Lawa a wúlu-bɔlen 24
24
Bolon koa ǹ bǎã
1Dɛnaa Lawa boo da ka Muizu ni á pɛ nɛ: 2A laa Izirayeli minin lɛn ganaa, mà ǹ da *olivie da kɛ a nyɔɔ sonbore kɔ n la, bolon kɛ wɔ lɛa, màn mɛn bɛ́ toɛ, a goã kuĩ miɛ̃ duduu. 3Kion bii kuru kɔn-a ǹ mɔnaa mɛn bɛ́ n koe *lɛ kɔ kɔn la ǹ goo kɛ lɛ, Aarɔn giã bɛ lɛ kio, kɔn yɛ ǹ kion kɛ nɛ, a bolon lɛ a tɛ zɛnaa, màn mɛn bɛ́ toɛ, a kũ miɛ̃ duduu Dɛnaa Lawa yɔrɔ-a, a saa wasamiɛ̃n ganaa, a wo baayɛlɛ yaa. Bɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ba n bɔyɛɛ wa. 4Bolon koa ǹ bǎã ke, ǹ nə́ zɛnaa ka sana nɛ, ka bolonən lɛn koa walan, ǹ kũ Dɛnaa Lawa yɔrɔ-a miɛ̃ duduu.
Lawa gɔ ǹ buuru
5 #
BBN 25.30. Ka *wùsu sonbore saa, ka buuru mìi fulupaa da nɛ, ǹ gogoonmaa a gugurubaa n doe kilo sɔrɔ. 6Ka tabala mɛn lɛ zɛnaa ka sana nɛ, ka buuru lɛ kaa kɔn la bɛ lalan, pàla paa Dɛnaa Lawa yɔrɔ-a: pàla goon buuru mìi sɔrɔ. 7Ka die ka da yon gìĩ kɔɔ̃n da buuru lɛ a kaa kɔn la gogoonmaa lalan. Ka bɛ lɛ tã masɛ Dɛnaa Lawa wɔ lɛa buuru lɛ bǎã nɛ, màn mɛn bɛ́ toɛ, ka yiri goã a nɛ, mà buuru lɛ n masɛ wɔ lɛa. 8Bɛ̀ *susu ǹ pii dɔ lɔn, Izirayeli minin lɛn nə da bɛa buuru lɛ kaa tán Dɛnaa Lawa yɔrɔ-a. Ka doamaa nɛ ka zɛnaa miɛ̃ yǎa duduu. 9#MAT 12.4; MAR 2.26; LUK 6.4. Bɛa buuru lɛ n doe Aarɔn laanka a nɛgiĩn ganaa. Ka bǎã mɛn bɔ ka koa Lawa wɔ lɛa, ka doamaa nɛ ka sɔ̃ walan, a giala, màn yoren yoren ne, ǹ nə́ bɔ Dɛnaa Lawa a wúlu mànan kɛn bii, ǹ nə́ kɔ ka la. Bɛ lɛ n kaa wɔ gii lɛa yǎa duduu.
Lawa tɔ ziziɛ̃ wole a dɔlɔ
10Ǹ kɔn pinaa, zia yoo min paa bii Izirayeli minin giã ǹ bǎã nɛ: Izirayelin lɔ goon a nɛgiĩ n ka goon ne, sɛnɛ, ǹ di n Ezipti min lɛa. Goon kɛ n Izirayeli min lɛa. Ǹ mɛn lɛ bɛ́ ǹ dan dinsɔɔ̃ n Izirayeli min lɛa, asɛ lɛ na á soo a giã ǹ bǎã nɛ, á daa n dɔ Izirayeli minin lɛn bii ǹ giã ǹ bǎã nɛ.
