Bɔ bɛ̀rɛbaa nɛ 20
20
Lawa a Dí Fù
1Lawa tɔ́n boon kɛn tumaa da: 2«Ma din nə Dɛnaa lɛa, n Lawa lɛ nɛ, ma soo n ne, má n bɔ Ezipti gána a bɛ̀rɛbaa nɛ:
3- N baran Lawa kɔsɔ guguru kɔ masɛ kio wa.
4 #
BBN 34.17; LWS 19.4; 26.1; TDP 4.15-18; 27.15. - N baran màn nyín zɛnaa n bɛ baa n Lawa lɛa wa. A baran lon màn yiikoonaa baa wa, tán wɔ nɛ, ka mu giulun wɔ-n wa. 5#BBN 34.6-7; MNS 14.18; TDP 7.9-10. N baran n kuməə bɛa lawan kɛn lɛn yɔrɔ-a, n nə ǹ guguru kɔ wa. A giala, masɛ din Dɛnaa, n Lawa lɛ, maa sii á kaka, maa lɛ koe lawa kɔsɔ ganaa wa. Man digolon sã a dɔlɔ boe ǹ nɛnyaanan ganaa, ka ǹ nɔ̀ɔnɔn nɛ, yǎa a woe doe nɔ̀ɔ fulupaa ganaa, bɛ̀ á daa yǎa ǹ ba masɛ narɛ wa. 6Sɛnɛ, man maa bɔlɔgoondɛnaabaa nyɛɛ maa narɛɛ wolen laanka maa dí-pɛn tamaa wolen manɛ, yǎa nɔ̀ɔ duu gigiã.
7 #
LWS 19.12. - N baran n Dɛnaa Lawa tɔ bíi sii kooron ganaa wa. A giala, masɛ Dɛnaa ba bɛa min kɛ toɛ dɔlɔ baã wa.
8 #
BBN 16.23-30; 31.12-14. - N *susu ǹ pii tamaa, n bɛ koa a gɔrɔn Lawa a lɛa. 9#BBN 23.12; 31.15; 34.21; 35.2; LWS 23.3. N dí nya lɛawaa sɔrɔ, n nə n dí tumaa yɔrɔ bɔ. 10Sɛnɛ, lɛawaa sɔbaabaa ǹ wɔ pinaa ke, Dɛnaa lɛ, n Lawa lɛa, bɛa susu ǹ pii n ka bɛ nɛ. N din baran dí kɔ́n nya wa, n nɛnyaanan baran nya wa, a giĩdɛnan laanka a lɔdɛnan nɛ, n dí-nyalin ni, a giĩdɛnan laanka a lɔdɛnan nɛ, n tɔɔn baran nya wa, haalɛ gùli mɛn bɛ́ ka li. 11#SGK 2.1-3; BBN 31.17. A giala, lɛawaa sɔrɔ gɔ́ɔ̃ nɛ, Dɛnaa lon laanka tán zɛnaa, ka yìsi mu ni, ka ǹ gɔ́ɔ̃gɔ́ɔ̃ ǹ mànan tumaa nɛ. Sɛnɛ, a na á n susu lɛawaa sɔbaabaa ǹ wɔ pinaa. Bɛ lɛ taman yii ni, Dɛnaa barka wɔ bɛa susu ǹ pii kɛ lɛ nɛ, á baa a din wɔ lɛa.
12 #
TDP 27.16; MAT 15.4; 19.19; MAR 7.10; 10.19; LUK 18.20; EFƐ 6.2-3. - N díi laanka n náa guguru kɔ, màn mɛn bɛ́ toɛ, n nyin sasa yɛ gána kɛ nɛ, n Dɛnaa Lawa din kɔ n la.
13 #
SGK 9.6; LWS 24.17; MAT 5.21; 19.18; MAR 10.19; LUK 18.20; RƆM 13.9; ZAAKI 2.11. - N baran gɛ̀ dɛ wa.
