Mateo 3
3
So nachilaxanataxanaq leenaxat Juan ỹa'xateta'pe naua na'qaatqa quiyi 'laua qaica qom
(Marcos 1.1-8; Lucas 3.1-9, 15-17; Juan 1.19-28)
1Ca co'na' mashic 'vii caua ñaxari, ca' so nachilaxanataxanaq leenaxat Juan nacpegue' yi 'laua qaica qom quiyi Judea, ỹa'xatetac da na'qaatec. 2Ca' da la'qaatec 'neetasa':
—Netogochiguilo nqai'ñii' naua qavilyii, ma' mashic tot qoỹoqaque da lo'ueenataxanaxac ñi qota'a neeta'gue da piguim quiyim ỹoiquentac ná'ogue najo.
3Ca' sojo Juan chaqaiso' so 'neetapego' na'le so letaxaỹaxanqajnec ñi qota'a leenaxat Isaías co'na' deraxan, 'ne'teguesa':
'Ue so qara'qaataque qom lavillaxac,
'maqateguelec yi 'laua qaica qom,
ca' so laualaxac 'neetasa':
“'Maxachiñi ca nayicyaxac ñi qara'gaxala';
ỹaatqajam ỹalamqata nqai'ñii ca llic.”
4Saua loho so Juan no'ueenataxat na nauaanaxanaxa late'e laue, chaqai loshicmaxa so nosaataxaqui, chaqai loqo ana piñai chaqai na rapic li'i quena 'oochi. 5Chicqotapegueu'a yi na'a' lodegaxat Jerusalén ná'maq nacpegue' so'maxare quiyim na'xaỹaxana, chaqai ná'ogue ná'maq neetalec yi 'laua Judea, chaqai ná'maq sqoỹoqaque caso lachiugue Jordán. 6Ca co'quena' 'naac quiyim ỹaxañiñi naua lasauaxasete', ca' so Juan nachilaxan caso lachiugue Jordán.
7Qam co'na' so Juan iuane'ta so 'xoic qomyipi chicqaugui na fariseoipi chaqai ná'maq chicqaugui na saduceoipi nanac ỹahotaque quiyim qanachilaxan, ca' so'maxare 'naaco':
—¡Qamiri nanaic llaalqaipi! ¿Nega'ỹo' cá'maq ỹa'ue ra'xaỹaxaguii quiyim 'iichiỹa'piguit cá'maq chalego lecaic nouaxanaxaset na qom nepalata? 8Na'maxachita, re'qoota nqai'ñii da no'ueenataxaguii quiyim mashic 'xañiñi naua ranataxahi se no'viiñi. 9Qam 'neeto' lotqai hueetapigui qavillii quiyim 'ñiỹac: “Qomi' llaalqaipi so Abraham.” Ma' ỹim shinac ñi qota'a ishit ỹo'uet ca llaalqaipi so Abraham, ỹachigoxochichiguilo nauajo qari. 10Ca qai'pe mashic ỹa'maqatañi quiyim qaỹouaxanchi'ñoto naua lpa'yii ana qo'paq. Chaqai aná'ogue ana qo'paq quiyim se no'uen ca la, ca' qaỹouaxanlec, ime, ca' qainaxañigui ca norec. 11Ca' ỹim ỹaatqajam lliqueta ñachilaxañiguilo qamiri na huaxaỹaq, ca' chi netanec quiyim lachii' naua ranataxahi se no'viiñi. Qam cá'maq coỹaretalec aỹim, ca'maxare nachilaxanalo qamiri ma'le ca Espíritu Santo chaqai ca norec. Ca'maxare paguec lquesaxanaxa caỹim, vire'ta quiyim se seshit quiyim chi se'xate' caua lapelate'. 12Shi'gue lo'qoota'a so lochigoxosoxonaxat, ca' co'taxat na trigo, naqat na lovi. Ime, ca' ỹa'maxat ná'maq co'teeta trigo la quiñi lahi'. Qam na lovi, ca' copata'a inaxañigui ca norec sqai 'om.
Da nachilaxanataxac so Jesús
(Marcos 1.9-11; Lucas 3.21-22)
13Co'na'le, ca' nanac so Jesús, chicqochi'ñi yi Galilea, nacpegue' so lachiugue Jordán yí'maq hueeta'ño' so Juan, qaiyi qanachilaxan queso Juan. 14Qam na' ñaqai 'aueta, se ỹa'maxaren quiyim nachilaxan. Ca 'naaco' queso Jesús:
—Aỹim souen quiyim qami' yachilaxañi', qam ¿qami' naquirepegue' aỹim?
15Qam so Jesús 'naaco' queso'maxare:
—Qam nagui le'en nqai'ñi' dajo. Ma' paguec la'maxa quiyim sepacqajanqachigui ná'ogue ná'maq ỹahotaque ñi qota'a.
Co'na'le, ca' so Juan nachilaxan. 16Ca co'na' qanachilaxan so Jesús, ca na' nenoxonshiguim quiyi huaxaỹaq, ca 'eco' huachigui na piguim. Ca' so Jesús iuañi'chiguit so ne'Espíritu ñi qota'a naỹa'ña so'maxare 'ec na coviguiñic. 17Co'na'le, ca' qara'xaỹaco' so na'qaatec, 'maqot na piguim, 'naac:
—Najo ná'maq ỹoqo'itaxat ỹaalec, na'maxare ỹaatqajam ñitoonta'pegue.
Currently Selected:
Mateo 3: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.