Lucas 13
13
Dá'maq ỹaatqajam ỹouen ca qom netacocha
1Ca' chaqaisaua sauajo na'xata', ca 'vio' saua novite', ca' ra'qaataxansapeguem so Jesús queso nashi Pilato 'vio' saua ỹalauate' qomi' nera'ñi yi Galilea. Ime, ca' ỹalecqajñiguit na leuoripi só'maq leuoripi ca lalauatec iseripi, ỹahosaque ỹavigaxate' quiyim lachitaxanataxanqate'. 2Ca' so Jesús 'naaco':
—¿Qamiri pe'taxañitaque quiyim sojo qomyipi qohine'tegue dajo paguec sauaqhuaiquipi quiyá'ogue yi liỹaripi na'ñi yi Galilea? 3Ỹim shinac 'e'. No'm qamiri se retacochahi, qamiá'ogue 'ñiita ma'le caua'maxare. 4Loqo'm 'ñiitapega quesaua dieciocho qaipataqarañi co'na' 'guiñi aso naue na'ñi yi Siloé, ¿peeta'a 'ñiitapega paguec sauaqhuaiquipi quená'ogue na neeta'ñi yi Jerusalén? 5Ca' shinapegalo qamiri 'e'. Ma' qamiri qai'neeta no'm se retacochahi, ca' qamiá'ogue 'ñiita ma'le caua'maxare.
Qaraloqojnaxana aso higo lashi qaca aca la
6Ca' so Jesús ỹa'uo' aso raloqojnaxana, 'naaco':
—'Uo' so ỹale 'uo' aso lanecse higo, ỹantalec yi na'laua. Ca' eec ra'ajnaxana, qam sqaca aca ỹanata la. 7Ime, ca' 'naapega só'maq neloxoỹaq queso 'laua, 'naaco': “'Ajñi', mashic tres ñaxari yapilta'quena, qam sqaca aca sanata cacá'maq ñi'guena'a la. Ca 'maxaraic huaxañirelec ada'maxare, ¿negue' quet cá'maq 'negue quiyim neetalec yi 'laua?” 8Qam só'maq neloxoỹaq quiyi 'laua 'naaco': “Qami' ña'co', ñaqai 'xañirac quenajo ñaaxa ada'maxare, ñaq ñi'ỹot chaqai semeetot. 9Ca' queda, ca' sqoue 'ue aca la. Qam no'm se ishit 'ue aca la, ca' qaỹouaxanlec ma'le.”
So Jesús ỹomatec aso 'aalo qoyimigui na lelaq queso na'xa'a co'mataxaqui
10Ca 'uo' so na'xa'a co'mataxaqui, ca' so Jesús rapaxaguinataxantac, hueetaugui aso lapoxoqui na judioipi. 11Ca' ỹalequetaho' aso 'aalo mashic ỹovi' dieciocho ñaxari queso le'ne'. 'Uo' so le'ec lecmaxaic qoyimigui nqai'en, ca' aso'maxare se ishit nalamaxajñi. 12Ca co'na' so Jesús idaana'a, ca roỹaxana, ca' 'naapego':
—Qami' 'aalo, nagui mashic souec qami' quena ralolaxa'e'.
13Ca' ỹashil-lec queda lqai'laxat aso'maxare, ca chaqa'ma' nalamaxajñi, ca' imaqachintac ñi qota'olec. 14Qam só'maq nashi cañí'maq napoxoqui ỹaatqajam ro'o, ma' so Jesús ỹomatec queso na'xa'a co'mataxaqui. Ca' 'naapego' so qomyipi, 'naaco':
—'Vii naua seis na'xata' quiyim ỹa'maqachiguiñi qaro'ueenataxanguilo. Ca chaqainaua quet naua huauguilo quiyim qaromachiuec, qam mesqaiyi yi na'xa'a co'mataxaqui.
15Ca' so qara'gaxala' saat, 'naaco':
—Qamiri mashic 'ñiitapega quiyim qamiri 'maxaraqa, ¿peeta'a sqaica canchaqaica caqamiri ỹosouec ca lalo ñii'lola, loqo'm aca lalo 'ashina queca na'xa'a co'mataxaqui quiyim ỹauegaxasom, ne'taxan queca huaxaỹaq? 16Qam cadajo 'aalo ma' llaale so Abraham, ca' so na'ỹaapec coñiretari' ada'maxare quedajo nalolaxa nagui mashic ỹovi' dieciocho ñaxari, ca' ¿se ỹa'maxaño' quiyim qaỹosouec quedajo ralolaxa queca na'xa'a co'mataxaqui?
17Ca co'na' 'naac dajo so Jesús, ca' sá'ogue so npa'guenaxauaripi ỹaatqajam 'xoic da layiloxo. Qam sá'ogue so liỹa qomyipi ỹaatqajam 'ue da netoonaxac na' iuanchigui da lecaic da ỹo'uet so Jesús.
Qaraloqojnaxana aso la ana mostaza
(Mateo 13.31-32; Marcos 4.30-32)
18Lotqai 'naaco':
—¿Nega'ỹo' ca 'nejem nqaishin da lo'ueenataxanaxac ñi qota'a quiyim ỹoiquentac ná'ogue najo? ¿Chaqai nega'ỹo' ca saloqojnaxana? 19Da'maxare 'nejem aca la ana mostaza quiyim ca qom ỹanlec ca na'laua, ime, ca' ñaxat, vire'ta quiyim 'nejem aca qo'paq late'ogue'. Ime, ca' anac ana qo'oollipi, ca' ỹo'uet na lco'vichaxaquiripi ỹanauguilo naua lasote.
