Nya ǹ dín 26
26
Pooli nə n bɔlɔ pii kii Agripaa yɔrɔ-a
1Agripaa pɛ Pooli ni: «N tá boe la n boo da n nə n din a zɛ̀rɛ baãnaabaa nyaa.»
Pooli nə́ n gɔn nyɔmaa, á n lɛ bũ á boo da:
2– Kii Agripaa ganaa, ma foo á kɔɔ̃n pelo, ma golee n yɔrɔ-a, Zuifun bɛ́ ma zɛ̀rɛ biɛ ka siin mɛnɛn dinin tumaa nɛ, man bɔlɔ pɛ bɛn wɔ gɔn la. 3A giala, n din tá wɔsɛn Zuifun landa siin tumaa doɛ̃ taãn-taãnɛ, ka wɔa liere kɔ ǹ siin ni. Ma nə n nyankoe n foo kũ n nə n too kɔ ma lon.
4A kũ maa boɛɛnmaa ganaa, ma biikoo mɛn zɛnaa ma tɔrɔ minin bii Zeruzalɛmu kiwi, Zuifun tumaa tá bɛ doɛ̃. 5#NDS 23.6; FILI 3.5. Bɛ̀ ǹ tá li ǹ taãn pɛ, ǹ tumaa á doɛ̃ mà man má goã *Fariziɛ̃ lɛa, kun ka wɔa landa sii zɛnaa a laa wolen kɛn nɛ. 6Lawa lɛ kɔ wɔ digolon la ka sii mɛn nɛ, masɛ foo bɛ́ doa-n bɛ lɛ ganaa, bɛ lɛ a lɛa nɛ ǹ tá kiri we ma ganaa pelo. 7Wɔsɛn tɔrɔ kiɛnlɛ fulupaa kɛ lɛ din tumaa dɔ foo n doa nɛ, mà bɛa lɛ-kɔ kɛ lɛ lɛ á re piɛ̃, bɛ lɛ nɛ ǹ tá n gù we yii, ǹ nə́ Lawa guguru koe tèlò laanka penleen ne. Kii Agripaa, bɛa foo-doa sii ganaa kɛ lɛ din dɔ a lɛa nɛ Zuifun tá ma zɛ̀rɛ biɛ. 8Wàa na á baa ǹ tá taasɛ, mà Lawa a boe la a geren yii kaa wa?
9 #
NDS 8.3; 22.4-5. Masɛ dinmaa lɛ n má goã taasɛ, máa ma doamaa nɛ man doa ka yɔrɔ din tumaa nɛ, ma zia da Yezu tɔ kɛ lɛ a goleemali wolen ganaa. 10Man má bɛ lɛ zɛnaa Zeruzalɛmu kiwi. Má Lawa a min gigiã kaa kòso-n, wúlu-bɔlen goledɛnan man nə́ goã ǹ nə́ bɛa pàã kɔ ma la. Ma dɔ goã lɛ koe kun ka min gialakunun kɛn nɛ, wɔ ǹ dɛ ǹ gã. 11Man má goã we lɛsɔkɔn kionən ne gunyin damata, bɛ̀ ma Lawa a minin lɛn nɔmaa, man má goã giɛ li, ǹ nə n piã ka ǹ golee Lawa li ni. Maa foo-yoo lɛ bɛ́ á gole kɔ á la yii ni, má goã ǹ kio lui yǎa kiwi kɔsɔn nɛ, ma nə́ ǹ nɔmiɛ.
12Wúlu-bɔlen goledɛnan man nə́ goã ǹ nə́ lɛ kɔ, ǹ nə́ zii kɔ ma la, mà ma wo Damaasi kiwi bɛ lɛ ganaa. 13Kii lɛ ganaa, ma bɛ́ zii la woe penleen ne, má wɔlɔ fúlu kɔ́n yɛ á bɔ lon, a tɛ-pɛ la wasa wɔ nɛ, á daa kaa ma laanka maa tá kun wolen la. 14Wɔ tumaa bɔ wɔ kaa. Masɛ tɔ́n lɛn kɔ́n ma boo diɛ ma nɛ ka wɔ dinin *Ebrəə bɔlɔ nɛ: «Sooli, wàa na á baa n tá fuu nyɛɛ masɛ nɛ? N piã ka masɛ-n lɛ n baraa lɛa n nə́ zɛnɛɛ n din ni, ka tɔɔ wɔ bɛ́ lɔn, tɔɔ mɛn bɛ́ n piɛ̃, a nə n gòã toe a dɛ ǹ bàlà ganaa.» 15Má tɔ́n nɔ̀n da: «Dɛnaa, die n ka nsɛ nɛ?» Dɛnaa lɛ pɛ: «Masɛ Yezu ni, ma n fuu kɛ lɛ nyɛɛ masɛ din ni. 16Sɛnɛ, yoo n golee n gòãn la, a giala, maa din nyaa n nɛ ǹ mìi n ke: Man má n bɔ má n koa maa dí-nyali lɛa. N yii sii mɛn yɛ, ka a gigiã kɔsɔn mɛnɛn dɔn bɛ́ ma tá re ǹ nyɛɛ n nɛ, man má n bɔ má n koa máa n tá re bɛn siére biɛ. 17Ma á re n tamaɛ Zuifu tɔrɔn kɛn bii, ka tɔrɔ kɔsɔn mɛnɛn dɔn bɛ́ ma á re n diɛ ǹ li. 18Man die n diɛ ǹ li n nə ǹ yii bũ, ǹ soo ǹ nə n bɔ wɔlɔ tì li, ǹ da wɔlɔ fúlu ganaa, ǹ nə n bɔ *Sɛtaan a pàã giulun ǹ da Lawa ganaa, màn mɛn bɛ́ toɛ, bɛ̀ ǹ nə́ golee masɛ li, Lawa nə n sii baraan toa ǹ nɛ, ǹ dɔn nə bǎã yɛ kun ka Lawa wɔn nɛ.»
