Ester 3
3
Israel läducunäpa cuntranmi Aman śhalcun
1Chaypi unayta Agag caśhta Hamedatapa chulin Amantam, lluy puydïnincunap mandäninpä mandacü Asuero ćhulaycula. Chaynüpamari payta altuman juluycula. 2Chaynütac mandacüca camachishanmannümari Aman pasaptin ütac ñawpäninćhu capäcul uyshuycälila jinaman unꞌulapäculapis. Mardoqueoñatacmi ichá mana uyshuyculachu nï unꞌulayculapischu.
3Chaymi mandacücäpa yanapänin puncu täpäcunaca Mardoqueocta nicuyalcan: “¿Imapïtá mandacüca nishanta mana cäsucunquichu?” nil. 4Chaynu muyun-muyun niyaptinpis pay manamá cäsuculachu. Jinaptinmi Amanmanña willaycälälila: “Juda lädu calshi nishayquita mana lulaycunchu” nil. Chaynu willaycula Aman imacta lulananpä caśhantapis licayta munayninwanmari.
5Chaypi juc punćhüña Aman pasayaptinmi Mardoqueo rasunpa mana uyshuycunchu nï unꞌulaycunchu. Chaymi Aman alli-allicta piñacülun. 6Jinaman Juda lädu caśhanta yaćhälulmari Mardoqueollactachu camacaycuyta mana munala, sinuꞌa Asuerop mandacuyninćhu cä lluy Israel läducunätapis “camacaycüśhä” nicuyälam.
7Chaymari Asuerop ćhunca ishcayniyu wata mandacuyninćhu Nisan nishan allaycuynin quillaćhu chüsälälin#Est 9.24-26. Amanpa ñawquin, ima quillaćhu, ima muyunćhu Israel läducunäta camacaycünanpäpis. Chayćhümi yalämun watap camacaynin Adar nishan quillaćhu, ćhunca quimsayu (13) muyunninćhu camacaycünanpä.
8Chaymi mandacü Asuerocta Aman nin: “Taytay, cay mandaśhayqui lluy malcacunäćhümi juc caśhtacuna chiꞌisha jinaman japächacüśha cawsayalcan, camachicuyniquitapis mana cäsucul, japä camachicuyniyu ima. Paycuna mandacuyniquićhu chaynu cawsapäcuśhan manamá allinchu canꞌa. 9Tayta mandacü, cay nishäca ampä allin captinꞌa, chay nunacunaca camacaycüśha cananpä camachicuyta julaycamuy. Yaꞌañatacmi quimsa paćhac quimsa ćhunca walanga (330,000) quïlu illayta uycuśhä, illayniqui ćhulalänanman licaycüca ćhulaycunanpä” nil.
10Niptinmi mandacüca surtijanta#3.10 surtijanta chay timpućhuꞌa surtijaćhümi mandacücäpa sïllun ćhuläśha cala. maquinpi juluculcul uycula Amanman. Amanꞌa Agag lädu Hamedatap chulinmi cala; Israel läducunäpa ćhïnicüninmari cala. 11Chaynu surtijanta uyculmi: “Illayniquitá quiquiquipä ćhulacuy. Chay nunacunätañatacmi ichá munaśhayquimannu imactapis lulälunquiman” nin.
12Niptinmi chay watap allaycuynin quillaćhu, ćhunca quimsa muyunninćhu Aman ayachila mandacücäpa isquirbïnincunacta. Paycunam Aman nishanta isquirbipäcula jatućhä, uchuchä malcacunap puydïnincunaman, paycunap isquirbishanmannu-cama limayninćhu-camamari. Chaynu mandacü Asuerop śhutinćhu lulalculmari surtijanwan sïllala. 13Chay camachishanćhümi nila: “Taytacuna, cay ćhunca quimsayu muyun Adar quillaćhümi, jinantin nasyunćhu cä lluy Israel läducunäta wañuchishun, camacaycüśhun. Cay muyuncällaćhümari awquishtapis, müsuctapis, walmictapis, uchuchällactapis wañulcachil ima cänincunactapis chalacaycälinqui” nil. Cay camachicuytam willacünincunawan, Asuero mandaśhan lluy malcacunäman apachila. 14Chay camachishanca jatun uchuy cä lluy malcacunämanmari apachisha cala, chay muyunpa lluypis listullaña capäcunanpä. 15Chaymi caćhaśhancunaca mandacüca camachishanmannu juclla pasachiculcäla. Susa malcaćhüpis willacachisha captinmari nunacunaca imanaytapis mana atipal sumä manchäśha cacuyalcäla. Amanñatacmi ichá mandacücäwan cusca taycacaycälil upyayalcäla.
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú