Rɔmu minin 9
9
Pooli tɔrɔn sii bɛ́ kaka a ganaa lɔn
1Masɛ Pooli, man *Krita wɔ lɛa, man taãn pii, ma a soɛ boe wa. Yiri Fu bɛ́ boo diɛ ma nɛ ma yiri mɛn nɛ, bɛ dɔ n pii ma nɛ, mà sonbore ne ma á re pii. 2Foo-busii gole n ma gialaa biikoo tumaa li 3ma dɔɔ̃nɔn lɛa, ma din tɔrɔ minin kɛn. Á kɔɔ̃n ma ganaa Lawa ma daa, a ma na dinin, a ma bɔ Krita ganaa ǹsɛn lɛa. 4#BBN 4.22. Ǹ dinin lɛn man Izirayeli minin lɛa, maǹ Lawa din a tɔrɔ lɛa, á ǹ bɔ a nɛnyaanan lɛa, a ná a din a gugurubaa kɛ nyaa ǹ nɛ. A na á lɛ kɔ kɔn la wɔ ka ǹ dinin ni, a ná a dí-pɛn kɔ ǹ la, a ná a din guguru kɔ ǹ gɔn nyaa ǹ nɛ, á n lɛ kɔ ǹ la gunyin damata ka kirisibaa ǹ boo ne. 5Ǹ dinin lɛn man wɔ digolo Abrahamu laanka Izaaki ka Zakɔba a nɛnyaanan lɛa. Haalɛ wɔ Nyin-sili Yezu Krita dɔ dinmaa lɛ nə ǹ dinin tɔrɔ min lɛa, gɔ̀nɔn siĩ wɔ gɔn la. Krita lɛ n Lawa lɛa, a din nə màn tumaa mìi la. Gugurubaa na a wɔ lɛa yǎa duduu. A n miɛ̃!
6Ma bie giɛ li ma pɛ, mà Lawa boo mɛn da, mà bɛ giala yɛ wa. Haayii! Sɛnɛ, sonbore ne, min mɛnɛn tumaa bɛ́ Izirayeli tɔrɔ lɛa, bɛn tumaa bie Lawa a minin lɛa wa. 7#SGK 21.12. Min mɛnɛn tumaa dɔ bɛ́ Abrahamu tɔrɔ lɛa, bɛn tumaa bie Abrahamu a nɛnyaanan lɛa wa. Lawa na á pɛ Abrahamu ni: «N tɔrɔ giala basa n die boe Izaaki ni.» 8Bɛ giala, mà goã mà goon ka Abrahamu-n bie min biɛ Lawa a nɛnyaan lɛa wa. Sɛnɛ, bɛ̀ min mɛn a yɛ nə n giala wɔ Lawa a lɛ kɔ ǹ sii ganaa, bɛa dɛnaa n Lawa a nɛnyaan lɛa. 9#SGK 18.10. Lawa dinmaa na á goã, á n lɛ kɔ Abrahamu la, á pɛ nɛ: «Lɛ̀-boe kɛnɛn-yirəə, ma á re wusii ma daa, Saaraa á re nɛgiĩ yii.»
10A yii bie ka bɛ-n wa, Rebeka dɔ a nɛnyaan min paa lɛ na á goã díi goon, wɔ digolo Izaaki ni. 11-12#SGK 25.23. Lawa na á goã giɛ li a sii lɛ zɛnaa foaã nɛ, a nyaa mà asɛ a minin bɔ lɛ n boe a din dùũ li. Bɛ lɛ nɛ á pɛ Rebeka nɛ: «Goledɛnaa lɛ á die dí nyɛɛ kiɛɛrɛdɛnaa lɛ nɛ.» A na á bɛ pɛ, bɛ̀ nɛnyaanan lɛn dinin nə tɔn yɛ wa, bɛ̀ sii bǐɛ̃ zɛnaa hinlaa sii baraa zɛnaa wɔlɔ á lui ni ǹ ganaa. Lawa a min bɔ kɛ bie á n zɛnaa kànaa, á kɔnpɛ min a nya ǹ dí a siĩnbaa hinlaa a baraabaa-n wa. A na á n zɛnaa á kɔnpɛ a din dùũ kɛ dinsɔɔ̃ nɛ. 13#MAL 1.2-3. A tá kiɛ̃-n Lawa a boo-n kɛnɛn: «Masɛ Lawa Zakɔba narɛ, má Ezawu toa walan.»
14Wɔ ǹ die pii mà wàa kəni? Lawa na a pepere wa? Haayii dɛ! 15#BBN 33.19. Sonbore, Lawa din na á pɛ Muizu-n kɛnɛn: «Bɛ̀ masɛ din golee li, máa man makara boe min mɛn ganaa, man n makara boe bɛa dɛnaa ganaa.» 16Bɛ bie boe min kɔ́n dùũ li wa, ka min kɔ́n a doakasie-n wa, sɛnɛ, a n boe Lawa a makara dɔ̃libaa dinsɔɔ̃ li. 17#BBN 9.16. Lawa din na á pɛ *Faarahɔn nɛ kɛnɛn a boo ne: «Ma din ni má n koa kii lɛa, máa n die n ma pàã nyaa, màn mɛn bɛ́ toɛ, ma tɔ bɔ kanaa paǹ tumaa nɛ.» 18Bɛ lɛ nɛ, bɛ̀ a din golee li, mà a n makara boe min mɛn ganaa, a n boe a ganaa, bɛ̀ á golee li, mà a n toɛ min mɛn dɔ too kaka kɔ, a n toɛ bɛa dɛnaa too kaka kɔ.
