Minin nimi 15
15
Lawa gɔ ǹ mànan
1Dɛnaa Lawa boo da Muizu ni, á pɛ: 2«Boo da Izirayeli minin lɛn nɛ, n pɛ ǹ nɛ kɛnɛn: Bɛ̀ ka dɔ kaa giã ǹ gána lɛ nɛ, gána mɛn lɛ á ke masɛ ń koe ka la, 3ka die ka *wúlu màn tiɛ̃n hinlaa barka da ǹ wúlu mànan bɔ bɛ̀ ka ǹ kɔ masɛ la. Ka ǹ bɔ lɛ-kɔ lɛ pã wɔ lɛa, hinlaa ka dinin nə bɔ ka foo-a ka kɔ, hinlaa ka ǹ bɔ kaa zɔ́nɔn wɔ lɛa. Ka die ka dii bɔ, hinlaa ka sère bɔ, hinlaa bòe, bɛa wúlu màn kɛ lɛ miã wɔ lɛa, a gìĩ ń kɔɔ̃n Dɛnaa Lawa ganaa. 4Bɛ̀ min mɛn tá die bɛa tɔɔ lɛ koe Dɛnaa Lawa la, a *wùsu sonbore kilo sɔɔ ti a ganaa, wùsu mɛn nə́ ke ǹ nə́ yia ka nyɔɔ litiri goon ka talɛɛ nɛ. 5Bɛ̀ sère nɛ nɛ, ka tá biɛ wúlu màn tiɛ̃ lɛa, hinlaa barka da ǹ wúlu màn lɛa, ka duvɛ̃ litiri goon ka talɛɛ ti a ganaa. 6Bɛ̀ sère gɔ̀lɔ̀ nɛ, ka wùsu sonbore kilo sɔrɔ ti a ganaa, wùsu mɛn nə́ ke ka yia ka nyɔɔ litiri paa nɛ, 7ka duvɛ̃ litiri paa dɔ ti a ganaa, Lawa gɔ ǹ màn lɛa, a gìĩ ń kɔɔ̃n Dɛnaa Lawa ganaa. 8Bɛ̀ dii gɔ̀lɔ̀ nɛ, ka tá biɛ wúlu màn tiɛ̃ lɛa, hinlaa wúlu màn lɛa, ka n lɛ-kɔ lɛ piɛ̃ nɛ, hinlaa ka n biɛ barka da ǹ wúlu màn lɛa, 9ka wùsu sonbore kilo manangɔrɔ ti tɔɔ lɛ ganaa, wùsu sonbore mɛn nə́ ke ka yia ka nyɔɔ litiri sɔɔ nɛ. 10Ka duvɛ̃ litiri sɔɔ dɔ ti a ganaa. Wúlu màn tiɛ̃ nɛ, a gìĩ ń kɔɔ̃n Dɛnaa Lawa ganaa. 11Bɛ̀ ka tá wúlu boe ka dii gɔ̀lɔ̀ nɛ, sère gɔ̀lɔ̀ nɛ, sère nɛ hinlaa bòe ne, a gogoonmaa wɔ a zɛnaa ǹ gɔn lɛ n ka bɛ nɛ. 12Ka bɛ́ re wúlu boe ka tɔɔn mɛnɛn nɛ, ta ǹ dinin lɛ n gia, ka a gogoonmaa wɔ zɛnaa ka bɛa yɔrɔ lɛ nɛ. Á kɔɔ̃nɛ ǹ lɛ din goã lɔn. 13Izirayeli nɛn lɛn tumaa doamaa nɛ, ǹ kɔ bɛa wúlu bɔ ǹ gɔnɔn kɛn lɛn lɛ, bɛ̀ ǹ tá wúlu màn tɛmaa gìĩ kɔɔ̃n koe Dɛnaa Lawa la biikoo mɛn li. 14Bɛ̀ min daa tii baa ka li, hinlaa bɛ̀ gùli mɛn nə́ giã ka bii, a lɛ̀ ná a kànaa wa, bɛ̀ á màn tiɛ̃ gìĩ kɔɔ̃n koe Dɛnaa Lawa la a dɔ zɛnaa ka ka dɔn bɛ́ zɛnɛɛ lɔn. 15Sii zɛnaa ǹ yɔrɔ goon dinsɔɔ̃ n die goɛ̃ a tan, zaman lɛ a min tumaa wɔ lɛa, Izirayeli nɛn lɛn nɛ, ka tii mɛn dɔ bɛ́ giã-n ka li. Bɛ n die goɛ̃ sii zɛnaa ǹ gɔn lɛa, biikoo tumaa li, Dɛnaa Lawa yɔrɔ-a, a ná a ba n bɔyɛɛ wa, Izirayeli nɛn lɛn wɔ lɛa, ka tii dɔ nɛ. 16#LWS 24.22. Dí-pɛ tɔrɔ goon, sii yɔrɔ bɔ ǹ gɔn tɔrɔ goon nə die goɛ̃ Izirayeli nɛn lɛn lon, ka tii mɛn dɔ bɛ́ giã nɛ ǹ bii.»
