Zenez 13

Abram ek Lot separe

1Abram kit Lezip. Li al Negev avek so fam, so neve Lot, e tou seki li posede.

2Abram extra ris. Li ena enn kantite troupo zanimo, e li posed boukou larzan ek lor. 3Inpe letan apre, Abram kit Negev. Li kanpe dan plizir plas ziska ki li ariv dan enn landrwa ant Betel ek Ai. Li ti deza kanpe laba avan. 4Labamem ki li ti aranz enn lotel e ti invok nom LESEGNER.

5Lot res avek so tonton Abram. Li osi, li posed bann troupo mouton, kabri ek bef. Li ena so prop fami ek so bann serviter. 6Pena ase patiraz dan sa landrwa la pou Abram ek Lot, parski zot ena boukou troupo. Zot nepli kapav res ansam. 7Bagar eklate ant bann berze Abram ek bann berze Lot. Anplis, bann Kananeen ek bann Perizit ankor pe res laba.

8Lerla Abram dir Lot: “Nou mem disan nou. Fode pa ena dispit ant nou, ni ant nou bann berze. 9Li pou pli bon si nou separe. Ankor ena boukou terin lib dan sa pei la. Si to swazir pou al lenor, mo pou al lesid. Si to swazir pou al lesid, mo pou al lenor.” 10Lot get dan direksion bann teritwar kot larivier Zourdin. Li trouve ki pa mank dilo laba. Sa lepok la, LESEGNER pa ti ankor detrir Sodom ek Gomor. Tou sa bann landrwa la, ziska Soar, zot ver kouma Zardin LESEGNER. Zot kouma later Lezip. 11Lot swazir pou al dan bann laplenn ki pre ar Zourdin. Alor, li lev so kan e li al dan direksion les. Ala ki manier Lot ek so tonton Abram finn separe. 12Abram res dan Pei Kanaan. Lot al res dan bann lavil ki trouv dan vale Zourdin. Li plant so latant pre ar Sodom. 13Bann abitan Sodom bien move, e zot bann pese bien grav divan LESEGNER.

LESEGNER promet Abram enn gran desandans

14Apre separasion Lot ek Abram, LESEGNER dir Abram: “Lev to lizie e get dan direksion lenor, lesid, les ek lwes. 15Mo pou donn twa ek to bann desandan tou sa bann pei la pou touzour. 16Mo pou donn twa enn gran desandans. Zot pou vinn boukou kouma lapousier later. Parey kouma pa kapav kont lapousier later, pa pou kapav kont to bann desandan. 17Leve, al admir sa Pei la an-longer e an-larzer. Mo pe donn twa tousala.” 18Abram dekanpe e li al plant so latant pre kot bann gran pie Mamre, ki trouv dan Ebron. Abram aranz enn lotel pou LESEGNER laba.

Currently Selected:

Zenez 13: KMOTPOR

Highlight

Copy