Bɔ bɛ̀rɛbaa nɛ 28

Wúlu-bɔlen mɔnaan

1«Lawa mà Muizu ganaa: N gologiĩ Aarɔn laanka a nɛgiĩn bɔ Izirayeli minin bii, n nə ǹ koa n din li, màn mɛn bɛ́ toɛ, ǹ masɛ a dí nya. Aarɔn din laanka a nɛgiĩn kɛn nɛ: Nadaabu ni ka Abiu ni, Eleyazaara nɛ ka Itamaara nɛ. 2Mɔnaa sonboren zɛnaa ǹ gologiĩ Aarɔn wɔ lɛa, gugurubaa laanka zín sii lɛa. 3Ma din sii-doɛ̃ kɔ min mɛnɛn la, n dɔ boo da bɛa sii-dɔ̃len kɛn lɛn nɛ. N pɛ ǹ nɛ, ǹ Aarɔn a mɔnaan lɛn zɛnaa, màn mɛn bɛ́ toɛ, Aarɔn lɛ nə n koa a gɔrɔn, a masɛ a dí nya. 4Ǹ bɛ́ re mɔnaan mɛnɛn zɛnɛɛ, bɛn nə́ ke: Tìãbii zéwo ke, ka dí nya ǹ mɔnaa kɛ nɛ, ka dɔnkɛ sasa nɛ, ka dɔnkɛ boɛɛn sonbore ne, nyaǹ ná a ganaa, mìi yii ǹ mɔnaa gɔn nɛ, ka binbin yii ǹ wɔ nɛ. Ǹ doamaa nɛ, ǹ bɛa mɔnaa sonboren kɛn lɛn zɛnaa n din gologiĩ Aarɔn wɔn lɛa, ka a nɛgiĩn ni, màn mɛn bɛ́ toɛ, a masɛ a dí nya. 5Mɔnaa dí-nyalin lɛn nə dí nya ka sana nɛ, ka gɛ̀sɛ korebore ne, ka a tã nɛ, ka a tã zenzen ne, ka mɔnaa guguru sonbore ne.

6«Ǹ dí nya ǹ mɔnaa lɛ sɛ zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, ka a tã nɛ, ka a tã zenzen ne, ǹ toa ǹ na a dí nya doɛ̃. 7Yii ǹ biɛ màn paa n die goɛ̃ dí nya ǹ mɔnaa lɛ lɛkoron ganaa, bɛ̀ á n wɔ, a n kũ ka bɛn nɛ. 8Bɛa yii ǹ biɛn kɛn lɛn man die goɛ̃ kɔn ka dí nya ǹ mɔnaa lɛ din ni, zɛnaa-n ka a din màn tɔrɔ goon lɛ nɛ: mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, a tã zenzen ne. 9N kɔlɔ sonbore màn paa saa, n Zakɔba a nɛgiĩ fulupaa kɛ tɔ kiɛ̃ ǹ ganaa. 10N tɔ lɛ a sɔrɔ kiɛ̃ kɔlɔ lɛ a bibinaa kɛ ganaa, n sɔrɔ gialakun kɛ dɔ kiɛ̃ kɔlɔ lɛ a paabaa ǹ wɔ kɛ dɔ ganaa. Ǹ kiɛ̃ kɔn kio a kɔnpɛ ǹ dinin yɛ kɔn kio kɛ nɛ. 11N Zakɔba a nɛgiĩn lɛn tɔn kiɛ̃ kɔlɔ màn paa lɛ ganaa, ka kɔlɔ-sɛlɛli bɛ́ a dí nyɛɛ lɔn, n nə n din wɔbaa ǹ wɔ a nyaǹ kiɛ̃ wɔ ǹ ganaa. Bɛ kio, n kɔlɔ màn paa kɛ doa ka sana nɛ. 12Bɛa kɔlɔ màn paa kɛ lɛ da dí nya ǹ mɔnaa lɛ a kũ ǹ biɛn kɛn lɛn ganaa. Kɔlɔ màn paa kɛ lɛ n die goɛ̃ yiri gisĩ sii ni ǹ mànan lɛa, Izirayeli nɛnyaanan taman yii. Aarɔn dɔ n die woe ka ǹ tɔn kɛn nɛ Dɛnaa yɔrɔ-a, a mɔnaa kũ ǹ biɛn kɛn ganaa, bɛ n nyɛɛ mà Dɛnaa yiri a re boe ǹ ne duduu wa. 13Kɔlɔn lɛn doa ǹ mànan lɛn zɛnaa ka sana nɛ. 14Doo, n fɔlɔbiɛ bɔnboɛɛn màn paa zɛnaa ka sana yoreen yoreen ne, n nə ǹ zɛnaa ka biɛ pɛnɛɛn bɛ́ lɔn, n bɛn lɛn doa kɔlɔn doa ǹ mànan lɛn ganaa.

