Efesios 5
5
Dá'maq 'neeta quet cá'maq no'ueenataxac na llaalqaipi ñi qota'a
1Ma' mashic qamiri llaalqa ñi qota'a, ca' ỹaatqajam nquipichiỹa'pegue' quiyim 'ñiita ñi'maxare. 2Quiyim qamiri 'xorenataxanaxaiqa 'nejem so Cristo na' qare'xoren, ca' nañaanalta' quiyim ileualgoto qomi', 'nejem nqohin ca qagreta llaalec quiyim qaỹalauat, chaqai qaỹavigaxat, ca' qoỹaanot ñi qota'a. Ca namaañi'chiguit da lahita ñi'maxare.
3Ca' mashic qamiri lalamaxarete' ñi qota'a, ca no'uen quiyim totqai 'maxauguilo qamiri ca dequenaxac, chaqai ná'ogue na liỹa se no'uen, chaqai cá'maq ipita'a ca ỹoqa'a. 4Chaqai sqai 'xachii' naua na'qaatqa ỹo'ueete' ca nayiloxo chaqai ná'maq qaica ca 'negue, loqo'm cá'maq ỹo'uet ca naỹalliguiric. Ma' nauajo se ỹa'machiñi. Ta'ta'a quiyim qoỹaanot da 'aachicyaxac ñi qota'a. 5Ma' cá'maq ñaqai nocachita'guit aca se loua, loqo'm cá'maq ñaq ỹo'ueetetac cá'maq rapio'qotaxan, loqo'm cá'maq ñaqai queetalec quiyim ipiteta'a ca liỹa (ma' 'nejem cá'maq ñaqai nqouagaxaintacot ca nashiilec nqolac), ca' mashic 'yiiñii qamiri quiyim ca'maxare se inoxona'a ma'le da lo'ueenataxanaxac ma' ỹoiquentac ná'ogue najo ñi Cristo chaqai ñi qota'a. 6Qaica ca ỹayine' qamiri quenaua na'qaatqa qaica ca 'netegue, ma' chaqainaua nauá'maq se no'viiñi nauá'maq chicqochigui dá'maq chalego lichic lonogoxonaxac ñi qota'a quiyim ỹa'ue ca nouaxanaxaset ná'maq se na'xaỹaxana ñi'maxare. 7Ca' vichiguiño' se lapohita'guit ná'maq 'neetari' dajo.
8Ma' quesom qamiri viitaugui na napalaxa, qam nagui ma' mashic na'yiitau'a so Cristo, ca viitaugui na lauaq. Ca na'maxachita 'ñiitari' ca qom hueetaugui na lauaq. 9Ma' na lauaq chaqaina ná'maq chicqochigui da ne'xorenataxanaxa, chaqai da lliqueta, chaqai dá'maq co'teeta chaalataxac. 10Reuogoxoỹa'pegue' quiyim 'yiiñii ca leloxoỹaxac cá'maq ỹa'maxarenta so qara'gaxala'. 11Sqai coñiỹapegueu'a ná'maq qaica ca 'negue quená'maq ỹo'ueetetac ná'maq ñaqai hueetaugui na napalaxa. Ta'ta'a quiyim chaxañiuec, qaiyi qaỹa'den. 12Ma' ỹo'uet da nayiloxo quiyim chi qaỹa'xat dá'maq ỹo'ueetetac ỹoxotetañi na'maxare. 13Qam quena' ná'ogue nanchaqaina qaichoxotec quena lauaq, ca ná'ogue re'qoota, ma' ná'maq lauaq ichoxot ná'ogue. 14Vichiguiño' da na'qaatec 'naacsa':
Ma' qami' ñaqai laqaite', ca' nelo'irec;
ne'laxachirishiguim quena leuaxaiquipi,
ca' coỹarelec qami' ma'le so Cristo.
