Números 8
8
Lamparakunata ratachinankumanta
1Señor Diosmi Moisesta khaynata niran: 2—Aaronta khaynata niy: Qanchisnintin lamparakunata ratachiy. Hinaspa mechero hina *candelabropa ñawpaqnin lawman k'anchachun, nispa.
3Hinaqtinmi Aaronqa lamparakunata churaran mechero hina *candelabropa ñawpaqnin lawman k'anchananpaq. Saynatan Aaronqa ruwaran, Moisesman Señor Diospa kamachisqanman hina. 4Chay candelabroqa tiyanan basenmanta asta t'ikankunapa kasqankaman qorimanta ruwasqa karan. Chay candelabrotaqa ruwaranku martillowan takashaspallan, Moisesman Señor Dios rikuchispa kamachisqanman hina.
Leví ayllumanta runakuna Señor Diospaq ch'uyanchasqa kasqankumanta
5Señor Diosmi Moisesta khaynata niran:
6—Israelpa miraynin runakunamanta *Leví ayllu runakunata rakispa ch'uyanchay. 7Paykunataqa khaynatan ch'uyanchanki: unuwanmi paykunataqa ch'allanki ch'uyanchasqa kanankupaq. Hinaspan kamachinki enteron cuerponkuta rasurakamunankupaq hinallataq p'achankutapas t'aqsakamunankupaq. Saynapin paykunaqa ch'uyanchasqa kanqaku. 8Chaymantan paykunaqa apamuwanqaku huk malta torillota hinallataq aceitewan chapusqa fino harinatapas. Saynallataqmi qanpas huk malta torillota huchakuna perdonasqa kananpaq *sacrificio *ofrendata ofrecemuwanaykipaq apamuwanki. 9Chaymantan noqawan tupananchis *tabernáculo templopa ñawpaqninman pusanki llapallan Leví ayllumanta kaq runakunata. Saynallataqmi Israelpa miraynin runakunatapas llapallanku huñunakamunankupaq waqyanki. 10Chaymantan Leví ayllumanta kaq runakunata noqa Señor Diospa ñawpaqniyman ashuykachimuwanki. Hinaqtinmi Israelpa miraynin runakunaqa Leví ayllumanta kaq runakunaman makinkuta churaykunqaku. 11Hinaqtinmi Aaronqa Leví ayllumanta runakunata noqa Señor Diospa ñawpaqniypi presentawanqa Israelpa miraynin runakunapa ofrendanta hina, imaynan ofrendata presentaspanku ruwanku chay hinata. Saynapin Leví ayllumanta runakunaqa ch'uyanchasqa kanqaku, noqa Señor Diosta serviwanankupaq.
12Chaymantan Leví ayllumanta kaq runakunaqa makinkuta torillokunapa umanman churaykunqaku. Hinaqtinmi huknin kaq torillota ofrecemuwanki Leví ayllumanta runakunapa huchanku perdonasqa kananpaq. Huknin kaq torillotataqmi lliwta k'anaspa sacrificio ofrendapi ofrecemuwanki, saynapi paykuna ch'uyanchasqa kanankupaq. 13Chaymantan Leví ayllumanta kaq runakunataqa kamachinki, Aaronpa hinallataq wawankunapa ñawpaqninpi sayanankupaq. Hinaspan paykunata huk ofrendata hina noqa Señor Diosman presentamuwanki. 14Saynata ruwaspaykin Leví ayllumanta kaq runakunataqa Israelpa miraynin runakunamanta sapaqchanki, noqa Señor Diosllapaqña kanankupaq.
15Hinaspan paykunataqa ch'uyanchaspa huk ofrendata hina noqa Señor Diosman presentamuwanki. Chaymantan paykunaqa rinqaku tabernáculo temploman, noqa Señor Diosta chaypi serviwanankupaq. 16Leví ayllumanta kaq runakunataqa Israelpa miraynin runakuna ukhumantan akllakurani, noqa Señor Diosllapaqña sapaqchasqa kanankupaq. Paykunataqa Israelpa miraynin runakunapa llapallan primer kaq wawankupa rantintan noqallapaqña kanankupaq akllakurani. 17Noqa Señor Diosqa, Egipto nacionniyoq runakunapa llapallan primer kaq wawankuta wañuchisqay p'unchawmantapachan, Israelpa miraynin runakunapa llapallan primer kaq wawankutaqa noqapaq sapaqcharani hinallataq animalninkupa primer kaq uñankunatapas. 18Chayraykun noqaqa Leví ayllumanta kaq runakunata akllakurani Israelpa miraynin runakunapa llapallan primer kaq wawankupa rantinta. 19Noqaqa Leví ayllumanta kaq runakunatan Aaronman hinallataq wawankunamanpas qorani, Israelpa miraynin runakunapa rantinta tabernáculo templopi ruwanakunata ruwaspa serviwanankupaq. Saynallataqmi paykunaqa sacrificio ofrendata presentawanqaku, Israelpa miraynin runakuna ima huchankumantapas ch'uyanchasqa kanankupaq. Saynapin Israelpa miraynin runakuna tabernáculo temploman ashuykuqtinkuqa, mana ni ima onqoypas paykuna ukhupi rikhurinqachu, nispa.
20Hinaqtinmi Moisesqa Aaronpiwan hinallataq Israelpa llapallan miraynin runakunapiwan tukuy chaykunata ruwaranku Leví ayllumanta kaq runakunawan. Saynataqa ruwaranku Moisesman Señor Diospa kamachisqanman hinan. 21Hinaqtinmi Leví ayllumanta kaq runakunaqa ch'uyanchakuspanku p'achankutapas t'aqsakuranku. Chaymantan Aaronqa paykunata huk ofrendata hina Señor Diosman presentaran. Saynallataqmi Aaronqa sacrificio ofrendata Señor Diosman ofreceran, Leví ayllumanta runakunapa huchan perdonasqa kananpaq. 22Chaymantan Leví ayllumanta kaq runakunaqa Señor Diosta tabernáculo templopi servinankupaq riranku. Hinaspan sacerdote Aaronpa hinallataq wawankunapa dirigisqan serviranku. Tukuy chaykunataqa ruwaranku Moisesman Señor Diospa kamachisqanman hinan.
23Señor Diosmi Moisesta nillarantaq khaynata:
24—Leví ayllumanta kaq runakunaqa ishkay chunka pishqayoq watankumanta wichaymanmi tabernáculo templopi ruwanakunata ruwaspa serviwanqaku. 25Ichaqa pishqa chunka watayoq kaspankuqa manañan hayk'aqpas tabernáculo templopi ruwanakunataqa ruwanqakuñachu. 26Aswanmi paykunaqa wawqenkupiwan servinqaku tabernáculo templota cuidaspanku. Ichaqa manañan tabernáculo templopi ruwanakunataqa ruwanqakuñachu. Kay kamachisqay leyman hinan Leví ayllumanta kaq runakunawanqa ruwanki, nispa.
Currently Selected:
Números 8: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