Buuru a kɔ Lawa la
17Dɛnaa Lawa boo da Muizu ni, á pɛ: 18«Boo da Izirayeli minin lɛn nɛ, n pɛ ǹ nɛ: Ma bɛ́ woe ka nɛ, gána mɛn lɛ nɛ, bɛ̀ ka dɔ walan gɔrɔ, 19bɛ̀ ka tá re gána lɛ a buuru soɛ̃, ka Lawa gɔ ǹ wɔ bɔ a nɛ ka kɔ Dɛnaa Lawa la. 20Wùsu-yia mɛn bɛ́ a yia ná a tɔn belebɔ wa, ka die ka mɔ̀mɔ mìi goon da ka bɛ nɛ Lawa gɔ ǹ wɔ lɛa. Ka die ka bɛa mɔ̀mɔ mìi goon lɛ kɔ masɛ la, ka ka bɛ́ tán-kɔsiɛ màn nàn koe ma la lɔn, a duwəə kio. 21Bɛa yɔrɔ lɛ la, ka bɛ́ re mɔ̀mɔ mìi bibinaa mɛn diɛ, ka die ka bɛ lɛ kɔ masɛ la. Bɛa sii zɛnaa ǹ gɔn kɛ lɛ n die goɛ̃ miɛ̃ biikoo tumaa li.
Sii baraa zɛnaa woon ma a sawaa ǹ wúlu màn
22-23«Bɛ̀ á daa yǎa ka n ka sã Lawa a dí-pɛn kɛn ganaa, má ǹ kɔ Muizu la, ka dinin wɔ lɛa ka kaa nɛnyaanan nɛ, a na a bie zɛnaa woon lɛa wa, a kũ a giala kɔ waáraa ganaa a da miɛ̃, 24bɛ̀ zaman lɛ bɔ a zɛnaa siére-a wa, zaman lɛ tumaa doamaa nɛ a dii gɔ̀lɔ̀ baa wúlu màn tiɛ̃ gìĩ kɔɔ̃n lɛa a kɔ Dɛnaa Lawa la. A kɔnpɛ ka a zɛnaa ǹ gɔn nɛ, ǹ doamaa nɛ ǹ wùsu laanka duvɛ̃ ti a ganaa Lawa gɔ ǹ wɔ lɛa, ǹ butumu goon dɔ bɔ sii baraa sawaa ǹ wúlu màn lɛa. 25Lawa a wúlu-bɔle die a sii baraa sawaa ǹ wúlu bɔ Izirayeli zaman lɛ tumaa a lɛa, ǹ sii baraa á re n toɛ ǹ nɛ. A giala ǹ bie ǹ nə́ sii baraa lɛ zɛnaa woon wa, ka bɛ dɔ nɛ, ǹ nə́ daa ka ǹ Lawa gɔ ǹ màn nɛ Dɛnaa Lawa yɔrɔ-a, ka wúlu màn tiɛ̃n laanka ǹ sii baraa sawaa ǹ wúlu màn nɛ, ǹ sã lɛ taman yii. 26Izirayeli zaman lɛ tumaa a sii baraa n die n toɛ ǹ nɛ, min mɛn dɔ bɛ́ gùli lɛa ǹ li, ka bɛ wɔ nɛ. A giala, bɛa sii baraa kɛ lɛ, ǹ nə́ ǹ zɛnaa woon wa, zaman lɛ tumaa sii tá a nɛ. 27#LWS 4.27-31. Bɛ̀ min goon dinsɔɔ̃ sii baraa zɛnaa, a ná a bie á zɛnaa woon wa, a wúlu bɔ ka lɛ̀ goon bòe ne, bɛa sii baraa lɛ taman yii. 28Bɛa sii baraa kɛ lɛ, ǹ dɛnaa ná a bie á zɛnaa woon wa, Lawa a wúlu-bɔle die a na a sawaa ǹ sii zɛnaa Dɛnaa Lawa yɔrɔ-a, a lɛa. Lawa a wúlu-bɔle lɛ die a sii baraa sawaa ǹ sii lɛ zɛnaa a lɛa, a sã á die n toɛ nɛ. 29Bɛ̀ min mɛn sii baraa