14 #
LWS 20.10; MAT 5.27; 19.18; MAR 10.19; LUK 18.20; RƆM 13.9; ZAAKI 2.11. - N baran naarɛbaa zɛnaa wa.
15 #
LWS 19.11; MAT 19.18; MAR 10.19; LUK 18.20; RƆM 13.9. - N baran wurumu baa wa.
16 #
BBN 23.1; MAT 19.18; MAR 10.19; LUK 18.20. - N baran soɛ da min la wa.
17 #
RƆM 7.7; 13.9. - N yii baran bɔ min kɔsɔ gɔn màn kɔ́n li wa. N yii baran bɔ a kion li wa. N yii baran bɔ a lɔ li wa, a baran bɔ a dí-nyali giĩdɛnan laanka lɔdɛnan li wa. N yii baran bɔ a dii li ka a dundun ni wa.»
18 #
EBR 12.18-19. Izirayeli nɛnyaanan zaman lɛ tumaa na á goã la a ginii kɛ laanka bɛn wuu miɛ̃. Ǹ nə́ la a tɛ-pɛ lɛ dɔ yɛ, ka kele lɛ-n tɛmaa lɛa. Nyɛ́ɛ zaman lɛ kũ, ǹ nə́ golee tiãlɛa. 19Ǹ nə́ pɛ Muizu ni: «N din boo da wɔ nɛ, wɔ á re miɛ̃. Lawa baran boo da wɔ-n wa, bɛ bie wa, wɔ á re giɛ̃.»
20Muizu pɛ zaman lɛ nɛ: «Ka baran nyɛ́ɛ baa wa. A giala, Lawa na á daa n da ka gɔ́ɔ̃ li, màn mɛn bɛ́ toɛ, nyɛ́ɛ baa a din ni goã ka foo ne, ka baran sii baraa dɔ zɛnaa wa.»
21Zaman lɛ golee tiãlɛa, sɛnɛ, Muizu nə́ n mɔrɔ bara kɛ lɛ ganaa, Lawa n giã nɛ a bii.
Wúlu bɔ ǹ bǎã
22Dɛnaa pɛ Muizu ni:
– A pɛ Izirayeli nɛnyaanan lɛn man kɛnɛn: «Ka dinin nə́ yɛ, má n toa lon, má boo da ka nɛ. 23Kaa boe la, ka masɛ baa ka lawan kɛn bɛ́ lɔn, ǹ nə́ ǹ zɛnaa ka wɔrɔgiala laanka sana-n wa. Kaa boe la, ka bɛn miãn zɛnaa masɛ genli wa. 24Ka *wúlu bɔ ǹ bǎã dɔ ka tii ni masɛ wɔ lɛa, ka wúlu mànan dɛ ka ǹ tã la, ka bii kɔɔ̃n kɔ kɔn ka Lawa nɛ ǹ wúlu mànan nɛ. Ka ǹ bɔ, sèren laanka diin ni. Ma bɛ́ re bǎãn mɛnɛn nyɛɛ, ka ma guguru kɔ ǹ nɛ, ma á re die walan, ma barka da ka ganaa. 25#TDP 27.5-7; ZOZ 8.31. Bɛ̀ ka tá wúlu bɔ ǹ bǎã lɛ doe ka kɔlɔ nɛ masɛ wɔ lɛa, ka baran dɔ ka kɔlɔ sɛlɛɛ-n wa. A giala, bɛ̀ ka sɛlɛ ka kaa sɛ̀miɛ̃ nɛ, ka á re a sonborebaa nyɛɛ. 26Ka baran banbaran koa maa wúlu bɔ ǹ bǎã lɛ ganaa, ka dii la-n wa, màn mɛn bɛ́ toɛ, ka baran n toa tán, ka dii lon wole lɛa sìi bǎã yɛ wa.»
Currently Selected:
Bɔ bɛ̀rɛbaa nɛ 20: SCE2013
Highlight
Copy
Compare
Share
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
