Ester 9
9
Bann Zwif pous zot vanzans
1Lor treziem zour, dan douziem mwa, ki mwa Adar, bizin exekit lord ek lalwa lerwa. Lennmi bann Zwif ti sipoze gagn pouvwar lor zot sa zour lamem. Me tousala finn sanze. Bann Zwif finn gagn pouvwar lor bann seki pe anvi detrir zot. 2Bann Zwif rasanble dan tou zot bann site, partou-kote, dan bann provins lerwa Zerses pou atak bann seki pe anvi detrir zot. Personn pa kapav reziste zot parski lepep antie pe gagn per. 3Tou ofisie dan bann provins, bann reprezantan lerwa ek bann gouverner, mem bann ofisie rwayal, zot tou dan kote bann Zwif parski zot per Mardose. 4Mardose ena boukou pouvwar dan sato lerwa. So repitasion fane partou anmemtan ki li pe vinn pli pwisan. 5Akoz sa, bann Zwif finn kapav touy zot lennmi ar lepe. Bann Zwif koup-koup zot, detrir zot ek fer seki zot anvi ar bann seki ayir zot. 6Dan site Siz, bann Zwif touy 500 dimoun. 7Zot touy Parsadata, Dalfonn, Aspata, 8Porata, Adalia, Aridata, 9Parmasta, Arisay, Ariday, Vayzata, 10dis garson Amann, garson Amedata, lennmi bann Zwif. Me zot pa tous dibien bannla. 11Sa mem zour la, bann la fer lerwa kone komie dimoun finn mor dan site Siz. 12Lerwa dir ar larenn Ester: “Dan site Siz, bann Zwif finn touy 500 dimoun ek osi dis garson Amann. Ki zot kapav finn fer dan lezot parti bann provins? Ki to dezire aster? Seki to dimande mo pou akord twa. Ki kiksoz to anvi gagne ankor? To dezir pou ekzose.” 13Ester dir: “Si lerwa dakor, dime, les bann Zwif ki dan Siz azir dapre lord ki ti ena zordi ek fer pandi dis garson Amann lor poto.” 14Lerla, lerwa donn lord pou ekzekit seki Ester finn dimande. Zot tir enn dekre dan Siz e zot pandi dis garson Amann. 15Bann Zwif ki dan Siz rasanble ankor enn fwa lor katorziem zour mwa Adar. Zot touy 300 dimoun dan Siz; me zot pa tous dibien bannla.
16Bann Zwif ki dan bann lezot provins, zot osi zot rasanble pou defann zot lavi kont bann lennmi. Zot touy 75,000 parmi bann ki ayir zot; me zot pa tous dibien bannla. 17Sa pase lor treziem zour mwa Adar, e zot repoze lor katorziem zour. Sa zour la vinn enn zour fet ek lazwa.
Inogirasion fet Pourim
18Bann ki dan Siz, rasanble treziem ek katorziem zour. Zot repoze lor kinziem zour. Zot fer sa zour la vinn enn zour fet ek lazwa. 19Me bann Zwif ki res dan bann vilaz, andeor lavil, fete lor katorziem zour. Li enn konze kot sakenn avoy so kamarad nouritir ankado.
20Mardose not tousala e li avoy let tou bann Zwif ki dan bann provins lerwa Zerses. Bann seki pre ek bann seki lwin. 21Li dimann zot gard katorziem zour mwa Adar ek so kinziem zour osi, sak lane, 22kouma bann zour kot bann Zwif finn sape depi lame zot bann lennmi. Li enn mwa kot zot laper ek tristes finn sanze pou vinn lakontantman. Zot bizin fer sa de zour la vinn bann zour fet kot zot partaz nouritir ek donn kado bann seki pli pov. 23Koumsamem bann Zwif finn adopte, dan zot koutim, seki Mardose finn dimann zot fer dan so let.
24Amann, garson Amedata ki ti enn Agazit, lennmi tou bann Zwif, ti finn konplote pou detrir zot. Li ti finn tir sor pou kone ki ti pli bon zour pou fer sa. 25Me, Ester finn vinn divan lerwa. Lerla, finn donn lord par ekri pou ki konplo Amann kont bann Zwif retourn lor limem. Finn pandi limem ek so bann garson lor poto. 26Akoz samem sa bann zour la apel Pourim, ki vinn depi mo ‘Pour’. Akoz tou seki ti finn ekrir dan sa let la ek akoz tou difikilte ki zot finn gagne ek tou seki finn ariv zot, 27bann Zwif aksepte pou gard sa de zour la kouma enn koutim. Zotmem, zot bann desandan ek tou bann seki aksepte pou vinn Zwif, san zame rate, toulebanane, zot pou respekte sa de zour la kouma ti ekrir dan let la. 28Sak zenerasion bizin rapel sa bann zour la. Dan sak fami, provins ek site, zame bann Zwif, e mem zot bann desandan, bizin aret fer memwar sa de zour Pourim la.
29Larenn Ester, tifi Abiel, ansam avek Zwif Mardose, donn zot plin lotorite par ekri, pou konfirm deziem let konsernan Pourim. 30Zot avoy let pou swet lape ek sekirite tou bann Zwif dan toule 127 provins lerwa Zerses. 31Zot donn lord pou fer bann zour Pourim la respekte dan lepok ki bizin kouma Zwif Mardose ek larenn Ester finn dir. Parey kouma zot finn met lalwa pou zotmem ek zot bann desandan pou gard karem ek fer zot dey. 32Bann lord larenn Ester fixe sa bann pratik la e tousala finn ekrir dan liv.
Currently Selected:
Ester 9: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
