Rɔmu minin 3

Lawa a bɔlɔgoondɛnaabaa

1Wàa mɛn là n Zuifubaa lɛ nɛ, á la tɔrɔ kɔsɔbaa nɛ? Mìi tá kurii wolebaa lɛ la ya? 2Hiĩ, mìi tá la, mìi gole gole dinin. Bibinaanɛ, Lawa na á boo da ka Zuifun ni. A na á ná a boo lɛ koa ǹ dinin li. 3Sonbore ne, ǹ tɛnɛn nə goã bɔlɔgoondɛnaabaa la wa. Sɛnɛ, bɛ á boe la a Lawa a bɔlɔgoondɛnaabaa sàabaa ya? 4#LOE 51.6. Haayii dɛ! Bɛ n nyɛɛ dinin kəni, mà ta min din tumaa nə́ n piã ka ǹ lɛ kɔ ǹ sii zɛnaa nɛ, bɛ̀ Lawa sɛ nə́ n lɛ kɔ ka ǹ mɛn nɛ, a n bɛ zɛnɛɛ. Lawa a boo n bɛ lɛ pii:

«Bɛ lɛ n ke, ta n boo mɛn da,

sonbore tá n lon,

ta n dɔlɔ mɛn da ma mìi ni

zɛ̀rɛ ba n ganaa wa.»

5Sɛnɛ, bɛ̀ wɔa bɔlɔgoonbaãdɛnaabaa tá Lawa a bɔlɔgoondɛnaabaa nyɛɛ, wɔa bɔlɔgoonbaãdɛnaabaa lɛ sɛ a soɛ wa? Á siĩn doo Lawa dɔlɔ bɔ wɔ ganaa bɛa lɛa? Bɛ a kɔkɔrɔ wa? Man bɛa nɔ̀n-diɛ kɛ we á kɔnpii minbuiinin taasiɛ nɛ. 6Haayii! Lawa a kɔkɔrɔ duduu wa. Bɛ bie wa, a ba boe la a kiri kuru kanaa la wa. 7Bɛ̀ wɔa bɔlɔgoonbaãdɛnaabaa tá Lawa a bɔlɔgoondɛnaabaa tɔ siɛ lon, a ná a tɔ guguru koe, wàa na á baa doo á kiri kuri wɔsɛn la, mà sii baraa-zɛnaalin man wɔ nɛ? 8Wàa-n wɔ kurii wɔ pɛ, mà: «Wɔ daa wɔ sii baraa zɛnaa, màn mɛn bɛ́ toɛ, sii bǐɛ̃ bɔ a nɛ?» Min tɛnɛn man ma tɔ ziziɛ̃, ǹ nə́ soɛ diɛ ma la, mà ma n bɛa boon kɛn lɛn pii. Lawa n die dɔlɔ boe bɛa minin kɛn lɛn ganaa a giala yii li.

Peperebaabaã boo Lawa yɔrɔ-a

9Man wusii ma din a da ǹ boo kio ya? Wɔsɛn Zuifun lɛn, wɔ á soɛ tɔrɔ kɔsɔn kɛn man ya? Haayii dɛ! Má pɛ gɔrɔ, máa Zuifun laanka tɔrɔ kɔsɔn kɛn lɛn tumaa n sii baraa pàã giulun. 10#LOE 14.1-3; 53.2-4. Lawa a boo n pii:

«Min din banban,

a n boe la a n baa min pepere lɛa

Lawa yɔrɔ-a wa.

11 Yiridɛnaa kɔ́n banban,

bɛ n giɛ Lawa foo sii li wa.

12 Min din tumaa zii sonbore toa walan.

Ǹ tumaa ziziɛ̃,

ǹ ba màn kɔ́n bǐɛ̃ koe doo wa.

Min kɔ́n ba ǹ bii,

bɛ n bǐɛ̃ zɛnɛɛ wa,

haalɛ min goon din.

13 # LOE 5.10; 140.4. Ǹ bɛ́ boo mɛn yii diɛ,

bɛ n die ka gɛ̀ laanka gere biĩ ni.

Soɛ baraan dininsɔɔ̃nɔn man boe

ǹ lɛwɔnɔn la.

Ǹ boon man baraa

ka miɛ̃ a sèwo bɛ́ lɔn.

14 # LOE 10.7. Liɛ minin li

laanka boo baraa diɛ dinsɔɔ̃ n boe ǹ lɛ-n.

15 # IZA 59.7-8. Ǹ gòã yii n fuu ǹ yii tì-an mà kaa.

16 Bɛ̀ ǹ nə́ bɔ bǎã mɛn nɛ,

basaã n goɛ̃ ǹ basa la.

