Nya ǹ dín 28

Pooli a dɔ Malti gána-n boo

1Fuu bɛ́ á n bɔ wɔ mìi ni ǹ mɛn waáraa, wɔ́ nɔ̀n da wɔ́ woo yaa, bɛ̀ gána lɛ tɔ n Malti. 2Gána lɛ a minin nə́ n da wɔ lɛ sɔnbɔraanɛ. La bɛ́ kiɛ, nyan nə́ boe, ǹ nə́ tɛ gole koa, ǹ nə́ wɔ kaa tán wɔ́ a lɛnpɛnɛ. 3Pooli gɔn gere bisin goa mà a n kiɛ tɛ-n, yǎa kɔrɔka soo tɛ gusuũ lɛ a lɛa, á n lɛ paraa a gɔn ganaa. 4Gána lɛ a minin bɛ́ ǹ nə́ bɛa miɛ̃ kɛ yɛ, á lɛ n paraa-n Pooli gɔn ganaa, ǹ nə́ pɛ kɔn nɛ: «Giĩ kɛ n die goɛ̃ minin nyin-bɔle lɛa taãn-taãnɛ, a laanɛ a gã mu li ke wa, Sonbore#28.4 Malti minin dì goon ne ǹ tá bíi Sonbore. a re toɛ a la wa.»

5Sɛnɛ, Pooli nə́ n gɔn pɛsɛ̃, miɛ̃ lɛ mɛnaa tɛ-n, bɛ̀ màn kɔ́n ná a zɛnaa a din ni wa. 6Minin lɛn man nə́ goã n yii diɛ Pooli gɔn lɛ a yui laanka a dinmaa a gɛ̀ la. Sɛnɛ, a bɛ́ á belebɔ ǹ yii ná a ba baraa kɔ́n dɔ ganaa n zɛnɛɛ Pooli-n wa, ǹ taasiɛ nə́ n bɔyaa. Ǹ nə́ mɛ la ǹ nə́ pii: «Dì goon ne!»

7Gána lɛ a min yii guguru-a tɔ n Pubulusu, bɛa wurun man nə́ goã kunu bǎã lɛ ganaa. Bɛ́ wɔ kũ á woo wɔ nɛ a piɛ wɔ giã walan, á wɔ kũ doɛ̃ sɔnbɔraanɛ yǎa lɛawaa sɔɔ. 8Ǹ di na a goã lon wa, gɔ̀nɔn-wɛɛ̃ laanka gɔ́ɔ̃-kuri na á goã a ganaa. Pooli woo a mìi la, á n gɔn da la á Lawa nyankɔ nɛ, a ná a kaka kɔ. 9Bɛ kio, gána lɛ a min mɛn tumaa goã busulə lɛa, bɛn man nə́ goã die Pooli li, bɛ̀ ǹ gogoonmaa kaka kɔ. 10Ǹ nə́ wɔ gɔ taãn-taãnɛ, wɔ bɛ́ re wusii we tà kuru ǹ goo ne doo woe, ǹ nə́ wɔa zii tɔ wɔ ǹ laadoo màn din tumaa kɔ wɔ la.

Pooli a dɔ Rɔmu

11Mui sɔɔ bɛ kio, wɔ́ wɔ Alɛksandrii kiwi a tà kuru ǹ goo goon ne, a tɔ n "Dioskuru"#28.11 Dioskuru lɛ n dì bɛlɛmanan tɔ lɛa, mu la ǹ goo-bɔlen nə́ taasɛ mà manə ǹsɛn tamɛɛ.. Bɛa tà kuru ǹ goo lɛ na á bɔ̀nɔn zɛnaa Malti gána nɛ. 12Wɔ́ woo dɔ Sirakuzu kiwi wɔ́ golee walan, wɔ́ lɛawaa sɔɔ zɛnaa. 13Wɔ bɛ́ wɔ́ yoo walan wɔ́ n da gána paǹ li, wɔ́ woo dɔ Rezio kiwi. A lɛawaa, piɛ̃ yoo á bɔ gusin a lɛ̀gɔn la, wɔ́ woo dɔ Puzolo lɛawaa paa gɔ́ɔ̃ nɛ. 14Wɔ́ woo wɔ dɔɔ̃nɔn kɔnɔn yaa walan, bɛn nə́ wɔ nyankɔ mà wɔ piizii goon zɛnaa ǹsɛn li. Wɔ n wɔ́ woo Rɔmu kiwi bɛa yɔrɔ kɛ lɛ la. 15Wɔ dɔɔ̃nɔn mɛnɛn bɛ́ Rɔmu, bɛn bɛ́ ǹ nə́ wɔa daa boo ma, ǹ nə́ yoo ǹ nə́ daa yǎa Apiyusu kiwi a pii ni, ka Tiin yu ǹ bǎã sɔɔ kɛ nɛ, ǹ nə́ n da wɔ lɛ. Pooli bɛ́ á ǹ yɛ, á barka da Lawa nɛ, a foo taã.

Pooli dí mɛn nya Rɔmu

16Wɔ bɛ́ wɔ́ dɔ Rɔmu kiwi, ǹ nə́ lɛ kɔ mà Pooli kion saa, sɛnɛ, sɔraasi goon na á goã a lɛduĩ.

