Ezekieli 44
44
Siin mɛnɛn bɛ́ toɛ min nə boo la a wɔ Lawa a kion
1Giĩ lɛ wusoo á n bɔyaa ka ma nɛ, á daa Lawa kion a kiɛnlɛ kɛ lɛ-a, ǹ mɛn lɛ yɔrɔ bɛ́ dia-n lɛ̀giala gɔn la. Wɔ́ woo yaa tiɛ̃ nɛ. 2Dɛnaa Lawa tɔ́n pɛ ma-n kɛnɛn: «Bɛa kiɛnlɛ lɛ n die goɛ̃ tiɛ̃-n kɛnɛn, min doamaa bie a bũ wa. Min kɔsɔ doamaa bie a wɔ ka bɛa kiɛnlɛ lɛ-n wa, a giala, Dɛnaa Lawa, Izirayeli minin Lawa lɛ na á wɔ nɛ. A doamaa nɛ a goã tiɛ̃-n. 3Sɛnɛ, goledɛnaa lɛ sɛ, a goledɛnaabaa taman yii, bɛ á re giɛ̃ tán walan, a màn bii tán masɛ Dɛnaa Lawa yɔrɔ-a. A n die we ka dàã li a kiɛnlɛ kɛ nɛ, a wusoo a soo ka bɛ lɛ nɛ.»
4Bɛ kio, giĩ lɛ ma kũ á bɔ ka gɔsɛ a lɛ̀gɔn la a kiɛnlɛ kɛ nɛ, á wɔ ka ma nɛ, yǎa Lawa a kion kɛ yɔrɔ-a. Ma bɛ́ giɛ, bɛ̀ Dɛnaa Lawa a gugurubaa á ke, a gialaa kion lɛ piɛ̃. Má tɔ́n bɔ má mɛnaa tán ma lɛ la. 5Dɛnaa Lawa tɔ́n nə n toa ma ganaa kɛnɛn: – Minbuiin a nɛ, n yii dɔraa taãn-taãnɛ. Ma bɛ́ re landan mɛnɛn tumaa pii n ni Dɛnaa Lawa a kion lɛ wɔ paǹ li, ka a dí nya ǹ gɔn tumaa nɛ, n yii bũ doɛ̃, n too kɔ doɛ̃. Ma bɛ́ re boo mɛn tumaa pii n ni Lawa a kion lɛ a wɔ ǹ kiɛnlɛn laanka a soo ǹ kiɛnlɛn wɔ paǹ li, n doa n nə n yiri kɔ bɛn li a tɔ-a.
Tiin doamaa bɛ́ nɛ ǹ sii mɛn zɛnaa
6N die n pɛ Izirayeli tɔrɔn piã-wɔlen lɛn manɛ, mà masɛ Dɛnaa Lawa n ke pii: «Izirayeli tɔrɔn lɛn, kaa sii bɔbɔnɛɛ zɛnaa lɛ la yii-n kəni. 7Ka bɛ́ ka goã *wúlu màn kɛ koe ma la ǹ mɛn waáraa, màn nyɔɔ laanka màn mà kɛ nɛ, tɔrɔ kɔsɔn kɛn soroman lɛa ma bɔlɔ tii, ka n ka goã nɛn bɛ̀ ka bɛn kũ ka wɔ ǹ nɛ maa kion sonbore lɛ nɛ, ka *gɔ̀ da a ganaa. Kaa sii bɔbɔnɛɛn lɛn man nə́ toa, lɛ kɔ kɔn la mɛn bɛ́ ma laanka ka bii, bɛ́ ziziɛ̃. 8Ka doamaa bɛ́ nɛ ka dí mɛn nya maa màn sonboren kɛn wɔ lɛa, ka bɛ nya wa. Sɛnɛ, ka ǹ ká tɔrɔ kɔsɔn bɔ, ká ǹ kaa bɛa dí lɛ a nyɛɛ ganaa ka bǎã nɛ.» 9Bɛ lɛ taman yii, Dɛnaa Lawa n kɛ pii: «Tɔrɔ kɔsɔn lɛn soroman lɛa, ǹ mɛnɛn lɛn bɛ́ ǹ nə́ ma bɔlɔ tii, bɛ kɔn ba re we masɛ a kion sonbore kɛ-n doo wa, haalɛ ta ǹ dɛnaa n giã nɛ Izirayeli minin kɛn bii.