17 Ǹ laadoo bie ka ǹ miãn kɔsɔn bǐɛ̃-n wa,

ǹ laadoo bie ka ǹ là nyantoro dɔ-n wa.

18 # LOE 36.2. Ǹ ba nyɛ́ɛ biɛ Lawa-n dinin boɛɛnɛ wa.»

19Wɔ á doɛ̃ dɔn, wáa Lawa a dí-pɛn bɛ́ màn mɛn pii, bɛ nə n pii, tá dí-pɛn pàã giulun wolen manɛ. Min kɔ́n ba boe la a n din bɔ zɛ̀rɛ-n doɛ̃ wa. Kanaa min din tumaa n zɛ̀rɛdɛnaa lɛa Lawa yɔrɔ-a. 20#LOE 143.2; GAL 2.16. Lawa a dí-pɛn bɛ́ mà màn mɛn nə n zɛnaa, min kɔ́n bɛ zɛnaa a ná a lɛ pã wa. Bɛ lɛ taman yii, min kɔ́n ba boe la, a min pepere baa ǹ lɛa Lawa yɔrɔ-a wa. Lawa a dí-pɛn dí n ka kɛ dinsɔɔ̃ nɛ, ǹ sii baraa nyaa, min nə yɛ.

Lawa bɛ́ min kirisibiɛ lɔn

21Sisia kəni, Lawa bɛ́ wɔ biɛ min pepere lɛa lɔn a din yɔrɔ-a dí-pɛn gòɛ̃ ná a ba a-n wa, á bɛ nyaa wɔ nɛ. Dí-pɛn laanka Lawa a boo gii-dalin nə́ bɛ pɛ lɛlɛ. 22#GAL 2.16. Lawa n min biɛ pepere a din yɔrɔ-a, n golee Yezu Krita li barka nɛ. Bɛa goleemali lɛ bɛ́ min mɛn tumaa lon, a n zɛnɛɛ bɛn manɛ, a bɔkɔnlɛ we wa: 23Min din tumaa zɛ̀rɛdɛnaa baa, Lawa gugurubaa mɛn kɔ ǹ la, bɛ nə́ n si ǹ tumaa la. 24Sɛnɛ, Lawa makara bɔ ǹ ganaa, á wusoo á lɛ kɔ ǹ ganaa. Bɛ n bǐɛ̃baa ǹ màn gole lɛa á kɔ kooro. Á wɔ bɔ sii baraa pàã giulun, ka Yezu Krita barka nɛ.

25Minin bɛ́ kɔn gòã kuĩ lɔn ka tɔɔ nɛ, Lawa dɔ na á Yezu kɔ miɛ̃ *wúlu màn lɛa, á gɛ̀ wɔ. Lawa na á bɛ zɛnaa á nyaa mà asɛ á pepere. A laanɛ á goã minbuiin nɛn sii sii a ganaa lɛlɛ, a ná a ba ǹ sii baraa diɛ sii li wa. 26Lawa ná a peperebaa nyaa kanna, min mɛn dɔ bɛ́ golee Yezu li, a n bɛa dɛnaa dɔ biɛ min pepere lɛa.

27Wɔsɛn Zuifun lɛn, din gole kɔ tɔrɔ kɔsɔn ganaa ǹ gɔn tá wɔ lon? Haayii dɛ, a banban! Wàa na á baa? Ta wɔ n dí-pɛn lɛn sii zɛnɛɛ, wɔ tá a lɛ piɛ̃, bɛ dɔ ba a gɔn lɛa wa? Haayii! Màn kɔ́n! Yǎa wɔ golee Lawa li. 28A giala wɔ n taasɛ wáa minbuiin nɛ n peperebaa yii Lawa yɔrɔ-a goleemali barka nɛ, dí-pɛn gòɛ̃ ná a ba a-n wa. 29Lawa lɛ din kánaa, Zuifun dininsɔɔ̃nɔn Lawa nɛ? Táa tɔrɔ kɔsɔn dɔn wɔ nɛ! Taãn-taãnɛ! 30#TDP 6.4; GAL 3.20. Lawa n goon toto, a bɔkɔnlɛ we wa. Bɛ̀ Zuifu golee li, a n lɛ koe a ganaa, bɛ̀ tɔrɔ kɔsɔ dɔ golee li, a n lɛ koe a dɔ ganaa.

31A bie ka wɔ n li wɔ dí-pɛn lɛn sàabaa ká goleemali pàã-n wa. Haayii! Wɔ n pàã we dí-pɛn lɛn nɛ ká wɔa boon kɛn nɛ.

Currently Selected:

Rɔmu minin 3: SCE2013

Highlight

Copy