Lawa a wúlu-bɔlen 10
10
Gɛ̀-koa
1Nadaabu laanka Abiu n Aarɔn a nɛgiĩn lɛa. Ǹ kɔn pinaa, didie ná a da yon gìĩ kɔɔ̃n tã ǹ fɔlɔ tàãn saa, á tɛ nàn kaa a nɛ, á da yon gìĩ kɔɔ̃n da la. Bɛa zɛnaa kɛnɛn ke, tɛ soree ne, ǹ nə́ daa-n Dɛnaa Lawa yɔrɔ-a. A da yaa, Dɛnaa Lawa pɛ ǹ nɛ mà ǹ zɛnaa miɛ̃ wa. 2A din bǎã-n gɔrɔ, tɛ bɔ Dɛnaa Lawa li, á ǹ kũ ǹ yii n koo. Ǹ nə́ gã Dɛnaa Lawa yɔrɔ-a walan. 3Muizu tɔ́n pɛ Aarɔn nɛ: kɛ lɛ a lɛa nɛ, Dɛnaa Lawa tɔ́n boo da á pɛ kɛnɛn:
Min mɛnɛn bɛ́ n mɔrɛ ma ganaa,
man li, bɛn nə maa Lawabaa kɛ dɔ̃,
man li máa ǹ ma guguru kɔ
zaman kɛ tumaa yɔrɔ-a.
Aarɔn nə n lɛ da boo-n wa.
4Muizu tɔ́n lɛ dia Aarɔn lɛ dɔɔ̃ngiĩ Uziili a nɛgiĩn kɛn la, Misayeli laanka Elisafan nɛ, á pɛ ǹ nɛ: Ka n zɔ̃ ka daa. Ka ka dɔɔ̃nɔn lɛn geren goa, ka ǹ bɔ Lawa a bǎã sonbore kɛ yɔrɔ-a, ka wo ǹ ne giã ǹ bǎã kɛ kio. 5Ǹ nə́ n zɔ̃ ǹ nə́ dɔ, ǹ nə́ ǹ goa, ka ǹ wúlu-bɔlebaa ǹ mɔnaan nɛ ǹ ganaa, ǹ nə́ woo ǹ ne giã ǹ bǎã lɛ kio, ka Muizu bɛ́ á goã á pɛ lɔn. 6Muizu tɔ́n pɛ a nɛgiĩ min paa kɔsɔn kɛn manɛ, Eleyazaara laanka Itamaara nɛ: Ka baran n mìi ka toa lɔloɛ-n kɔn wa, ka baran kaa mɔnaan tɔtoɛ̃, ka pɛ mà ka n kaa foo ziziɛ̃ nyɛɛ wa. Bɛ̀ ka bɛ zɛnaa, ka á re giɛ̃. Ka á re toɛ dɔn, Lawa foo yoo zaman lɛ tumaa li. Dɛnaa Lawa min mɛnɛn lɛn dɛ ka tɛ nɛ, ka toa ka dɔɔ̃n Izirayeli minin gialakunun tumaa bɛn gɛ̀ wuu pɛ. 7Sɛnɛ, kasɛn kɛn, ka doamaa bie ka soo ka n bɔ kɔn yɛ ǹ kion kɛ-n wa. Bɛ̀ ka bɛ zɛnaa, ka á re giɛ̃. A giala, bɔ a koa ǹ nyɔɔ kɛ na á n kaa ka mìi ni, ǹ nə́ ka bɔ ǹ nə́ ka koa Dɛnaa Lawa a dí-nyalin lɛa. Ǹ nə́ zɛnaa á kɔnpɛ ka Muizu a boo lɛ nɛ.
Yɔ-mii
8Dɛnaa Lawa tɔ́n boo da ka Aarɔn nɛ á pɛ nɛ: 9N din laanka n nɛgiĩn lɛn nɛ, bɛ̀ ka tá re we kɔn yɛ ǹ kion kɛ nɛ, ka nyan toa ka duvɛ̃ wɔ ka lɛ-n wa, ka nyan toa yɔ kakaarɛ kɔn wɔ ka lɛ-n wa. Bɛ̀ ka zɛnaa miɛ̃, ka a re giɛ̃ wa. Bɛ n landa lɛa, ka mìi ni miɛ̃ duduu, ka tɔrɔn tumaa wɔ lɛa, a ná a ba n bɔyɛɛ wa. 10A giala, màn mɛn bɛ́ Lawa wɔ lɛa, màn mɛn bɛ́ a ba a wɔ lɛa wa, ka doamaa nɛ ka boo la ka bɛa bɔkɔnlɛ wɔ, ka boo la ka màn gɔgɔrɛ dɔ laanka màn *yoreen a bɔkɔnlɛ wɔ. 11Dɛnaa Lawa landa boon mɛnɛn tumaa pɛ Muizu ni, mà a ǹ pɛ ka nɛ, ka doamaa nɛ, ka boo la dɔn, ka Izirayeli minin daraa bɛn lɛn tumaa ganaa.
