Efesios 1
1
So Pablo ilata aso lerecse só'maq mashic icoñiguit da na'qaatec na'ñi yi Efeso
1Ỹim Pablo, ma' ỹimo' loỹaxanaxat ñi qota'a ỹauaaque quiyim aỹim lelaatec so Jesucristo. Ca' selatalo qamiri ana ỹerecse, ma' qamiri lalamaxarete' ñi qota'a chaqai viilec so Cristo Jesús, ñiita'ñi na na'a' lodegaxat Efeso. 2Sahotaque coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.
Naua nqouagaxaco cá'maq mashic na'deetau'a so Cristo
3Semaqachinqatac ñi qota'a ñí'maq leta'a so qara'gaxala' Jesucristo, ma' mashic ña'daqatau'a so Cristo, ca' ñi'maxare ỹaanema qomi' ná'ogue ná'maq lqouagaxanaxat chicqo'ot nqai'en na piguim. 4Ñi qota'a qomi'o' lca'acse' chicqochigui nqai'en so Cristo na' saqa' ỹo'uet na 'laua, qaiyi seuqato'ot ñi'maxare quiyim co'teeta da qanachaalataxac chaqai qaica ca qarasauaxaset. 5Quedá'maq lqouagaxa, ca shi'co' ỹaqatqajantari' iconoxoguit quiyim 'eco' qomi' lalamaxarete' llaalqa, chicqochigui nqai'en so Jesucristo, nachiñi'chiguit nqai'en dá'maq shi'gue ỹahotaque quiyim 'ne'tegue. 6Ca' vichiguiño' se neme quiyim semaqachinqatac ñi qota'olec quedá'maq chalego lecaic lqouagaxa coqomi', ma' ña'daqatau'a só'maq lqo'itaxat llaalec. 7Quedá'maq chalego lecaic le'xorenataxanaxa, ca' ñi qota'a nca'laxaterec qomi', chicqochigui nqai'en da lelauaxa so llaalec, ca ỹapalaxate' caua qarasauaxasete'. 8Ñi qota'a ỹachaxan da le'xorenataxanaxa chalego lecaic, ỹaante'ema qomi' da na'deenataxanaxac quiyim 'ue ca sa'deenaq, 9chaqai ỹa'deenaxanaxanque qomi' dá'maq ỹahotaque ỹo'uet se re'xogui, dá'maq chaqaiñi ñi'maxare ỹahotaque quiyim ipaquichigui nqai'en. 10Ca' dajo ỹaatqajam qaica ca taỹa'gue, ta'ta'a quiyim ipaquichigui ma' ỹovita ca laloqo', ma' ñi qota'a ỹomato'ot ma'le quiyim so Cristo ỹoiquentac ná'ogue nanchaqaina, quená'maq hueeto'ot na piguim chaqai ná'maq hueetalec na 'laua.
11Quedá'maq quiyim ña'daqatau'a so Cristo, ñi qota'a shi'gue nca'au'alo qomi', qaiyi ñouanqau'a ma'le cá'maq ỹaanec ma'le ñi'maxare. Qam quedá'ogue dajo nachiñi'chiguit dá'maq ỹahotaque ñi qota'a, ma' ñi'maxare ñí'maq ỹo'ueetac ná'ogue nanchaqaina quená'maq ỹa'maxarenta. 12'Ne'tegue dajo, ca' qaiyi qarca'leuec qomi' ma' 'au seuaqlec so Cristo, qaiyi qaimaqachin ñi qota'a queda lecaic. 13Chaqai qai'neete' qamiri, na' 'xaiỹa dá'maq ỹaatqajam lliqueta na'qaatec, na' qaỹa'xat da rca'laxahi, ca' viilec so Cristo, ca' na'yiiu'a so'maxare, ca' 'ue ca netanec nqohine' qamiri, ca' qamiri lalamaxarete' ñi qota'a, chicqochigui nqohin so Espíritu Santo só'maq shi'gue ỹachaxantac ñi'maxare. 14So Espíritu Santo só'maq i'taxajñi quiyim seconaxaguit ma'le cá'maq ỹachaxantac ñi qota'a quiyim ỹaanema qomi' ma' ỹomat ñi'maxare quiyim ỹosouec ná'ogue ná'maq lalamaxareteripi, qaiyi qaimaqachintac ñi'maxare queda lecaic.
So Pablo rashiilaxanlec quiñi qota'a quiyim qoỹaanem da la'deenaxanaxa só'maq mashic icoñiguit da na'qaatec
15Vichiguiño' aỹim na'le, na' sa'den da rpi'ỹaxaguii queso qara'gaxala' Jesús, chaqai dá'maq re'xorenataxanaxahi quená'ogue ná'maq lalamaxaret ñi qota'a, 16sqai saxanñi quiyim saantegueshiguim da ña'aachic caqamiri, ca' salecqajantero qamiri quena' ñqouagaxaintac. 17Sashiilatac ñi qota'olec queso qara'gaxala' Jesucristo, ñí'maq chalego lecaic qareta'a, quiyim ỹaanema qamiri ca na'deenaxanaxa chicqo'ot nqai'en so Espíritu, qaiyi 'yiiñii cá'maq ỹachaxañiỹaxarom chaqai quiyim ỹaatqajam 'yiiñichigui dá'maq 'neeta ñi'maxare. 18Ca sashiilatac ñi qota'a quiyim coỹarigui yi ra'deenataxanaxaguii, qaiyi 'yiiñii cá'maq 'neeta ca naquitaxaguii quiyim qaroỹaxañiỹaxaua', chaqai dá'maq chalego lecaic nesallaxa ỹaanec ma'le ñi qota'a quená'maq lalamaxareteripi, 19chaqai chalego lecaic chaqai sqaica ca lqodoc da lquesaxanaxa dá'maq ro'ueenataxantac coqomi' ma' seuaqlec ñi'maxare. Ca' dajo nquesaxanaxa chaqaidaata dá'maq ỹachaxantac ñi qota'a qaica nqai 'nejem nqai'en da lquesaxanaxa, 20na' liỹa nca'laxatec so Cristo queso lelauaxa, ca nqa'xanaxanñi quena loic queda piguim, 21ca' pa'xanashiguim napacalec nqai'en ná'ogue na nquesaxanaxa, ná'maq relaataxanac, nashillipi, na'gaxalateripi hueeto'ot na piguim, chaqai ná'ogue ná'maq 'ue ca qaỹamata'gue, quenauá'maq seuqatauguilo na'xata', loqo'm quenaua naasaho na'xata'. 22Ná'ogue illo'oto naua lapiaate' so Cristo, chaqai chaqaisoota so Cristo ỹaanot ná'maq mashic icoñiguit da na'qaatec quiyim qaisoota 'ec lqahic ná'ogue na'maxare. 23Ma' ná'maq mashic icoñiguit da na'qaatec chaqaina ná'maq loshicmaxa so Cristo, ca naloochiguiñi nqai'en so Cristo. Chaqai so'maxare naloqojonchiguiñi quená'ogue nanchaqaina.
Currently Selected:
Efesios 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.