Tìãbii zéwo

15«Bɛ kio kəni, n tìãbii zéwo zɛnaa, Lawa dùũ dɔ̃ ǹ zéwo ke. N dí-nyalin lɛn nə toa ǹ na a dí nya doɛ̃. N zɛnaa ka dí nya ǹ mɔnaa kɛ bɛ́ lɔn. N zɛnaa ka mɔnaa guguru sonbore ne, foɛ̃-n ka sana nɛ, ka gɛ̀sɛ korebore ne, a tã nɛ, a tã zenzen ne. 16Bɛ̀ n timəə ń nya, a gùrù sii tumaa kɔnpɛ: a sasabaa goã gùrù yii talɛɛ, a pəməbaa gùrù yii talɛɛ. 17-20N kɔlɔ fulupaa sonbore doa a ganaa, kɔlɔ lɛ a gogoonmaa n tɔtɔ ka ǹ miãn nɛ.#28.17-20 Bɛa kɔlɔn kɛn lɛn tɔn man ke: sardoine, topaze, émeraude, escarboucle, lazulite, jaspe, agate, cornaline, améthyste, chrysolithe, béryl, onyx. N nə ǹ kaa kɔn kio zii sii, ziin lɛn nə́ kɔn giulun. N kɔlɔ lɛ a gogoonmaa doa sana la. 21Kɔlɔn lɛn man die kɔn siɛ ka Zakɔba a nɛgiĩn tɔn lɛn nɛ: kɔlɔ fulupaa ka ǹ dɔn tɔn lɛn bɛ́ lɔn. Maǹ die goɛ̃ Izirayeli nɛnyaanan tɔrɔgiala basa fulupaa kɛ a sii nyaa ǹ sii lɛa.

22«Tìãbii zéwo lɛ ganaa, n biɛ bɔnboɛɛnɛn zɛnaa, dodoe-n kɔn lɛ ka biɛ pɛnɛɛn bɛ́ lɔn. N nə ǹ zɛnaa ka sana yoreen yoreen ne. 23Tìãbii zéwo lɛ ganaa doo, n kaaran màn paa zɛnaa ka sana nɛ, n bɛa kaaran màn paa kɛ lɛ doa tìãbii zéwo lɛ-a lon a lɛkoro wɔa gùrù màn paa kɛ ganaa. 24N bɛa sana biɛ màn paa kɛ lɛ doa sana kaaran màn paa kɛ lɛ ganaa, tìãbii zéwo lɛkoro màn paa kɛ ganaa. 25N tɔn biɛ màn paa lɛ lɛkoron doa kɔlɔn da ǹ màn màn paa lɛ ganaa. N doa dí nya ǹ mɔnaa kũ ǹ biɛn kɛn lɛn ganaa nyɛɛnɛ. 26N sana kaaran màn paa kɔsɔn zɛnaa, n nə ǹ doa tìãbii zéwo lɛ a tán a lɛkoro wɔa gùrù màn paa kɛ ganaa, naa-n dí nya ǹ mɔnaa lɛ ganaa. 27N sana kaaran màn paa kɔsɔn dɔn zɛnaa doo, n bɛn doa dí nya ǹ mɔnaa lɛ a kũ ǹ biɛn kɛn giala ganaa, nyɛɛnɛ, ǹ nimi ǹ bǎã kɛ nɛ. Bɛa kaaranan kɛn man goɛ̃ dí nya ǹ mɔnaa kɛa yii ǹ bǎã lalan. 28Maǹ die tìãbii zéwo lɛ a kaaranan kɛn yii kɔn ka dí nya ǹ mɔnaa kɛ wɔn nɛ, ka biɛ korebore kɔ́n nɛ. Maǹ die yii ka yɔrɔ kɔ́n nɛ, màn mɛn bɛ́ toɛ, tìãbii zéwo lɛ sɛ goã dí nya ǹ mɔnaa lɛ a wìi biɛ kɛ lalan. Sɛnɛ, a baran n bibiə̃ dí nya ǹ mɔnaa lɛ lalan wa.

29«Bɛ̀ Aarɔn tá woe bǎã sonbore lɛ nɛ, Izirayeli nɛnyaanan tɔn lɛn man die goɛ̃ bɛa tìãbii zéwo lɛ lalan. Bɛ n yiri gisĩ sii ni ǹ màn lɛa, Dɛnaa yɔrɔ-a biikoo tumaa li. 30#MNS 27.21; TDP 33.8; ƐSID 2.63; NEH 7.65. Muizu, Lawa dùũ dɔ̃ ǹ mànan kɛn kaa tìãbii zéwo kɛ nɛ, ǹ goã Aarɔn foobii, n wɔ ǹ nɛ masɛ Dɛnaa yɔrɔ-a. Aarɔn nə die bɛa mànan kɛn lɛn guĩ a foobii, masɛ Dɛnaa yɔrɔ-a biikoo tumaa li, màn mɛn bɛ́ toɛ, a ma dùũ dɔ̃ Izirayeli nɛnyaanan wɔ paǹ li.