Wúlu bɔ ǹ siĩ
12 #
LWS 6.14-18. Bɛ kio, Muizu pɛ Aarɔn nɛ, a din laanka a nɛgiĩn mɛnɛn nə goã ǹ yii n koo, Eleyazaara laanka Itamaara nɛ: Ka Lawa gɔ ǹ wùsu lɛ saa, Dɛnaa Lawa wɔ gii mɛn doamaa bɛ́ a n tã, ka bɛ bɔ a nɛ, ka tɔn gialakun kɛ da buuru lɛa, yɔ bù ná a ba li wa, ka sɔ̃ *wúlu bɔ ǹ bǎã lɛ genli. A giala, Lawa dinsɔɔ̃ a màn nɛ. 13A ba boe la a n sɔ̃ bǎã kɔsɔ-n wa, yǎa bǎã mɛn bɛ́ á n bɔ á n koa Lawa wɔ lɛa. Kaa wɔ gii n ka bɛ nɛ, Dɛnaa Lawa gɔ ǹ mànan lɛn bii. Dɛnaa Lawa dí mɛn pɛ masɛ nɛ, a din nə ka bɛ nɛ. 14#LWS 7.30-34. Tɔɔn lɛn tìãbii kɛ laanka a nyàa ke Izirayeli minin lɛn nə́ daa nɛ, barka da Lawa nɛ ǹ *wúlu màn lɛa, ka bɛn kɔ Lawa la ǹ sii zɛnaa. Bɛ̀ ka nya, Aarɔn din laanka a nɛgiĩn ni, ka a nɛlɔn dɔn nɛ, ka wo bɛn sɔ̃ bǎã kɛ nɛ, á n bɔ á n koa Lawa wɔ lɛa. A giala, ka doamaa nɛ, maǹ nə́ ǹ kɔ n laanka n nɛnyaanan la. 15Tɔɔ lɛ nyàa kɛ laanka a tìãbii ke, ǹ nə́ kɔ Lawa la, a kɔlen lɛn nə da bɛn laanka a nyɔɔ kɛ nɛ ǹ nə́ tiɛ̃, ǹ nə ǹ kɔ ǹ sii zɛnaa Dɛnaa Lawa yɔrɔ-a. Bɛ kio, bɛa mànan lɛn man doe n din laanka n nɛgiĩn ganaa. Ka Dɛnaa Lawa pɛ lɔn, Bɛ lɛ n die goɛ̃ kaa wɔ gii lɛa yǎa duduu.
16Ǹ butumu mɛn kɔ sii baraa sawaa ǹ wúlu màn lɛa, Muizu nɔ̀n da ka bɛ dɔ a sii ni. A bɛ́ re màn mɛn miɛ̃, mà ǹ ná a siĩ tã. Aarɔn a nɛgiĩn mɛnɛn lɛn nə goã ǹ yii n koo, Eleyazaara laanka Itamaara nɛ, a foo yoo bɛn li. Á tɔ́n pɛ ǹ nɛ: 17#LWS 6.18-20. Butumu kɛ lɛ bɛ́ na á n kɔ Lawa wɔ lɛa, wàa na á baa ka a siĩ sɔ̃ Lawa a bǎã sonbore kɛ-n wa? A giala, Lawa wɔ nɛ. Dɛnaa Lawa din na á kɔ ka la, mà ka zaman lɛ a sii baraa sawaa ǹ wúlu bɔ nɛ, Dɛnaa Lawa yɔrɔ-a, ka ǹ sii baraa saa ka bɔ ǹ mìi ni. 18Ka bɛ́ ka bie ka wɔ ka tɔɔ lɛ mà nɛ kion sonbore kɛ gɔ́ɔ̃-n wa, ka bǎã mɛn bɔ ka koa Lawa wɔ lɛa, bɛ̀ ka doamaa nɛ ka na a siĩ sɔ̃ walan, ka ma bɛ́ má goã má pɛ lɔn. 19Aarɔn tɔ́n pɛ Muizu ni: Ga! Ǹ bɛ́ ǹ nə́ daa ǹ sii baraa sawaa ǹ wúlu màn laanka ǹ wúlu màn tiɛ̃ kɔ Lawa la ǹ mɛn pinaa, sii mɛn masɛ yɛ, n din tá a siére-a. Bɛ̀ man má wusoo doo má sii baraa sawaa ǹ wúlu màn kɛ a siĩ sɔ̃ pelo, bɛ̀ á die kɔɔ̃n koe Dɛnaa Lawa ganaa? 20Muizu boo mɛn ma, bɛ́ kɔɔ̃n kɔ a ganaa.
Currently Selected:
Lawa a wúlu-bɔlen 10: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
