Izai Introdiksion
Introdiksion
Dan langaz ebre, Izai vedir “Lesegner delivre”. Nom lamem anons deroulman liv-la. Me delivrans ki Bondie done pa touzour seki bann zom espere. Akoz samem, mesaz Izai kapav sok boukou dimoun.
Ena trwa gran parti dan sa liv ki ena 66 sapit-la. Sak parti deroul enn diferan lepok dan zistwar Izrael.
Premie parti (Izai 1-39)
Premie parti deroul anviron ant 740 e 700 avan Z.K. Sa lepok-la, Izai ti portparol Bondie dan Zerizalem, e li ti marke par bann bel tansion internasional: Lezip, ki enn gran pwisans militer dan lesid, ti pe afebli. Dan lenor, bann Asiryen ti pe koumans monte. Zot ti pe vinn enn menas.
Lane 734, Akaz ti lerwa dan Zerizalem, kapital rwayom Zida, dan lesid Izrael. Bann rwayom Lasiri ek Efraim (bann rwayom lenor Izrael) finn fer lalians kont rwayom Zida pou obliz li zwenn zot kont menas bann Asiryen.
Lane 722-721: Bann Asiryen ti pran rwayom lenor ek so kapital, Samari. Lepep ti deporte.
701: Ler Ezekias ti lerwa dan Zerizalem, bann Asiryen ti antour Zerizalem e atak rwayom Zida.
Dan sa peryod-la, Izai, limem profet ki ti anons avek konviksion ek lodas mesaz Bondie. Li ti pe ki atraver menas bann Asiryen, se Bondie limem ki pe azir kont linfidelite so pep. Profet-la ti denons bann lalians politik ki bann dirizan Zerizalem ti pe fer, linzistis sosial ek violasion lalwa, enn manier viv larelizion ki explwat bann pov, ek bann foli-grander. Me kan danze-la ti prezan, profet-la ti ankouraz lepep ek anpes li panike.
Dan tou kitsoz ki ti traverse, Izai ti dimann lepep krwar dan promes Bondie e dan lalwa ki li finn donn li. Lafwa ek konfians an Bondie bizin manifeste par bann aksion, ki li dan sosial, dan politik, e dan nou bann relasion personel.
Dan sa premie parti-la, ena enn koleksion mesaz dapre bann tem e dan lord ki zot ti vini:
Sap 1-12; 28-33: mesaz pou rwayom Zida ek Izrael-Efraim;
Sap 13-23: mesaz pou bann pep etranze, Babilonn, Filisti, Moab, etc.
Sap 36-39: Zistwar lor rwayote Ezekias (parey kouma dan liv lerwa).
Deziem parti (Iza 40-55)
Abitie apel sa liv-la liv konsolasion Izrael.
So sitiasion diferan: bann Babilonien, nouvo pwisans militer ki ti finn ranplas bann Asiryen dan sa rezion-la, ti finn kaptir Zerizalem dan lane 587 avan Z.K e ti finn deport sa pep-la.
Bann deporte ti poz zot sa kestion-la: Eski viktwar Babilonn montre ki bann bondie babilonien pli for ki Bondie Izrael? Bann exile ti retrouv zot lwin ek later ki LESEGNER ti donn zot. Zot ti nepli ena tanp pou priye Bondie . Bann-la ti dan enn gran dezespwar e zot ti krwar ki Bondie finn abandonn zot, swa par expre, swa parski li feb.
Se pou sa bann dimoun lamem ki profet-la ti donn so mesaz. Bondie pou servi Siris, lerwa Pers, pou delivre so pep. Pou ena enn nouvo liberasion: parey kouma kan pep-la ti sorti lezip, zot pou revinn lor later promiz. Bondie, limem kreater lesiel ek later. Savedir li ena pouvwar pou anons sa bann kiksoz-la ek realiz zot. Bann lezot bondie, zot napa vo nanye.
Dan sa bann mesaz lespwar-la, 4 poem prezant enn personaz boulversan: “Serviter Lesegner” (42:1-4; 49:1-6; 50:4-9; 52:13 - 53:12). Dan Nouvo Testaman, pou trouv sa personaz-la kouma kikenn ki reprezant Zezi. (par exanp Zis 8.30-35).
Trwaziem parti (Izai 56-66)
Sa parti la deroul dan peryod apre lexil. Lane 538 avan Z.K, Siris, lerwa Pers, ti sign enn dekre ki ti otoriz bann deporte pou rant kot zot e pou rekonstrir zot tanp. Ler zot ti arive, bann exile ki ti finn swazir pou retourne ti dekouver ki lavi dan Zerizalem ti mizerab e bien bien dir: Lavil-la ti anrwinn, pei-la ti finn akapare par bann dimoun ki ti finn reste. Bann ki ti finn res fidel ti bien tigit. Ti ena boukou povrete, linzistis sosial ek lidolatri.
Me Lespri LESEGNER ti anvoy profet-la pou anons enn bon nouvel bann pov e pou pran swin bann dimoun dezespere. Plitar, Zezi pou rekonet ki li finn vini pou akonpli sa mision-la. (Lk 4:16-21).
Currently Selected:
Izai Introdiksion: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.