Bɔ bɛ̀rɛbaa nɛ 32

Lɛ kɔ kɔn la kɛa ziziɛ̃

(32.1—34.35)

Sana diin nɛ boo

1 # NDS 7.40. Zaman lɛ yɛ mà Muizu belebɔ kele lɛ la, a ná a ba gisĩ wa. Ǹ nə́ n lɛ sɔkɔn Aarɔn li, ǹ nə́ pɛ nɛ: «Yoo! N dìn zɛnaa n kɔ wɔsɛn la, dìn mɛnɛn bɛ́ re wɔ nyɛɛnaan boe, a giala, Muizu mɛn soo wɔ nɛ á wɔ bɔ Ezipti gána nɛ, sii mɛn yɛ, wɔ ba doɛ̃ wa.»

2Aarɔn pɛ ǹ nɛ: «Sana mànan kɛn lɛn kaa lɔn toon ne, ka kaa nɛgiĩn laanka kaa nɛlɔn wɔn nɛ, ka bɛn waa, ka da ǹ nɛ ma li.»

3Zaman lɛ tumaa nə́ ǹ too ne ǹ sana mànan waa, ǹ nə́ daa ǹ nɛ Aarɔn li. 4#KIIN1 12.28; NDS 7.41. Aarɔn bɛa sana kɛ lɛ si ǹ gɔn, á yo á zɛnaa diin nɛ nyí lɛa. Ǹ nə́ tɔ́n pɛ kəni: «Haya, Izirayeli minin lɛn! Kaa lawa lɛ á ke, ǹ mɛn lɛ ka bɔ Ezipti gána nɛ, á soo ka nɛ!»

5Aarɔn bɛ lɛ yɛ, yǎa a *wúlu bɔ ǹ bǎã dɔ màn nyín lɛ yɔrɔ-a, á tɔ́n pɛ kɛnɛn: «Biɛ̃, zɔ́n tán Dɛnaa a lɛa.»

6 # KOR1 10.7. A lɛawaa sonbore, ǹ yoo tán maa-n gɔrɔ, ǹ nə́ *wúlu màn tiɛ̃n bɔ, ǹ nə́ bii kɔɔ̃n kɔ kɔn wúlu mànan bɔ. Zaman lɛ giã tán á màn bii, á màn mi, bɛ kio, á yoo á sàn kɔ.

7Dɛnaa boo da Muizu ni, á pɛ:

– Gisĩ fufuu. A giala, n zaman lɛ sàabaa, zaman kɛ lɛ, ń soo ne ń bɔ Ezipti gána nɛ. 8Á ke, ma zii mɛn nyaa ǹ nɛ, ǹ nə n foo kũ, ǹ nə́ goã bɛ la wa, ǹ nə́ ke ǹ nə́ kanaa ǹ nə́ n bɔ la. Á ke, ǹ nə́ diin nɛ nyín zɛnaa, ǹ ná a guguru kɔ, ǹ nə́ wúlu mànan dɛ a ganaa. Ǹ nə́ pɛ kɛnɛn dɔn dinin: «Haya, Izirayeli minin lɛn, kaa lawa lɛ á ke, ǹ mɛn lɛ ka bɔ Ezipti gána nɛ, á soo ka nɛ.» 9Á siĩni! Má zaman kɛ lɛ dɔ̃ kəni! Tɔrɔ too kaka-a nɛ! 10Sisia kəni, a toa ma daa. Maa foo-yoo gɔ́ɔ̃ nɛ, man die ǹ dii ma ǹ nya. Bɛ kio, ma á re zɛnɛɛ, zaman gole bɔ Muizu din ni.