Pooli màn mɛn da a din a dí wɔ gɔn la
19Pooli pɛ: «Kii Agripaa ganaa, bɛa yɔrɔ kɛ lɛ la, bɔ lon a din nyaa masɛ nɛ wole kɛ lɛ màn mɛn pɛ, man piã a bɔlɔ-n wa. 20#NDS 9.20,28-29. Man má Lawa a boo pɛ bǎã tumaa nɛ, Damaasi kiwi bɔrɔ, bɛ kio Zeruzalɛmu kiwi, ka Zudee gána din tumaa nɛ, ma tɔ́n daa dɔ tɔrɔ kɔsɔn ganaa. Man má pɛ máa minin nə n taasɛ, ǹ wusoo ǹ sii baraan kio, ǹ golee Lawa li, ǹ dí nya màn mɛn nə́ nyɛɛ, maǹ nə́ wusoo n sii baraan kio. 21Bɛ lɛ a lɛa nɛ Zuifun nə́ ma kũ Lawa a kion, ǹ nə́ ga li mà ǹ ma dɛ ma gã. 22Sɛnɛ, Lawa a dɔmalɛ barka nɛ, ma yii goã koo á daa dɔ pelo ganaa, man siére biɛ pàãdɛnaa dadaran laanka a bɔnboɛɛnɛn yɔrɔ-a. Lawa a boo gii-dalin nə goã ǹ nə́ màn mɛn pɛ lɛlɛ-lɛlɛ, mà á re n zɛnɛɛ, ma bie kɔsɔ pii á kiɛ̃ bɛ lɛ la wa. 23#IZA 42.6; 49.6; KOR1 15.20. A na á n pɛ mà Minin Nyin-sili lɛ á re die, ǹ nɔmaa, ǹ dɛ a gã, sɛnɛ, a din nə die yii kaa wole binaa biɛ á n bɔ geren bii, a kirisibaa ǹ wɔlɔ fúlu bɔ Zuifu tɔrɔn laanka tɔrɔ kɔsɔn manɛ.»
24Pooli bɛ́ boo diɛ miɛ̃, Fɛstusu nə́ n lɛ bũ á pɛ ka lɛn gole ne: «Pooli ganaa, n yii a kɔɔ̃n wa! N daraa gole lɛ ná a n yiri yoo.»
25Pooli pɛ: «Kii Fɛstusu ganaa, ma yiri yoo wa. Sonbore laanka yii kɔɔ̃nbaa ǹ boo ne ma á diɛ. 26Ma bɛ́ boo diɛ ka kii Agripaa mɛn nɛ, ma á doɛ̃ taãn-taãnɛ, bɛ tá siin kɛn lɛn tumaa siére-a, ǹ kɔ́n ba durii-n la wa, a giala, bɛa siin kɛn lɛn bɛ́ ǹ bie ǹ nə́ n zɛnaa durii-n wa. 27Kii Agripaa ganaa, Lawa a boo gii-dalin nə màn mɛn pɛ, n golee bɛ li ya? Ma á doɛ̃ máa n golee bɛ li.»
28Agripaa tɔ́n pɛ Pooli ni: «A na á goã boɛɛnɛ n ma bɔyaa n ma baa *Krita a min lɛa kəni?»
29Pooli pɛ: «Ta gɔrɔ nɛ, ta a kio ne, Lawa die a zɛnaa, n din laanka maa pelo a too kɔmalon wolen kɛn lɛn tumaa nə n baa ka ma bɛ́ lɔn, a n bɔ fɔlɔ biɛn kɛn nɛ ma ganaa.»
30Kii Agripaa laanka ǹ miãnɛn Berenisi ni, ka kii gole Fɛstusu ni ka lɛsɔkɔn wolen lɛn tumaa yoo. 31Ǹ bɛ́ soe ǹ nə́ pɛ kɔn nɛ: «Giĩ kɛ sii la màn mɛn nə́ gɛ̀ dɔlɔ hinlaa da kòso-n boe wa.»
32Agripaa pɛ Fɛstusu ni: «Bɛ̀ Pooli lɛ din bie á pɛ, mà asɛ a sii lɛ a yɔrɔ-bɔ dɔ kii gole gole kɛ li wa, bɛ̀ gɔn tá boe la a n bɔ a ganaa.»
Currently Selected:
Nya ǹ dín 26: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