Wúlu-bɔlen mɔnaa gialakunun kɛn

31«Bɛ kio, Aarɔn bɛ́ re dɔnkɛ sasa mɛn we dí nya ǹ mɔnaa lɛ giulun, n bɛ tumaa zɛnaa ka gɛ̀sɛ korebore ne. 32A toa a bii goã foɛ̃ nɛ, mìi wɔ ǹ bǎã lɛa. Mɔnaa-tãli toa a bɛa bii foɛ̃ kɛ lɛ a dí nya doɛ̃, a zɛnaa a na a lɛnpɛnɛ. Bɛa mìi wɔ ǹ bǎã kɛ lɛ nə n nimi a paraa, ń giɛ a baran toɛ̃ wa. 33Ka mɔnaa lɛ a tán nɛ wɔlɔ wɔrɔ, ka a lɛnpɛnɛ nɛ. Ka zɛnaa ka da nɛ bɛ́ lɔn, ka gɛ̀sɛ korebore ne, ka a tã nɛ, ka a tã zenzen ne. Ka bɛn zɛnaa ka mɔnaa lɛ lɛnpɛnɛ nɛ. Bɛn lɛn dɔn bii doo, ka sana toolo bɔnboɛɛnɛn kaa ka a lɛnpɛnɛ nɛ. 34Sana toolo boɛɛn goon, bɛ kio da nɛ nyaǹ goon, bɛ kio doo sana toolo boɛɛn goon. Ka bɛ zɛnaa mɔnaa lɛ lɛ ganaa tán miɛ̃, yǎa ka a lɛnpɛnɛ. 35Bɛ̀ Aarɔn tá dí nyɛɛ, bɛa mɔnaa lɛ n goɛ̃ a ganaa, bɛ̀ á woe Dɛnaa yɔrɔ-a bǎã sonbore kɛ nɛ, bɛ̀ á soe dɔn n boe a nɛ, toolon kɛn lɛn wuu á die boe. Bɛa yɔrɔ kɛ la, Aarɔn ba re giɛ̃ wa.

36«Bɛ kio doo, n nyaǹ màn zɛnaa ka sana yoreen yoreen ne, ka da buu bɛ́ lɔn, ń kiɛ̃ a ganaa ka ǹ bɛ́ gòã-kurii diɛ màn ganaa lɔn, mà "Kɛ n Dɛnaa wɔ lɛa." 37A da biɛ korebore ganaa, bɛ goã mìi yii ǹ mɔnaa gɔn kɛ nyɛɛnaan ganaa. 38A n goɛ̃ Aarɔn nyanlɛ ganaa, màn mɛn bɛ́ toɛ, Izirayeli nɛnyaanan bɛ́ mànan mɛnɛn tumaa koe Lawa la, ǹ nə́ *gɔ̀ boe ǹ ganaa, Lawa lɛ kɔ bɛa mànan kɛn lɛn ganaa, haalɛ ta maǹ nə́ sã ǹ da Lawa yɔrɔ-a biikoo lɛ li. A n goɛ̃ a nyanlɛ-a biikoo tumaa li, màn mɛn bɛ́ toɛ, bɛa Lawa gɔ ǹ mànan kɛn lɛn nə kɔɔ̃n kɔ Dɛnaa ganaa.

39«Bɛ dɔ kio doo, Aarɔn a dɔnkɛ boɛɛn kɛ laanka mìi yii ǹ mɔnaa gɔn kɛ zɛnaa ka mɔnaa guguru sonbore ne. N binbin yii ǹ màn dɔ zɛnaa, ka mɔnaa guguru sonbore ne, foɛ̃-n ka gɛ̀sɛ nɛ.

40«N dɔnkɛn zɛnaa Aarɔn a nɛgiĩn lɛn manɛ. N binbin yii ǹ mànan zɛnaa ǹ nɛ, ka bafolon dɔn nɛ, bɛn nə goã gugurubaa laanka zín sii lɛa. 41Bɛa mɔnaan kɛn lɛn wɔ n gologiĩ Aarɔn laanka a nɛgiĩn ganaa, n nyɔɔ kaa ǹ mìi ni, n nə ǹ koa ǹ dí lɛ la, n nə ǹ koa masɛ Lawa wɔn lɛa, ǹ tá re masɛ a dí nyɛɛ. 42Bɛ̀rɛ̀n zɛnaa ka mɔnaa guguru sonbore ne, a saa ǹ bɔsɔ̃ ganaa, a wo ǹ gìsin yaa. Ǹ zɛnaa, n nə ǹ sìi duru ni. 43Aarɔn laanka a nɛgiĩn tá re bɛn we, bɛ̀ ǹ tá re we kɔn yɛ ka Lawa nɛ ǹ Kion kɛ nɛ ǹ mɛn waáraa, hinlaa bɛ̀ ǹ tá re n mɔrɛ *wúlu bɔ ǹ bǎã kɛ ganaa, ǹ wúlu bɔ kion sonbore kɛ nɛ. Maǹ die zɛnɛɛ miɛ̃, màn mɛn bɛ́ toɛ, ǹ baran sã, ǹ gã kooro wa. Kɛ n sii zɛnaa ǹ gɔn lɛa Aarɔn mìi ni, ka a kio nɛnyaanan nɛ, a ba n bɔyɛɛ doɛ̃ wa.»

Currently Selected:

Bɔ bɛ̀rɛbaa nɛ 28: SCE2013

Highlight

Copy