11 # MNS 14.13-19. Sɛnɛ, Muizu Dɛnaa Lawa nyankɔ, mà a n foo basã. Á pɛ nɛ:

– Dɛnaa, wàa na á baa, n foo-yoo gɔ́ɔ̃ nɛ, n nə yui n din a zaman kɛ gialaa, n din bɛ́ ń zaman mɛn bɔ Ezipti gána nɛ, ń soo ne ka n din pàã gole kɛ nɛ? 12Dɛnaa, bɛ̀ ń zɛnaa miɛ̃, Ezipti gána minin kɛn tá re pii, mà baraabaa a lɛa nɛ, n soo ǹ ne, màn mɛn bɛ́ toɛ, n nə ǹ dɛ kelen la, n nə ǹ tɔ papaã n bɔ kanaa. Dɛnaa, sabara baa n toa n foo basã, n baran baraa zɛnaa n din a zaman kɛ-n wa. 13#SGK 17.8; 22.16-17. Dɛnaa, n yiri gisĩ Abrahamu ni, Izaaki ni ka Zakɔba nɛ. N yiri gisĩ n din a liɛ kɛ nɛ, ń wɔ ǹ nɛ ka n din tɔ nɛ. Táa ma nə́ n pɛ ǹ nɛ kɛnɛn: «Ma á re ka tɔrɔn mɔnɛɛ ka lon a leeren bɛ́ lɔn, ma gána tumu mɛn boo da ke, ma á re bɛ koe kaa nɛnyaanan la, a ǹ wɔ baa yǎa duduu.»

14Dɛnaa bɛ́ á goã mà a n die baraa mɛn zɛnɛɛ a din a zaman kɛ nɛ, á wusoo bɛ kio.

15Muizu gisĩ kəni, á n bɔ kele lɛ la, ka lɛ kɔ kɔn la ǹ boon kɔlɔ-sɛlɛɛ màn paa lɛ nɛ a gɔn. Boon lɛn man kiɛ̃ nɛ kɔlɔn lɛn gogoonmaa paǹan paanan ganaa. 16Lawa din na á kɔlɔn lɛn sɛlɛɛ a dí nya, a din ná a ná a sɛ́wɔ kiɛ̃ ǹ ganaa. 17Zozoe bɛ́ á zaman lɛ a lɛ-dɛ wuu ma, á pɛ Muizu ni: «Zia n die goɛ̃ zaman lɛ a giã ǹ bǎã-n dɛ!»

18Sɛnɛ, Muizu pɛ: «Haayii! Gɔ̀lɔ̀baa yɛ zia la ǹ lɛ-dɛ bie wa, fɔ̃ zia la ǹ lɛ-dɛ dɔ bie wa. Ma bɛ́ màn mɛn miɛ ke, loe lɛn nɛ.»

19Ǹ bɛ́ ǹ nə́ diri giã ǹ bǎã lɛ la, Muizu yii diin nɛ nyín lɛ yɛ, ka zaman lɛ nɛ, bɛ̀ gialaa biɛ. A foo yoo parsiini, á kɔlɔ-sɛlɛɛn lɛn kũ a gɔn, á ǹ zũ, á ǹ yɔyɔrɛ tán kele lɛ genli. 20Ǹ diin nɛ nyán mɛn lɛ zɛnaa, á bɛ saa, á da tɛ-n, a ná a gialakun kɛ lɔ mɔmɔnɔ, á kaa mu li, á kɔ Izirayeli nɛnyaanan lɛn la ǹ nə́ mi. 21Á tɔ́n nɔ̀n da Aarɔn la: «Zaman kɛ na á wàa zɛnaa n nɛ, ń lɛ kɔ ń sii baraa gole taãn-taãn da ǹ mìi ni?»

22Aarɔn ná a lɛ si:

– Diɛ̃giĩ, ma nə n nyankoe, n foo baran yoo wa. N dinmaa á doɛ̃, mà zaman kɛ lɛ yii á fuu, a sii baraa zɛnaa. 23Maǹ nə́ pɛ ma nɛ: «Dìn zɛnaa n kɔ wɔsɛn la, dìn mɛnɛn bɛ́ re wɔ nyɛɛnaan boe, a giala, Muizu mɛn soo wɔ nɛ á wɔ bɔ Ezipti gána nɛ, sii mɛn yɛ, wɔ ba doɛ̃ wa.» 24Má tɔ́n pɛ ǹ nɛ kəni máa sana n die lon? Ǹ nə́ ǹ waa ǹ toon ne, ǹ nə́ daa ǹ kɔ ma la. Má sana lɛ kaa tɛ-n, á yo, bɛ na á diin nɛ kɛ baa.

