Juan 7
7
Saua lqaỹa' so Jesús sqai huerelec so'maxare
1Ca co'na' ime dajo, ca' so Jesús ỹouoxontac yi 'laua Galilea. Sqai quepegue' yi Judea, ma' quiyi'maxare na judioipi ỹahotaque ỹalauat so'maxare. 2Qam mashic tot qoỹoqaque so lemaqachic na judioipi quena' qoyinauguilo naua chi qaỹa'derañi 'imqolqai'. 3Ca' saua lqaỹa' so'maxare 'neraco':
—Mesqai viise'ena, qui' queda Judea, qaiyi caua queesa'pegue' qami' hueesa'gue da'maxare qai'neeta iuanta ca ro'ueenataxanaxaqui'. 4Ma' cá'maq qom ỹahotaque quiyim qaiuana cá'maq ỹo'uet, ca' se nañoxotetañi quecá'maq ỹo'uet. Ma' mashic 'viichi' dajo, ca iuanchigui quet nqai'ñi' ná'ogue na qomyipi.
5Ma' vire'talo saua lqaỹa' sqai huerelec so'maxare. 6Ca' so Jesús 'naaco' quesaua'maxare:
—Saqa' ỹovita ca ỹaloqo'. Qam caqamiri canchaqaica quenaua na'xata' ỹa'maqachiguiñi nqai'ñii. 7Quená'maq qomyipi hueetalec na 'laua se ishit quiyim noquii'alo quet qamiri. Qam aỹim qanoquii'a, ma' ỹim ỹaatqajam sechoxote'tem quiyim dá'maq ỹo'ueetetac se no'uen. 8Mohi, quiipegue' qamiri ca nemaqachic. Qam ỹim 'e', sqa shic, ma' saqa' ỹovita cá'maq ỹaloqo'.
9Ca co'na' ime ỹa'xat dajo, ca no'ueenañi quiyi Galilea.
So Jesús ỹalequetaho queso nemaqachic quena' qoyinauguilo naua na'derañi 'imqolqai'
10Qam na'chaqai que' saua lqaỹa', ca' so Jesús qai'neeta eec queso nemaqachic. Qam se nachaxanta. 11Ca' na judioipi imitetaque so'maxare queso nemaqachic. Ca 'naaco' quen:
—¿Tegue' canchaqai hueeta'gue cajo ỹale?
12Ca' quesó'maq qomyipi 'xoico' só'maq retaqatapigui so'maxare. 'Uo' quen na 'naac: “Ỹaatqajam huagaxaraic ỹale.” Qam 'uo' quen na 'naac: “Sqai huagaxaraic, ma' ỹayintac na qom.”
13Qam qaica ca ra'xaiqataxan quena qomyipi quena' qaỹa'xat so'maxare, ma' 'ue da nqolonaxa quena' judioipi.
14Ca co'na' mashic lavinñi so nemaqachic, ca' inoxono so Jesús cañi no'ueenaxanaxaqui, ca rapaxaguinataxan. 15Ca' na judioipi ỹaatqajam 'uo' na le'laxa, ca 'naaco' quen:
—¿Negue' cá'maq 'neeto' dá'maq dajo, ma' ỹaatqajam 'ue ná'maq ỹa'den, qam se ỹauanapega napaxaguin?
16Ca' so Jesús 'naaco' queso qomyipi:
—Dá'maq dajo mese ỹalamaxat ỹapaxaguinataxanaxac, ta'ta'a ñí'maq yila'. 17No'm 'ue cá'maq huachi'chiguit quiyim ỹahotaque ỹo'uet dá'maq ỹahotaque ñi qota'olec, ca ỹa'deenta quenauá'maq ỹapaxaguinataxanaxaco quiyim chicqoro'ot ñi qota'olec, loqo'm chaqaỹim ỹapaxaguinataxanaxac. 18Cá'maq chi lo'ueenatec ca ỹa'xat, ỹo'uet, ma' ỹahotaque quiyim qaimaqachin quena qom. Qam cá'maq ỹahotaque quiyim qaimaqachin cá'maq nelaatqo', ca' chaqaica cá'maq ỹaatqajam llic ca ỹa'xatetac, chaqai qaica ca na'maachic hueetagui.
19¿Mesqai llico'da quiyim so Moisés ỹaanema qamiri da naqataxaquipi? Qam caqamiri qaica ca na'xaỹaxana dajo naqataxac. Ma' ¿chi'negue qamiri viitaque yalauachii?