Qaraloqojnaxana aca lpe'taqate na pan
(Mateo 13.33)
20Qai'neeta 'naaco' so Jesús:
—¿Nega'ỹo' ca saloqojnaxana quiyim 'nejem nqaishin da lo'ueenataxanaxac ñi qota'a quiyim ỹoiquentac ná'ogue najo? 21Da'maxare 'nejem aca lpe'taqate ca pan quiyim aca 'aalo icona. Ime, ca' inaxañigui ca lodegaxat laqaulatec, ca' aca'maxare pe'taxachigui cá'ogue cá'maq naqaulatec.
Ca lasom sqa logui
(Mateo 7.13-14, 21-23)
22So Jesús ñaqai taata'gue da Jerusalén, ca' taỹalec so na'aateripi chaqai naua na'aaterolqai', ca' rapaxaguinataxantac. 23Ca 'uo' so renataxan, 'naaco':
—Qami' qara'gaxala', ¿sqo vite' cauá'maq nca'lerec?
Ca' so'maxare 'naaco':
24—Nquipichiỹa'pegue' quiyim noxoñiho quiñi cocho'qui' lasom, ma' ỹim shinac quiyim ỹaatqajam 'xoic ma'le ca ỹahotaque inoxono, qam se ishit. 25Ma' ime, ca' cajo lauo' ca 'imec ne'laxashiguim, ỹapogui ca lasom ca 'imec, ca' qamiri pa'aitauec, ca' ỹaxañitapegueu'a ca lasom, 'ñiỹac: “Qami' qara'gaxala', huachire'ogalo qomi'.” Qam ca'maxare saat, ca' 'naac: “Taque', se sa'den ca chigoxoita'gue qamiri.” 26Ca' quiyi, ca qamiri 'ñiỹac: “Qomi' qami' qarqui'ỹaxaua, chaqai qane'taxaua quen, chaqai qami' paxaguinataxañisac quena' senqata'ñi yi qara'a'.” 27Qam ca'maxare 'naapegalo qamiri, 'naac: “Ỹim shinapegalo qamiri quiyim aỹim se sa'den ca chigoxoita'gue. Oquiỹe'e najo qamiá'ogue qamiri, ma' qamiri 'viichitac da se ỹa'maxañi.” 28Ca' quiyi hua'ñi, ca' nohiñitac chaqai quishquintecta' naua rovii quena qavillii, ma' daañiỹau'a ca Abraham, Isaac, Jacob, chaqai ná'ogue na letaxaỹaxaquiripi ñi qota'a, qoyinta'ñi ca lo'ueenataxanqa' ñi'maxare, qam qamiri, ca' qaro'yiỹauec. 29Ma' nac ma'le na qom chicqa'gue da rapiguim chaqai da 'guiñi chaqai da lqodoigue chaqai da lauashiguim, ca' nqa'xanñi quiyim que'e queca lo'ueenataxanqa' ñi qota'olec. 30Ca' queca ma'le 'uo' quena nagui co'uaataxantaho, ca' 'ue ca 'auetaho; chaqai 'uo' ná'maq nagui 'auetaho, ca' co'uaataxantaho ma'le.
So Jesús noỹenlec yi Jerusalén
(Mateo 23.37-39)
31Ca' chaqaiso so na'xa'a, ca novirero saua chicqoraugui na fariseoipi. Ca' qara'qaataxanem so'maxare, qohinac:
—Oquire'e najo, ma' ñi nashi Herodes ỹahotaque ralauachi'.
32Qam so'maxare 'naaco':
—Mohi, 'qaataxañim ma'le cataq co'ỹaxaraic: “Nagui chaqai nete'e so'da'oguiyi na ne'ec lecmaxaiquipi, chaqai somatec na ralolaxaic, ca' nete'e liỹa, ca' yime.” 33Qalaxam no'uen quiyim shic lecocho'qui' quena na'xa'a chaqai nete'e chaqai ca liỹa na'xa'a, ma' se ỹa'maxañi quiyim qaỹalauat ca letaxaỹaxaqui ñi qota'a pa'aatauec quiyi Jerusalén.
34¡'Xoraiqolqa qamiri ñiita'ñi na Jerusalén, ma' qamiri lauachiỹac na la'qaataxanqajanqaipi ñi qota'a, chaqai naxahitalec quena qa' ná'maq nelaatalo qamiri ñi qota'olec! ¡Ỹoto'o' quiyim sahotaque llapoonta' na qachaalaxai'pi, shine'tegue quiyim 'ec aca huaqa'e quena' lapoonta' na llaalqaipioqui', illo'oto naua laua', qam sqa 'maxariñii! 35'Ajñii qamiri, ma'le naua ra'aachiri co'tejelgoto; chaqai aỹim shinapegalo qamiri quiyim tot liỹa huañiua', toco' ma' 'ñiỹac: “Ỹaatqajam chalego loyac da llicyaxac ná'maq nelaatalo qomi' ñi qara'gaxala'.”
Currently Selected:
Lucas 13: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.