Zaman lɛ doamaa bɛ́ ka dɔlɔ mɛn nɛ

25Muizu yɛ, mà Aarɔn na á toa, zaman lɛ ná a din dùũ sii zɛnaa, a n die ǹ zɔ́ɔn yaa wɔ ǹ ganaa gòã biɛ. 26Á tɔ́n woo golee giã ǹ bǎã lɛ a kiɛnlɛ-a, á pɛ: «Dɛnaa Lawa wɔn nə da ma li.»

Levii tɔrɔ minin tumaa daa n sɔkɔn a li. 27Á pɛ ǹ nɛ:

– Izirayeli a Dɛnaa Lawa lɛ n pii kɛnɛn: «Ka gogoonmaa gɔya sa da ka wàã li, ka n bibiə̃, ka bɔ kionən ne kaa giã ǹ bǎã lɛ nɛ, ka ka dɔɔ̃nɔn dɛ, ka giaáran nɛ, ka miãkɛnɛn nɛ.»

28Levii tɔrɔ minin lɛn nə́ Muizu lɛ si. Zaman lɛ bii, minbuiin duu sɔɔ (3 000) miã na á gã. 29Muizu tɔ́n pɛ Levii tɔrɔ minin lɛn man doo: «Pelo, ka lɛ kɔ mà Dɛnaa din na á ka koa a dí a lɛa sonbore. Ka bɛ́ ka zɛnaa dinin, ka kɔ́n nə n nyɛnaa kaa nɛgiĩ hinlaa ka dɔɔ̃ngiĩ dɛ a gã-n wa. Dɛnaa din die a na a barka wɔ ka nɛ pelo.»

Muizu Lawa nyankɔ lɔn mà a Izirayeli a sã toa nɛ

30A lɛawaa, Muizu pɛ zaman lɛ nɛ: «Ka n ka sii baraa gole taãn-taãn zɛnaa. Sɛnɛ, man die dii kele lɛ la, ma wo Dɛnaa li kanna, kɔntan á re masɛ a nyankɔ sii, a kaa sã toa ka nɛ.»

31Muizu wusoo bɛa yɔrɔ kɛ lɛ la, á woo Dɛnaa li, á pɛ nɛ: «Dɛnaa, kaarɛ! Zaman kɛ na á sii baraa gole taãn-taãn zɛnaa. Maǹ nə́ lawa zɛnaa ka sana nɛ ǹ dinin manɛ. 32#LOE 69.29; SNS 3.5. Sɛnɛ kanna, masɛ nə n nyankoe, bɛ̀ ń boe la, n sii baraa gole kɛ toa ǹ nɛ. Dɛnaa, bɛ̀ a ba n zɛnɛɛ miɛ̃ wa, n masɛ tɔ tuturu, n bɔ yiikoonaabaa ǹ sɛ́wɔ kɛ lɛ nɛ, n din kiɛ̃.»

33Dɛnaa ná a lɛ si: «Haayii, ma ba n tɔ tuturi wa! Min mɛnɛn nə sã masɛ ganaa, man bɛa dɛnan dininsɔɔ̃nɔn tɔ tuturi, ma bɔ maa sɛ́wɔ nɛ. 34Kanna kəni, woo! Zaman kɛ lɛ nyɛɛnaan bɔ, ma bǎã mɛn pɛ n nɛ, wo-n walan. Ma din a lon a dia dí-a wole n die tɔ we n nyɛɛnɛ. Sɛnɛ, bɛ̀ ma yoo ǹ mɛn pinaa, ma á re dɔlɔ boe ǹ ganaa ǹ sii baraan lɛa.»

35Sonbore, Dɛnaa dɔlɔ bɔ zaman lɛ ganaa, ǹ diin nɛ nyín kɛ lɛ a lɛa, ǹ Aarɔn nyankɔ, mà a ǹ mɛn lɛ zɛnaa.

Currently Selected:

Bɔ bɛ̀rɛbaa nɛ 32: SCE2013

Highlight

Copy