Deuteronomio 31
31
So Josué qailla'ñi yi loma' so Moisés
1Ca' so Moisés lotqai liỹa retaqaugui sá'ogue so llaalqaipi so Israel, 'naacsa':
2—Ỹim mashic sovite' yaua ciento veinte ñaxari, chaqai tot qaica ca iquesaxanaxa quiyim 'xoic ca ỹouoxoc. Chaqai ñi qara'gaxala' mashic 'naac quiyim se sapacta so lachiugue Jordán. 3Qam ñi qara'gaxala', ñí'maq qota'olec caqamiri, 'auetauec ma'le caqamiri, chaqai nalauajñi ná'ogue na qomyipi quecá'maq loxoỹa'gue, qaiyi shichii ñiỹalec yí'maq na'laua. Ca' ñi Josué chaqaiñi ñí'maq 'auetauec ma'le quiyim ra'gaxalari, ma' chaqaida dá'maq 'naac ñi qara'gaxala'. 4Ñi qara'gaxala' 'ne'tegue ma'le quená'ogue na qomyipi dá'maq 'ne'tegue na'le queso nashi Sehón chaqai queso Og, sauá'maq lashil so amorreoipi, chaqai nimiichiguiñi nqai'en só'maq na'aateripi queso na'laua. 5Ca ma' ñi qara'gaxala' ỹo'uet quiyim qadoxoñiguii ná'ogue na ỹoreta'oguit qomyipi, ca' qamiri 'ñii'tegue na'maxare cá'ogue cá'maq shinac quiyim 'ñii'tegue. 6Ca' 'ñaxachiguilo naua qavilyi, totaxan ro'chii, chaqai se ro'daxachiuec ma' loxoita'guit ca npa'guenaxauahi. Ma' ñí'maq na'gaxala' ñí'maq qota'olec caqamiri ỹalequetauguilo qamiri, se ralachii, chaqai se ro'ueenaxachitañi.
7Ca na' ime, ca' so Moisés roỹaxana so Josué, ca' 'naapega, 'qaatac nqai'en sá'ogue so llaalqaipi so Israel:
—Na'ñaxachi', ma' qami' viqui' ma'le ná'ogue najo qomyipi, viquita ma'le yi 'laua yí'maq ñi qara'gaxala' nallitalta' na' ỹachaxantapeguema na'le saua 'auaxaqa qata'allii. Ca' qami' ná'maq icoñiguit nqai'ñi' ma'le quiyim naalec cajo 'laua. 8Ca ñí'maq qara'gaxala' chaqaiñi ñí'maq 'auetauec ma'le caqami' chaqai riỹa'isac, se ralachi' chaqai se loỹoote'oga qami'. Ca' vichiguiño' totaxan ro'chi'i' chaqai se ileuetapigui qavilli'.
(31.9—33.29 Qaretaqalec so nelaataxanaxaquipi. Dauá'maq co'uaataxante' lapaxaguinataxanaxac so Moisés. So Moisés iuana yi 'laua qaỹachaxantac. So Moisés no'ueenaxat da la'qaatec queso llaalqaipi so Israel.)
Currently Selected:
Deuteronomio 31: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.