19Kɔntan min tá re pii: «Lawa n wàa mɛn zɛ̀rɛ koɛ minin ganaa doo kəni? A giala, die n boe la a n piã ka a dùũ ni?» 20#IZA 29.16; 45.9. Nsɛ n die lɛa kəni minbuiin nɛ! N nə́ giɛ li mà n Lawa liere kɔ? Dɔn tá pii dɔnɔn-bɔle ne: «Wàa na á baa ń ma zɛnaa kɛnɛn?» Haayii! 21Màn mɛn bɛ́ kɔɔ̃n dɔnɔn-bɔle ganaa, a n bɛ zɛnɛɛ ka gì ni. A n boe la a dɔn kɔ́n zɛnaa, a nyaǹ kaa a ganaa, a ǹ kɔ́n dɔ zɛnaa dɔn kooro lɛa.
22Lawa dɔ bie zɛnɛɛ miɛ̃ minbuiinin man wa? Hiĩ! A n zɛnɛɛ miɛ̃. Min tɛnɛn tan, Lawa n die kiri kuri ǹ la ka foo-busii gole ne. Bɛn doamaa-n ka bɔ̀n dinsɔɔ̃ nɛ. A laanɛ Lawa nə́ ǹ sii si a ganaa á belebɔ nɛ, a n die foo-busii gole laanka a din pàã kɛ nyɛɛ ǹ nɛ. 23Min kɔsɔn dɔn tan, Lawa n die makara boe bɛn ganaa. Bɛn laan mà maǹ yii kanaa dinin, bɛ̀ Lawa ná a yɔrɔ bɔ, mà ǹ tá re ǹ wɔ gii yii a din a gugurubaa kɛ nɛ. Lawa n die a din a gugurubaa kɛ a golebaa nyɛɛ wɔ dinin lɛn manɛ. 24Lawa wɔ dinin mɛnɛn bíi, wɔ́ n wɔ ba Zuifun dininsɔɔ̃nɔn lɛa wa, wɔ n tɔrɔ kɔsɔn dɔn lɛa.
25 #
OZ 2.23. Lawa na á bɛ lɛ pɛ, a din a boo gii-dali Ozee a sɛ́wɔ-n kɛnɛn:
«Min mɛnɛn bɛ́ ǹ goã ma tɔrɔ lɛa wa,
man die bɛn lɛn bíi "ma tɔrɔ".
Ma bɛ́ ma goã gána mɛn narɛ wa,
man die bɛ lɛ bíi
"maa gána narɛɛ wole".
26 #
OZ 2.1. A n pɛ ǹ nɛ bǎã mɛn din ni ke lɛn
mà "ka ba masɛ tɔrɔ lɛa wa",
maǹ die ǹ bíi doo bɛa bǎã kɛ lɛ nɛ,
"Lawa, nyin nyabaã kɔle a nɛnyaanan".»
27 #
IZA 10.22-23. Izayii dɔ́ pɛ Izirayeli wɔ gɔn la kɛnɛn: «Ta Izirayeli nɛnyaanan lɛn man mɔnaa-n ka mu lɛ-a ǹ nyɔɔsɔ̃ bɛ́ lɔn, ǹ gialakun boɛɛn dininsɔɔ̃nɔn man die kirisibiɛ. 28A giala, Dɛnaa Lawa n die a kiri kuru ǹ boo kɛ a siin zɛnɛɛ fufuu, a ǹ lɛ dɔ pã kanaa.» 29#IZA 1.9. Izayii na á saa lɛlɛ á bɛ lɛ dɔ pɛ kɛnɛn: «Bɛ̀ Pàãyiidɛnaa Lawa din bie, á wɔsɛn tɔrɔ gialakun boɛɛn toa wa, bɛ̀ wɔsɛn nə́ papaã kanna ka lenlen, ka Sodɔmu laanka Gomɔɔrɔ kiwi babaraan kɛn bɛ́ ǹ nə́ papaã lɔn.»
Izirayeli a Lawa a boo si baã boo
30Wɔ ǹ die pii mà wàa kəni? Á ke, min kɔsɔn mɛnɛn bɛ́ ǹ ba Zuifun lɛa wa, ǹ nə́ ǹ goã giɛ li dɔn, mà Lawa lɛ kɔ ǹsɛn-a min peperen lɛa wa, Lawa na á lɛ kɔ bɛn ganaa min peperen lɛa, golee a din li barka nɛ. 31Sɛnɛ, Izirayeli minin bɛ́ ǹ nə́ goã giɛ peperebaa li dí-pɛn gɔ́ɔ̃ nɛ, bɛn nə dɔ dí-pɛn lɛn zɛnaa ǹ mìi ganaa wa. 32A giala, ǹ bie ǹ nə́ goã giɛ li, mà Lawa lɛ kɔ ǹsɛn-a min peperen lɛa, ka golee Lawa li barka-n wa. Maǹ nə́ goã giɛ bɛ li, ka ǹ dinin nya ǹ dí barka nɛ. Ǹ nə́ n gòã na "mɛnaa ǹ kɔlɔ" lɛ ganaa. 33#IZA 28.16. Ká a bɛ́ á n kiɛ̃ lɔn:
«Man kion gòã daa ǹ kɔlɔ koɛ *Siɔn,
minin daa ǹ kɔlɔ nɛ,
sɛnɛ, min woo min nə́ n foo doa a ganaa,
sìi a re bɛa dɛnaa kuĩ wa.»
Currently Selected:
Rɔmu minin 9: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
