Ozee 4
4
Izirayeli zɛ̀rɛbaa ǹ boo
1Dɛnaa Lawa n kiri we
gána lɛ a minin ganaa.
Izirayeli minin lɛn ka n too kɔ
a da ǹ boo li:
sonbore-pɛ ba gána lɛ-n wa,
kɔn-narɛɛ ba a-n wa,
Lawa-doɛ̃ ba a-n wa.
2Maǹ lɛn baraa bíi kɔn li,
soɛ boe kɔn nɛ,
gɛ̀ dii, wurumu biɛ, naarɛbaa zɛnɛɛ.
Kakaarɛbaa kɛ din la yii ni,
maǹ kɔn ka gɛ̀ dɛ-n miɛ̃ duduu.
3Bɛ lɛ n ke,
lɛ̀ gere á re koe gána lɛ nɛ.
A minin tumaa,
don mànan dɔn laanka bàanan nɛ,
bɛn tá re pɛrɛ mu boro gɔn.
Yìsi mu li ǹ zɔ̀nɔn kɛn dɔn dinin
tá re papaɛ̃.
4Sɛnɛ,
ka nyan kiri wɔ min kɔn ganaa wa,
ka nyan zɛ̀rɛ koa min kɔn
ganaa wa.
Nsɛ wúlu-bɔlen kiã kɛ lɛ,
man kiri we kɔn ka n din ni.
5N tá re talɛɛ penleen tiɛɛ̃nɛ,
n bɛ́ kun ka Lawa a boo
gii-dali mɛn nɛ,
bɛ dɔ din tá re talɛɛ a mɛnaa tèlò-n.
Ma á re n dan Izirayeli
nyin nyɛɛ lenlen.
6Maa minin lɛn man giɛ̃,
ma doɛ̃baã taman yii.
A giala,
ka dinin nə́ n piã ka ma doɛ̃ nɛ,
ma dɔ á re n piɛ̃ ka ka dɔn nɛ,
ka a re maa wúlu-bɔlen biɛ doo wa.
Ka yiri bɛ́ á bɔ
ka kaa Lawa a dí-pɛn kɛn nɛ,
masɛ dɔ yiri á die boe
ka kaa nɛnyaanan kɛn nɛ.
7Wúlu-bɔlen mɔnaabaa n die
ka sii baraa gigiã nɛ.
Ǹ gugurubaa ke,
ma á re bɛ bɔyɛɛ ma baa sìi lɛa.
8Maǹ nə́ n dinin toe
ka maa zaman lɛ a wúlu mànan nɛ.
Maa zaman a sii baraan kɛn,
bɛn man kɔɔ̃nɛ ǹ ganaa.
9Dɔlɔ mɛn bɛ́ re zaman lɛ yii,
a din lɛ n die wúlu-bɔlen dɔn yii.
Ma á re didie a zɛnaa ǹ siin
kɛn dɔlɔ boe a ganaa,
a sii mɛn zɛnaa,
ma á re a dòo sarɛɛ la.
10Ǹ tá re màn-bii,
sɛnɛ ǹ ba re kiɛ̃ wa.
Ǹ tá re kɔrɔbaa zɛnɛɛ,
sɛnɛ, ǹ ba re nɛ yii wa.
A giala,
ǹ nə́ Dɛnaa Lawa guguru kɔ
toa walan.
11Kɔrɔbaa laanka yɔ mi a la
yii-n nə́ ǹ kũ
á ǹ baa gàãnaan lɛa.
12Maa zaman lɛ nə n gɔn koɛ
gɔn dì kɛ la.
A bàlà lɛ n siin yɔrɔ pii ni.
Kɔrɔbaa ǹ taasiɛ nə ǹ yiri siɛ̃.
Bɛ lɛ nɛ, ǹ nə́ n na,
ǹ nə́ n bɔ ǹ Lawa ganaa
maǹ lawa kooron kio.
13Maǹ nɛn bɛ̀ ǹ wúlun bɔbɔ
kelen mìi ni,
maǹ nɛn bɛ̀ ǹ nyɔɔ gìĩ kɔɔ̃n
tã tentenen la,
ka da luu kɛkɛn kɛn giulun ni,
a giala ǹ wúlu n kɔɔ̃nɛ.
Bɛ lɛ na á toa,
kaa nɛlɔn tá kɔrɔbaa zɛnɛɛ,
ka manaan tá naarɛbaa zɛnɛɛ.
14Sɛnɛ,
ma bie re dɔlɔ boe kaa nɛlɔn
lɛn ganaa
ǹ kɔrɔbaa kɛ taman yii wa,
ma bie re dɔlɔ boe ka manaan
lɛn ganaa
ǹ naarɛbaa kɛ taman yii wa.
Maǹ lɔ kɔrɔn kuĩ bɛ̀ ǹ wo ǹ ne tìãlɛa,
lɔn mɛnɛn nə n dinin kɔ
dìn kɔrɔbaa kɛ la,
maǹ wúlu bɔ ǹ mànan bibii kun
ka bɛn nɛ.
«Minin man bɔ̀n biɛ doɛ̃baã taman yii.»
15Izirayeli minin lɛn,
bɛ̀ ka á kaa kɔrɔbaa lɛ zɛnɛɛ,
ka zɛnaa!
Sɛnɛ kasɛn Zudaa minin lɛn,
ka baran n saa ǹ li wa!
Ka nyan wo *wúlu bɔ ǹ bǎã kɛ
nɛ Gilgaali wa,
ka nyan wo Bɛti-Avɛn wa,
sii baraa zɛnaa ǹ kion ke.
Ka nyan nə n liɛ ka
ka Dɛnaa Lawa Yiikoonaa tɔ-n wa!
16Izirayeli minin lɛn man
piã-wɔlen lɛa,
maǹ ka dii piã-wɔlen bɛ́ lɔn.
Sisia kəni Dɛnaa Lawa n die ǹ ne,
buu sɔ̃ ǹ bǎã gole ne ka sère
tenən bɛ́ lɔn.
17Efrayimu tɔrɔn#4.17 Efrayimu tɔrɔn gɔsɛ a lɛ̀ gɔǹ la minin tɔ nɛ. Izirayeli tɔ goon dɔ nɛ. kɛn nə́
n paraa dìn ganaa.
Ka ǹ toa walan!
18Bɛ̀ ǹ nə́ yɔ lɛ mi ǹ nə́ kã gɔrɔ,
kɔrɔbaa na á golee.
Ǹ goledɛnan kɛn man giɛ sìi li a tɔ-a.
19Piɛ̃ á re ǹ siɛ.
Ǹ wúlu mànan kɛn lɛn tá re
sìi diɛ ǹ ganaa.
Currently Selected:
Ozee 4: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