17Lɛawaa sɔɔ bɛ kio, Pooli lɛ dia Zuifun nyɛɛnaandɛnan la. Ǹ bɛ́ ǹ nə́ daa n lɛ sɔkɔn, á boon kɛn da ǹ nɛ: «Ma dɔɔ̃ngiĩn lɛn ganaa, ma sii la ma tɔrɔ minin la wa, ma wɔ digolon landa sii kɔ́n sàabaa wa, sɛnɛ, maǹ nə́ masɛ kũ ǹ nə́ ma da kòso-n Zeruzalɛmu, ǹ nə́ ma wɔ Rɔmu minin gɔn. 18Bɛn bɛ́ ǹ nə́ nɔ̀n da ma la, má n bɔlɔ yala pɛ, maǹ nə́ baa re ma diɛ, a giala, ǹ sii kɔ́n yɛ masɛ wɔ gɔn la màn mɛn bɛ́ gɛ̀ dɔlɔ boe wa. 19#NDS 25.11. Sɛnɛ, Zuifun bɛ́ ǹ nə́ n piã, má nɔmaa má pɛ, máa ǹ masɛ sii lɛ wɔ Rɔmu kii gole gole kɛ gɔn, a na a yɔrɔ bɔ. Ma bie má bɛ zɛnaa máa zɛ̀rɛ mɛnaa maa gána minin la wa. 20Bɛ lɛ a lɛa nɛ má lɛ dia ka la, ma tá a yɔrɔ pii ka nɛ, a giala, Izirayeli minin foo bɛ́ doa-n sii mɛn ganaa, fɔlɔ biɛn man masɛ ganaa bɛ lɛ a lɛa.»

21Ǹ nə́ Pooli lɛ si: «Sɛ́wɔ kɔ́n bɔ Zudee gána-n, á daa wɔsɛn li n wɔ gɔn la wa, dɔɔ̃n kɔ́n dɔ daa á boo da hinlaa á n tɔ baraa pɛ wɔsɛn man wa. 22Wɔsɛn man li n din ni n taasiɛ pɛ wɔsɛn nɛ, a giala, maǹ zia diɛ bǎã din tumaa nɛ n zii dii kɛ lɛ ganaa.»

23Ǹ lɛawaa mɛn bɔ, bɛ bɛ́ á dɔ, ǹ nə́ wusoo ǹ nə́ daa Pooli yaa a giã ǹ bǎã nɛ. Pooli boo da ǹ nɛ, á *Lawa a kiibaa ǹ dí kɛ a nyɛɛ boo pɛ ǹ nɛ. A na á goã n doɛ á Yezu boo diɛ ǹ nɛ, a n boe Muizu a landa sɛ́wɔ nɛ ka Lawa a boo gii-dalin sɛ́wɔn nɛ. A n giɛ li mà ǹ dɔ̃, mà màn mɛn nə n da a wɔ gɔn la, mà sonbore ne. Maǹ nə́ sùn lɛ baa baayɛlɛ yǎa wasa mɛ. 24Ǹ tɛnɛn nə́ lɛ kɔ ǹ nə́ golee a da ǹ boo lɛ li, sɛnɛ, gialakunun nə golee li duduu wa. 25Ǹ dininmaan boo bɛ́ a goã goon wa, ǹ ná a giala kɔ ǹ tá sasawɛɛ, Pooli tɔ́n boo kɛ da ǹ nɛ:

– Yiri Fu boo mɛn wɔ Lawa a boo gii-dali Izayii lɛ-n, mà a pɛ ka digolon manɛ, taãn nɛ:

26 # IZA 6.9-10. «Wo tɔrɔ kɛ a minin li, n pɛ ǹ nɛ:

Ka á re n too koe ka nɔmaa,

ka a re boo miɛ wa,

Ka á re giɛ ka yii laa,

ka yii a re wɔlɔ yii wa.

27 A giala,

tɔrɔ kɛ lɛ a minin nə́ n foo laa,

ǹ nə́ n toon tã, ǹ nə́ n yiin tã.

Bɛ bie wa ǹ yii á re wɔlɔ yii,

ǹ too á re boo miɛ,

ǹ yiri á re a giala miɛ,

ǹ wusoo ǹ da Lawa li,

Lawa dɔ á re ǹ busu nyɛɛ ǹ foo ne,

sɛnɛ, bɛ bɛ́ a bie ǹ yii li ǹ sii lɛa wa.»

28Ka dɔ̃ kəni, mà Lawa na á bɛa kirisibaa ǹ boo kɛ lɛ dia tɔrɔ kɔsɔn la, bɛn tá re n too koe.

29A bɛ́ á bɛ da á nya, Zuifun lɛn nə́ yoo ǹ nə́ woo, bɛ̀ ǹ nə́ kɔn liere koe taãn-taãnɛ.

30Pooli kion goon saa á giã a nɛ yǎa lɛ̀ paa ka buri. Minin mɛnɛn tumaa goã die n yii koe a ganaa, a na á goã kɔn yii ka bɛn nɛ walan. 31A na á goã Lawa a kiibaa ǹ dí kɛ a nyɛɛ boo diɛ, a n minin darɛɛ wɔa Dɛnaa Yezu *Krita a boo ganaa. A na á goã bɛa sii lɛ zɛnɛɛ a din gɔn wìi a lɛa, min ná a ba kurii a ganaa wa.

Currently Selected:

Nya ǹ dín 28: SCE2013

Highlight

Copy