zɛnaa, a ná a bie á zɛnaa woon wa, ta kɛnaa n ka ǹ dɛnaa nɛ, Izirayeli min lɛa, hinlaa ǹ dɛnaa n gùli lɛa Izirayeli minin lɛn li, dí-pɛ tɔrɔ goon toto n die goɛ̃ ka lon bɛa dɛnaa lɛ wɔ lɛa. 30Sɛnɛ, bɛ̀ min mɛn sii baraa lɛ zɛnaa woone, kɛnaa hinlaa gùli ni, ǹ dɛnaa na á sɔ kɔ Dɛnaa Lawa ganaa. Ka bɛa min lɛ bɔ ka bɔ kun ka a tɔrɔ minin ni. 31Ǹ dɛnaa bɛ́ na á n yii wɔ Dɛnaa Lawa a boo la, a ná a kɔ a gɔn waa ǹ boon kɛn lɛ wa, yǎa ka niɛ ka diɛ. Ǹ dɛnaa a sii baraa lɛ n kuĩ a mìi ni.»
Giĩ goon na á dí nya susu ǹ pii pinaa
32Izirayeli minin lɛn bɛ́ diə gole lɛ nɛ, ǹ nə́ giĩ goon yɛ gɔn yoe *susu ǹ pii pinaa. 33Min mɛnɛn nə yɛ gɔn lɛ yoe, bɛn nə́ tɔ́n kũ ǹ nə́ woo ne Muizu laanka Aarɔn li, zaman lɛ tumaa yɔrɔ-a. 34Ǹ ná a lɛduə̃ kaka, a giala, dɔlɔ mɛn doa bɛ́ nɛ a n bɔ a ganaa, ǹ goã bɛ doɛ̃ bɔrɔ wa. 35Dɛnaa Lawa tɔ́n pɛ Muizu ni: «Ka doamaa nɛ ka giĩ lɛ dɛ. Zaman lɛ tumaa kɔlɔ kaã bɔ a ganaa giã ǹ bǎã lɛ kio.» 36Bɛ kio, zaman lɛ tumaa giĩ lɛ kũ ǹ nə́ soo-n giã ǹ bǎã lɛ kio, ǹ nə́ kɔlɔ kaã bɔ a ganaa, á gã. Dɛnaa Lawa na á goã á pɛ Muizu-n miɛ̃ lɛ-n.
Izirayeli minin wɔ ǹ dɔnkɛ
37Dɛnaa Lawa boo da Muizu ni, á pɛ: 38#TDP 22.12. – Boo da Izirayeli minin lɛn nɛ, n pɛ ǹ nɛ: «Ka die ka pasa kaa kaa wɔ ǹ mɔnaan lɛkoro-a. Bɛa pasa bǎã kɛ lɛ, wɔ ǹ mɔnaa lɛ lɛgon li, ka gɛsɛ tã da a nɛ. Kaa nɛnyaanan man die a zɛnaa siɛ ǹ din la, a wo miɛ̃. 39Bɛa yɔrɔ lɛ la, wɔ ǹ dɔnkɛn mɛnɛn nə́ ke ka pasa ka-a, ka die ka bɛn wɔ. Bɛ̀ ka bɛa pasa lɛ yɛ, ka yiri tá re gisĩ masɛ a dí-pɛn tumaa nɛ, ka kɔ ǹ lɛ. Bɛ á die toɛ ka n ka a re tɔ we ka foo dùũ laanka ka yii dùũ kio, ka màn kɔsɔn guguru kɔ wa. 40Ka bɛ dɔ nɛ, ka tá re n taasɛ ka masɛ a dí-pɛn kɛn tumaa ni ka ǹ lɛ pã, ka goã *yoreene kaa Lawa lɛ wɔn lɛa. 41Masɛ din Dɛnaa Lawa, kaa Lawa lɛ nɛ, kɛ lɛ á ka waa á ka bɔ Ezipti gána nɛ, màn mɛn bɛ́ toɛ a goã kaa Lawa lɛa. Ma din Dɛnaa Lawa n kaa Lawa lɛa.»
Currently Selected:
Minin nimi 15: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
