Psom 73
73
TRWAZIEM LIV PSOM
(Psom 73-89)
Lazistis divinn
Enn Psom Asaf.
1Vremem Bondie toultan bon ar Izrael
e ar bann dimoun ki ena leker kler.
2Me mwa, mo ti manke glise;
mo ti pou perdi ekilib ek tonbe,
3parski mo ti anvi pran plas bann vantar
letan mo trouv bann move dimoun pe prospere.
4Zot pa konn douler;
zot for, zot bien portan.
5Zot pa soufer kouma nou soufer;
zot pa gagn traka kouma lezot.
6Akoz sa zot expoz zot vantardiz koumadir enn bizou;
zot violans anpandan lor zot kouma enn manto;
7zot boufi ar lagres, zot lizie sorti gro,
e zot latet plin ar plan mesanste.
8Zot sikann dimoun e koz move koze;
zot fezer e zot tir plan pou fer dominer.
9Zot labous insilte Bondie dan lesiel
e zot lalang kritik tou lor later.
10Akoz sa lepep tourn ver zot,
ek bwar parol ki zot verse anabondans.
11Zot dir koumsa, “Kot Bondie pou kone?
Eski Pli Lao la konn kiksoz li?”
12Ala kouma bann dan lemal ete.
Trankil-trankil zot pe ogmant zot rises.
13Savedir pou nannye mo‘nn res prop.
Pou nannye mo‘nn lav mo lame pou montre mo inosans.
14Mo finn soufer toutlazourne;
toulegramatin mo konn pinision.
15Si mo ti vremem pans koumsa, e azir kouma bannla
mo pa ti pou to serviter fidel, mo ti pou trayir fami Bondie.
16Mo ti sey konpran problem la
me pa ti fasil.
17Fode mo ti rant dan to Tanp,
lerla mo ti konpran ki pou ariv bann ki dan pese.
18To met zot lor terin glisan;
zot glise, tonbe, destriksion atann zot.
19Enn sel kout, fini! Enn gran ravaz!
Zot fini bien mal, zot lafin orib.
20Kouma enn rev ki fonn ar soley gramatin,
zot volatilize ler to dres divan zot, O Segner.
21Ler mo ti ena leker dan lapenn,
ler mo santiman ti blese,
22mo ti enn veritab inbesil
ki pa ti pe konpran twa, Bondie.
23Me mo pou toultan res koste ar twa
e mo kone to pou trap mo lame.
24To pou gid mwa ar bon konsey
e alafin to pou akeyir mwa ar boukou loner.
25Apart twa mo peyna personn dan lesiel!
Si mo ena twa ki lezot mo bizin lor later?
26Mo lekor ek mo lespri kapav febli
me mo vre lafors se mo Bondie.
Apart li, mo trezor eternel, mo pa bizin personn.
27Bann ki abandonn twa pou fini mal;
To pou detrir bann ki fer tret ar twa.
28Mwa mo kone kouma li bon
kan nou pre ar Bondie;
Mo finn swazir Lesegner BONDIE#73:28 Lesegner Yahweh pou protez mwa;
mo pou proklam tou to bann bienfe.
Currently Selected:
Psom 73: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