20Ca' so qomyipi 'naaco':
—'Ue ñi lelaatec so na'ỹaapec neetagui qami', ma' ¿nega'ỹo' ca ỹahotaque ralauachi'?
21Ca' so Jesús 'naaco':
—Ỹaatqajam 'oonoqui' so so'uet quiyim huaugui so na'xa'a co'mataxaqui, ca' qamiá'ogue 'ue da re'laxahi. 22Qam so Moisés ỹaanouguilo qamiri quiyim qaỹa'ue ca netanaxaset na qomyipi ('eno'm mesqaiso só'maq ỹaatqajam chicqo'tot, ma' da'maxare chicqo'ot so 'auaxaic qataa'illipi). Ca' vichiguiño' qamiri 'viichii ca netanec ca noctoqui', 'eno'm viichigui ca na'xa'a co'mataxaqui. 23Hua', qam nagui quiyim se napaguiỹalec na naqataxaquipi chicqo'ot so Moisés, ca' qamiri 'viichii ca netanec ca noctoqui', 'eno'm viichigui yi na'xa'a co'mataxaqui, qam ¿chi'neco' 'ohi caỹim ma' imeuec nqaishin ná'ogue na loshicmaxa so ỹale queso na'xa'a co'mataxaqui? 24Se ra'iitapigui quiyim michii ca re'qoochigui. Quiyim 'ue ca michii, qam ỹaatqajam 'maxaraic nqai'ñii ca remiitaxanaxaguii.
So Jesús ỹa'xat cá'maq chicqa'gue
25Ca 'uo' ná'maq na'ñi yi Jerusalén renataxan:
—¿Mesqaido' dajo dá'maq qaidaantaque quiyim qaỹahotaque qaỹalauat? 26Qam da'maxare ỹaatqajam nachaxanta quiyim retaqatac, qam qaica ca qohinegue. ¿Loqo'm mashic qai'neeta ná'maq nashillipi huelec da'maxare quiyim ỹaatqajam chaqaida dá'maq nashi nca'laxaqui? 27Qam qomi' sa'deenqata dá'maq chicqa'gue da'maxare. Qam ma' novi' cá'maq nashi nca'laxaqui, qaica ca ỹa'den ma'le cá'maq chicqa'gue.
28Ca co'na' 'xaỹa dajo so Jesús ma' rapaxaguinataxantac cañi no'ueenaxanaxaqui, ca retaqa, qam nelamaxaren, 'naaco':
—¡Ajá'a, ca' ỹim huañiua', chaqai 'yiiñii ca sachigoxogue! Qam se ñanoiquentac quiyim ñanac, ta'ta'a quiyim yila' ñí'maq ỹaatqajam lliqueta, ca' ñí ñí'maq sqai huañiỹapega. 29Ỹim maxasa' seuana, ma' sachicqo'ot ñi'maxare, chaqai ñi'maxare ñí'maq yila'.
30Ca' qaỹahotaco' qaiconlec quiyim qaicoñi'; qam qaico' ca ishit iconlec, ma' saqa' ỹovita ca laloqo' so'maxare. 31Qam 'xoico' ná'maq huelec so'maxare, ca 'naaco':
—Ma' novi' cá'maq nashi nca'laxaqui, ca ¿peeta'a paguec ma'le cá'maq netanqaipi se qaiuanapega quedá'maq dajo ỹale?
So fariseoipi ila' so nouaataxanaq quiyim coñi' so Jesús
32Na fariseoipi co'na' 'xaỹa so qomyipi ỹa'xatetac so Jesús, ca so fariseoipi chaqai na lashillipi na netaxaỹaxanqajanqaipi ila' so nouaataxanaq neloxoỹaripi cañi no'ueenaxanaxaqui quiyim coñi' so Jesús. 33Ca co'na'le, ca 'naaco' so Jesús:
—Chaqai cocho'qui' salequeta'guita qamiri, ca ma'le, ca sopila ñí'maq yila'. 34Qamiri daañitaque ma'le aỹim, qam sqa nachiua', ma' sqai shichii 'iigue ma'le dá'maq senta'gue.