11A da yaa, a dɔ dan nə Izirayeli min lɛa, a tɔ n Selomiti, Dibri a nɛlɔ nɛ. Dibri lɛ n Dan tɔrɔ lɛa. Selomiti a nɛgiĩ lɛ na á Lawa tɔ ziziɛ̃, á sɔ kɔ a ganaa. Bɛ lɛ nɛ, ǹ nə́ kũ ǹ nə́ daa kɔ Muizu la. 12Ǹ nə́ minin koa a li, mà ǹ na a lɛduə̃ taãn-taãnɛ, bɛ̀ ǹsɛn nə baa Dɛnaa Lawa lɛ gɔ́ɔ̃ ǹ boo miɛ.
13Dɛnaa Lawa tɔ́n boo da ka Muizu ni á pɛ nɛ: 14Min mɛn nə sɔ lɛ kɔ, a bɔ giã ǹ bǎã lɛ nɛ, n soo ne. Min mɛn tumaa na a lɛ ma sɔ lɛ koe masɛ Dɛnaa Lawa ganaa, bɛn nə n gɔnɔn kaa a mìi ni, bɛ kio, Izirayeli zaman lɛ tumaa kɔlɔ kaã bɔ a ganaa, ǹ dɛ a gã. 15N die n kɛ pɛ Izirayeli minin lɛn manɛ: Bɛ̀ min mɛn sɔ kɔ a Lawa ganaa, mà ǹ dɛnaa din doamaa nɛ, a n toɛ̃ ka a sii baraa a guĩ ni. 16Kɛ kio, bɛ̀ min woo min Dɛnaa Lawa tɔ ziziɛ̃, ka dɛ a gã. Ta gùli ni hinlaa Izirayeli min ni, ka kɔlɔ kaã bɔ a ganaa, ka dɛ a gã, masɛ tɔ ziziɛ̃ lɛ a lɛa.
17 #
BBN 21.12. Bɛ̀ min nə́ ǹ miã dɛ á gã, yǎa ǹ na a dɔ dii a giɛ̃. 18Bɛ̀ min nə́ ǹ miã a tɔɔ dɛ á gã, a doamaa nɛ a na a dòo saraa ka tɔɔ yiikoonaa nɛ.
19Bɛ̀ min mɛn wɔ̀lɔ̀ da ǹ miã ganaa, ǹ bɛa wɔ̀lɔ̀ lɛ miã da a dɔ ganaa. 20#BBN 21.23-25; TDP 19.21; MAT 5.38. Gù-yiɛ a saraa n ka gù-yiɛ nɛ, yii wɔ n ka yii ni, sɔ wɔ n ka sɔ nɛ. A wɔ̀lɔ̀ mɛn da ǹ miã lɛ ganaa, ǹ bɛ lɛ miã da a dɔ ganaa.
21Bɛ̀ min nə́ ǹ miã a tɔɔ dɛ,
a doamaa nɛ a na a dòo saraa.
Bɛ̀ min nə́ ǹ miã dɛ,
ǹ doamaa nɛ ǹ bɛa dɛnaa dɛ a gã.
22 #
MNS 15.16. Sii yɔrɔ bɔ ǹ gɔn goon doamaa nɛ a goã ka lon, ka dinin Izirayeli minin laanka gùlin wɔ paǹ li. A giala, masɛ din Dɛnaa Lawa n kaa Lawa lɛa.
23Muizu bɛa boo lɛn yɔrɔ pɛ Izirayeli minin manɛ. Bɛ kio, ǹ nə́ sɔ kɔ Lawa ganaa wole lɛ bɔ ǹ nə́ bɔ giã ǹ bǎã lɛ nɛ, ǹ nə́ soo ne, ǹ nə́ kɔlɔ kaã bɔ a ganaa, ǹ nə́ dɛ á gã. Dɛnaa Lawa pɛ Muizu-n lɔn, Izirayeli minin lɛn dɔn man nə́ zɛnaa miɛ̃.
Currently Selected:
Lawa a wúlu-bɔlen 24: SCE2013
Highlight
Copy
Compare
Share
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
