qaataxanqajnec qaimaqachin quenajo qomyipi.
(2.12-13 Ñi qota'olec 'naac ro'ootaxanlec ma'le so lalamaxareteripi.)
Currently Selected:
Miqueas 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.