35Ca' quiyi, ca so judioipi chi nenatetecta':
—¿Nega'ỹo' ca taigue ma'le dá'maq dajo quiyim qomi' se sanataxa? ¿Loqo'm quepegue' na judioipi quená'maq neuagaxatetac, hueetaugui na sqai judioipi, qaiyi ỹapaxaguin na sqai judioipi? 36¿Nega'ỹo' cá'maq reloqo'tegue dá'maq 'naac coqomi': “Daañitaque ma'le aỹim, qam sqa nachiua', ma' sqai shichii 'iigue dá'maq senta'gue ma'le”?
Ca huaxaỹaq 'nejem ca la'uaxac
37Ca quesó'maq co'uaataxanaxaic na'xa'a queso nemaqachic, ca ỹaatqajam pagueco' quen da nemaqajnataxanaxa. Ca' quesojo na'xa'a nachajñi so Jesús ỹaatqajam nelamaxaren na' retaqa, 'naaco':
—No'm 'ue ca iuet laquip, ca nacpegue' aỹim, ca' ne'et. 38Ma' 'nerac yaua nerecse' na'qaatqa: cá'maq huelec aỹim, ca 'ec huaxaỹaq ne'paxantashiguim ca chicqotapougui añi le'taxanata.
39Ca' quedajo ỹahotaque 'naac so Jesús, quiyim quecá'maq huelec so'maxare, ca icoñiguit ma'le so Espíritu Santo. Ma' saqa' novi'o' na'le so Espíritu, ma' so Jesús saqa' ỹovita yi laloqo' quiyim qaimaqachin.
Na qomyipi ỹoricchi na la'deenataxanaxaquipi
40Ca 'uo' na queso qomyipi co'na' 'qaachigui dajo, ca 'naaco':
—Dajo ỹale ỹaatqajam chaqaida dá'maq letaxaỹaxanqajnec ñi qota'a qaỹa'xateta'guit quiyim naỹa'quena.
41Chaqai na liỹa 'naaco' quen:
—Chaqaida dajo dá'maq nashi nca'laxaqui.
Qam 'uo' quen na liỹaripi 'naac:
—¿Chi'negue queta' chicqochi'ñi yi Galilea ca nashi nca'laxaqui? 42Naua nerecse' la'qaatqa ñi qota'a ỹa'xate', quiyim cajo nashi nca'laxaqui, ca'maxare qohinac llaalec so nashi David, chaqai chicqochi'ñi yi Belén yí'maq la'a' na'le so David.
43Ca' na qomyipi ỹoricchi na la'deenataxanaxaquipi queso Jesús. 44Ca 'uo' na ỹahotaque quiyim iconlec coñi', qam se ishit iconlec so'maxare.
So nashillipi sqai huelec so Jesús
45Ca' so nouaataxanyipi reloqota'a aso no'ueenaxanaxaqui quiyi Jerusalén pilo quiyi neeta'ñi so fariseoipi chaqai so la'gaxala' na netaxaỹaxanqajanqaipi. Ca qainato'o':
—¿Chi'neco' ma' se naviguiỹo' ca'maxare?
46Ca' saua nouaataxanaq lase' 'neraco':
—¡Quena' retaqa so ỹale, qaica qom 'nejme' naua la'qaatqa!
47Ca' so fariseoipi 'naaco':
—¿Qamiri qai'neeta 'xañii'teco' ca nayinaxaguii? 48¿Loqo'm 'ue ca mashic huelec so'maxare quena qarashillipi, loqo'm quena fariseoipi? 49Qam najo qomyipi, ma' se ỹa'den na naqataxaquipi, na'maxare tai'a ca nouaxanaxaset ma'le quiñi qota'olec.
50Ca' so Nicodemo só'maq 'uo' so pe quepegue' so Jesús, so'maxare qai'neeta ỹalequetaugui na fariseoipi, 'naaco':
51—Naua qanaqataxaco queso Moisés ỹa'xate' quiyim qomi' se sauqai ca lasauaxaset ca qom, quiyim saqa' 'au sa'xaỹaxa, quiyim sa'deenaq cá'maq ỹo'uet.
52Ca qohinapego' so'maxare:
—¿Qami' qai'neeta qami' Galilea le'ec? Napaxaguiñitalo ma'le naua naneresañi la'qaatqa ñi qota'a, qaiyi huañita quiyim qaica ca la'qaataxanqajnec ñi qota'a quiyim chicqochi'ñi quet yi Galilea.
Aso 'aalo nanatqa lo'o'
53Co'na'le, ca' quiñi 'óna quepegue' cá'maq chi la'a'.
Currently Selected:
Juan 7: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.