Levii tɔrɔn doamaa bɛ́ nɛ ǹ siin mɛnɛn zɛnaa
10«Sɛnɛ *Levii tɔrɔn kɛn ǹ nə́ ma toa walan, ǹ nə́ wusoo ǹ nə́ n bɔ ma kio, ǹ nə́ kɔ ǹ dìn kɛn kio lɛ ka Izirayeli tɔrɔ gialakunun kɛn bɛ́ lɔn, ǹ tá re n toɛ̃ ka ǹ sii baraa a guĩ ni. 11Ǹ tá re goɛ̃ maa kion kɛa dí-nyalin lɛa, bɛ̀ ǹ na a kiɛnlɛn lɛduə̃. Ǹ dinin man die wúlu màn tiɛ̃n kɛn tɔɔn laanka wúlu màn kɔsɔn kɛn tɔɔn dii, zaman lɛ wɔ lɛa. Ǹ dinin man die golee, bɛ̀ ǹ dí nya zaman lɛ nɛ. 12A giala, ǹ nə́ wúlu bɔ dìn ganaa zaman lɛ a lɛa, ǹ nə́ Izirayeli minin lɛn nyanaa, ǹ nə́ ǹ kaa sii baraa nɛ. Bɛ lɛ na á toa masɛ Dɛnaa Lawa a da ǹ boo á ke: Ǹ tá re n toɛ̃ ka ǹ sii baraa a guĩ ni. 13Ǹ doamaa bie ǹ nə n mɔrɔ ma ganaa doo, mà maǹ Lawa a wúlu bɔle baa ǹ dí nyɛɛ wa. Mànan mɛnɛn bɛ́ ǹ nə́ ǹ koa ma nɛ, bɛn nɛ ka bǎã sonbore sonbore kɛ nɛ, ǹ doamaa bie ǹ nə n mɔrɔ bɛn ganaa wa. Ǹ sìi da ǹ siin laanka sii bɔbɔnɛɛn mɛnɛn zɛnaa, ǹ tá re n toɛ̃ ka a guĩ ni. 14Man die ǹ koɛ kion lɛ a dí-nyalin lɛa, sii mɛn tumaa bɛ́ n zɛnɛɛ a nɛ, ǹ bɛ yɔrɔ bɔ.
Lawa a wúlu-bɔlen doamaa bɛ́ ǹ siin mɛnɛn zɛnaa
15«Lawa a wúlu-bɔle Levii tɔrɔn kɛn sɛn Sadɔki tɔrɔn lɛa, a laanɛ Izirayeli minin gialakunun kɛn nə́ wusoo ǹ nə́ n bɔ ma kio, bɛn nə́ maa kion lɛ a dí nya sɔnbɔraanɛ. Bɛn dininsɔɔ̃nɔn man die boe la ǹ nə n mɔrɔ ma ganaa, ǹ dí nya ma nɛ, ǹ wúlu mànan kɛn nyɔɔ laanka ǹ mà kɔ ma la. Ma din Dɛnaa Lawa a da ǹ boo ne. 16Ǹ dininsɔɔ̃nɔn man die we maa kion lɛ nɛ. Ǹ dininsɔɔ̃nɔn man die n mɔrɛ maa goo kɛ ganaa, ǹ dí nya ma nɛ, ma màn mɛn dɔ pɛ a dí lɛ wɔ paǹ li, ǹ bɛ tamaa. 17#BBN 28.39-43; LWS 16.4. Ǹ mɔnaa guguru sonboren kɛn wɔ, ǹ tɔn wɔ ka sumu gɔ́ɔ̃ a kiɛnlɛn kɛn nɛ. Bɛ̀ ǹ tá re dí nyɛɛ sumu gɔ́ɔ̃ a kiɛnlɛn lɛn lɛ-a ka kion lɛ gɔ́ɔ̃ nɛ, ǹ baran sère ka mɔnaan kɛn wɔ wa. 18Ǹ mɔnaa guguru sonbore gɔnɔn yii ǹ mìi ganaa, ǹ mɔnaa guguru bɛ̀rɛ̀n dɔn wɔ ǹ bɔsɔ̃-n. Sɛ̀fuu lɛ taman yii, ǹ baran maabɛlɛ yii ǹ bɔsɔ̃-n wa. 19#LWS 16.23. Bɛ̀ ǹ nə́ nya ǹ nə́ soe die zaman lɛ li sɔmɔ gɔ́ɔ̃ nɛ, ǹ dí nya ka mɔnaan mɛnɛn lɛn nɛ, ǹ bɛn waa ǹ nə ǹ kaa tán kion nɛn lɛn gɔ́ɔ̃ nɛ, ǹ dɔnkɛn kɔsɔn goa, ǹ nə ǹ wɔ. Ǹ zɛnaa miɛ̃ màn mɛn bɛ́ toɛ ǹ baran sii saa ǹ zaman lɛ gɔ nɛ, ka ǹ wɔ ǹ mɔnaan kɛn nɛ wa. 20#LWS 21.5. Wúlu-bɔlen lɛn baran n mìi kɔɔ̃ wa. Ǹ nyan toa ǹ mìi ka sɔsɔrɔ kɔ a la yii-n wa, sɛnɛ, ǹ kuru a zɛnɛ wɔlɔ lɛ. 21#LWS 10.9. Bɛ̀ wúlu-bɔle mɛn tá re we Lawa a kion lɛ a sumu gɔ́ɔ̃ kɛ nɛ, a nyan toa a duvɛ̃ wɔ a lɛ-n wa. 22#LWS 21.7,13-14. Lɔ mɛn bɛ́ lɔ giɔɔrɔ lɛa, hinlaa ǹ mɛn zuũ bɛ́ á loo, ǹ nyan toa ǹ bɛ wɔ lɔ lɛa wa. Yǎa nɛniɛ mɛn bɛ́ a giĩ doɛ̃ wa, Izirayeli tɔrɔ lɛa. Wúlu-bɔle mɛn bɛ́ á gã, ǹ tá boe la dɔn ǹ bɛa lɔ saa. 23#LWS 10.10. Màn mɛn bɛ́ Lawa wɔ lɛa, màn mɛn bɛ́ a ba a wɔ lɛa wa, màn *yoreen laanka màn gɔgɔrɛ nɛ, ǹ tá re maa zaman lɛ darɛɛ bɛn bɔkɔnlɛ ganaa. 24Bɛ̀ sii tá minin bii, ǹ dinin lɛn doamaa nɛ, ǹ na a yɔrɔ bɔ. Ǹ doamaa nɛ ǹ na a yɔrɔ bɔ a kɔnpɛ ka maa sii yɔrɔ bɔ ǹ gɔn nɛ. Ma dí-pɛn laanka landa boon mɛnɛn kɔ ǹ la, ǹ maa zɔ́nɔn kɛn tumaa zɛnaa a kɔnpɛ ka bɛn nɛ, ǹ maa susu ǹ piin kɛn tamaa masɛ wɔn lɛa.
25 #
LWS 21.1-4. «Lawa a wúlu-bɔle baran wo gere la wa, a kiɛ̃ a gɔ̀ da a din ganaa. Yǎa ǹ di gere, hinlaa ǹ dan wɔ, hinlaa a nɛgiĩ wɔ, hinlaa a nɛlɔ wɔ, ǹ dɔɔ̃n hinlaa ǹ miãnɛn wɔ, ǹ mɛn bɛ́ a tɔn wɔ giĩ li wa. 26Bɛ̀ ǹ mɛn gɔ̀ da a din ganaa miɛ̃, bɛ̀ á gɔ̀ bɔ a din ganaa ǹ mɛn pinaa, a n yii da yǎa lɛawaa sɔbaa a tɔn dí nya. 27A bɛ́ re we Lawa a kion lɛ a sumu gɔ́ɔ̃ kɛ nɛ ǹ mɛn pinaa mà a n dí nyɛɛ a nɛ, a màn dɛ sii baraa sawaa ǹ wúlu màn lɛa. Ma din Dɛnaa Lawa a da ǹ boo ne. 28#MNS 18.20. Wúlu-bɔlen lɛn wɔ gii-n ka maa dí-nyalibaa kɛ nɛ. Bɛ lɛ nɛ, ǹ baran bǎã kɔ ǹ la Izirayeli gána kɛ-n wa. Ma dinmaa Lawa nə ǹ wɔ gii lɛa. 29#MNS 18.8-19. Ǹ dinin man die Lawa gɔ ǹ mànan kɛn bii, ǹ sii baraa sawaa ǹ wúlu mànan kɛn siĩ sɔ̃. Bɛ̀ ǹ nə́ màn mɛn koa maa wɔ lɛa yǎa duduu, bɛ á re ǹ wɔ biɛ. 30Màn tumaa a lɛ bibinaa sonbore ne, màn mɛn tumaa a sonbore bɛ́ n boe ka gɔn mànan tumaa nɛ Lawa wɔ lɛa, bɛn man doe wúlu-bɔlen lɛn ganaa. Ka die ka kaa *wùsu sonbore kɔ wúlu-bɔlen lɛn la, màn mɛn bɛ́ toɛ ma barka da kaa kion ganaa. 31#LWS 22.8. Bɛ̀ màn mɛn gã, hinlaa ta mànan man nə́ kũ, ta bàan nɛ hinlaa ta don màn nɛ, Lawa a wúlu-bɔle doamaa bie a bɛ sɔ̃ wa.
Currently Selected:
Ezekieli 44: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