15Vichiguiño' ỹaatqajam ỹajñita ca 'neeta ca na'maqataxaguii. 'Neeto' lotqai 'ñiitari' ca qaica ca ỹa'den. Ta'ta'a quiyim 'ñiitari' ca 'deenaxanqachaqaic. 16Ca' nquipichiỹa'pegueto naua na'xata' quiyim 'viichii cá'maq no'uen, ma' quenauajo na'xata' 'xoic na qaỹo'ueetetac so no'uen. 17Ca 'neeto' lotqai qaica ca ra'deenataxanaxaguii; ta'ta'a quiyim reuogoxoỹa'pegue' quiyim 'yiiñii cá'maq ỹahotaque so qara'gaxala'. 18'Neeto' lotqai rquiñiuguichii, ma' dajo tai'a quiyim na'laañi nqai'en ca qom. Ta'ta'a quiyim no'qaachiguilo qamiri queso Espíritu Santo. 19Chaqai quiñi 'óna quiyim retaxaỹa'pegue' ca liỹa, qam ỹahote'e quená'maq ỹoreta'oguit no'ueenaxanaxaquipi chicqo'ot so Espíritu. Chaqai machiỹauec ñá'ogue añi re'taxanatahi quiyim 'ueenaxañitac chaqai maqachiñitac so qara'gaxala'. 20Se neme 'ỹaañitacot da na'aachicyaxaguii ñi qota'olec quená'ogue nanchaqaina, ma' quiitalec so qara'gaxala' Jesucristo.
Da no'ueenataxague' caua noua' chaqai ca llaalquenaxanaxague'
21Ca' quiñi 'óna ỹaatqajam notauanta'guit ca liỹa, ma' ỹaatqajam 'ue nqai 'negue nqai'en ñi qota'a.
22Ca' aca 'aalo se napacalec ca loua, 'neeta'gue nqai'en dá'maq 'neetari' queso qara'gaxala' Jesús. 23Ma' cá'maq loua chaqaica cá'maq 'ec lqahic aca'maxare. Ma' chaqaida dá'maq dajo 'neeta so Cristo lqahic ná'maq mashic icoñiguit da na'qaatec, chaqai qai'neeta nca'laxatec. Ma' chaqaina ná'maq 'eco' loshicmaxa so'maxare. 24Qam chaqaida dá'maq 'neeta quiyim ná'maq mashic icoñiguit da na'qaatec se napacalec so Cristo, ca' 'nejem aca 'aalo se napaqueteguelec ca loua quená'ogue nanchaqaina.
25Chaqai cá'maq ỹale mashic 'on, ca' ỹaatqajam i'xoren aca loua, ca 'nejem so Cristo ỹaatqajam i'xoren ná'maq mashic icoñiguit da na'qaatec, ca' ỹaanec da nachaalataxac ileualec na'maxare. 26Dajo 'ne'tegue, ma' ỹahotaque co'taxateta ná'maq mashic icoñiguit da na'qaatec, ỹahote'e na huaxaỹaq, chaqai naua la'qaatqa, 27qaiyi ma' ỹovita quiyim nachaxana'a nqai'en so'maxare ná'maq mashic icoñiguit da na'qaatec, ca ỹaatqajam co'teeta, qaca aca lete, chaqai ca lesoỹaxa, chaqai canchaqaica 'nejem da'maxare. Ta'ta'a quiyim co'teeta chaqai naloochiguiñi. 28Ca ỹale quiyim mashic 'on, ca' ỹaatqajam i'xoren aca loua, 'nejem nqai'en dá'maq chi lqo'iichi quená'maq chi loshicmaxa. Ma' cá'maq nqo'ta aca loua, ca' i'xoren dá'maq chi nachaalataxac. 29Ma' sqaica quet cá'maq ishit ỹamaqa'gue cá'maq chi loshicmaxa. Ta'ta'a quiyim qui'ỹaxan chaqai cochiỹa. Ca' so Cristo chaqaida 'ne'tegue quená'maq mashic icoñiguit da na'qaatec, 30ma' chi loshicmaxa. Ca chaqai qomi' louenqa sojo noshicmaxa, 'ec qomi' la'aachi' chaqai lpi'naqa. 31“Ca' vichiguiño' quiyim ca ỹale ỹalat ca leta'a chaqai aca late'e, ca lauora aca loua. Ca cauá'maq dos, qam 'ec ca 'oonoqui'.” 32Ca' dajo sa'xatetac ỹaatqajam chalego lecaic da se re'xogui leloxoỹaxac, ma' dajo ỹa'xat da leloxoỹaxac so Cristo chaqai ná'maq mashic icoñiguit da na'qaatec. 33Qam qai'neeta 'naac quiyim quiñi 'óna caqamiri 'maxaraic quiyim i'xoren aca loua, 'nejem dá'maq quiyim chi ne'xorenalta', chaqai acá'maq 'aalo se napacalec ca loua.
Currently Selected:
Efesios 5: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.