Psom 119
119
Lalwa LESEGNER
1Bienere bann ki amenn enn lavi san repros,
ki viv dapre lalwa LESEGNER.
2Bienere bann ki swiv so instriksion,
ki obeir li ar sinserite profon dan zot leker.
3Zame zot pa fote;
zot swiv sime ki li finn trase.
4To finn donn nou to instriksion,
nou bizin obeir zot san fot.
5Mo priye ki mo kondir mwa dan enn manier ferm
pou ki mo reisi swiv to bann regleman.
6Si mo swiv tou to komannman
lerla mo pa pou gagn laont.
7Ler mo konn apresie valer to regleman ki zis,
mo pou rann glwar to grander ar sinserite.
8Mo pou obeir to lalwa;
zame pa abandonn mwa.
9Ki manier enn zennom kapav res prop dan lavi?
Li bizin obeir to lansegnman.
10Ar tou mo leker mo rod twa;
anpes mwa dezobeir to komannman.
11Mo prezerv to parol dan mo leker
pou mo pa fer pese kont twa.
12Mo sant to louanz O SEGNER;
montre mwa to regleman.
13Mwa mo pou repete for-for
tou bann desizion ki to finn donn nou.
14Mo ena boukou lazwa kan mo obeir to komannman
plis ki lazwa ki enn dimounn ena ki posed enn rises enorm.
15Mo etidie to bann instriksion
e fixe mo regar lor sime ki to montre mwa.
16To bann lalwa donn mwa satisfaksion;
to parol finn grave dan mo memwar.
17Pran mwa, to serviter, bien kont
pou ed mwa viv enn lavi ki obeir to parol.
18Ouver mo lizie pou ki mo dekouver
bann laverite merveye ki kasiet dan to bann lalwa.
19Mo sezour lor later li kourt;
pa kasiet mwa to bann komannman.
20Sak moman mo leker brile ar inpasians
pou to bann instriksion.
21To repros bann ki fer zot fanor, bann modi
ki dezobeir to instriksion.
22Protez mwa kont zot mepri ek zot insilt
parski mwa mo respekte to lord.
23Bann dirizan zwenn pou konplote kont mwa
me mwa mo prefer etidie to lansegnman.
24To leson donn mwa plezir;
zot bann konseye ki ouver mo lespri.
25Mo mo anba dan lapousier;
selon to parol, fer mwa reviv.
26Mo ti konfes seki mo finn fer, mo bann erer
e to ti reponn mwa; montre mwa to regleman.
27Ed mwa pou konpran to bann exizans,
e mo pou medit lor to bann aksion manifik.
28Sagrin pe pins mo leker;
donn mwa lafors dapre to parol.
29Anpes mwa pran move sime
e dan to bonte, ansegn mwa to lalwa.
30Mo swazir pou swiv twa avek fidelite;
mo pran bien kont sazes to zizman.
31Mo finn aprann to lansegnman O SEGNER,
pa fer mwa gagn laont.
32Mo swiv sime to komannman ar boukou lazwa
parski to fer mo konesans grandi.
33SEGNER, montre mwa lespri to regleman
e mo promet mo pou obeir zot touletan.
34Fer mwa konpran to lalwa e mo pou swiv li;
mo pou grav li dan mo leker.
35Gard mwa dan lobeisans to bann instriksion
parski zot donn mwa boukou boner.
36Olie fer mwa anvi vinn ris,
ranpli mo leker ar dezir pou obeir to lalwa.
37Pa les mwa tante par zafer san valer;
fer mwa viv dan to sime.
38Onor promes ki to ti fer mwa, to serviter,
samem promes ki to fer ar dimounn ki obeir twa.
39Protez mwa kont insilt ki teroriz mwa;
parski sazes to zizman li bon.
40Mo dezir ekout to lord;
par to drwatir fer mwa reviv.
41SEGNER, montre mwa ki kantite to kontan mwa
e sov mwa kouma to ti promet.
42Koumsa mo pou kapav fer fas bann ki insilte mwa
parski mo met mo konfians dan to parol.
43Ed mwa pou koz laverite touletan
parski mo lespwar li dan to zizman.
44Mo pou touletan obeir to lalwa
aster, pli tar, pou leternite.
45Mo pou viv enn lavi dan parfe liberte
parski mo fer tou pou ekout to konsey.
46Mo pou dir bann lerwa ki to instriksion ete
e mo pa pou onte pou fer sa.
47Mo santi mwa dan bien kan mo pe obeir to komannman
parski mo telman kontan to parol.
48Mo respekte ek kontan to lansegnman
e mo pou medit lor to bann exizans.
49Rapel promes ki to ti fer mwa, to serviter;
sa ti ranpli mwa ar lespwar.
50Malgre mo soufrans mo ti gagn soulazman
parski to promes ti re-donn mwa lavi.
51Bann vantar finn bien fer foutan ar mwa
me mo pa finn abandonn bann prinsip to lalwa.
52Mo rapel klerman to bann zizman dan lepase
parski zot donn mwa kouraz ek lape, O SEGNER.
53Kan bann ki fer lemal viol to lalwa,
lakoler bwi dan mwa.
54Ninport ki kote mo viv kouma enn etranze lor later
mo konpoz kantik pou sant to bann lansegnman.
55Mem dan lanwit mo pans twa, SEGNER,
e mo pou obeir to lalwa.
56Kan mo pran kont to mesaz
lerla ki mo gout veritab boner.
57Mo pa bizin nanye apart twa, O SEGNER;
mo fer serman mo pou obeir to parol.
58Mo sipliy twa ar sinserite, montre mwa to bonte
kouma to ti promet.
59Mo finn examinn mo konportman
e mo pe retourn ver to bann exizans.
60San perdi letan
mo swiv to instriksion lor vites.
61Malgre bann azan lemal finn instal piez lor mo sime
mo pa pou bliye to lalwa.
62Omilie lanwit mo leve pou selebre twa
pou to zizman ki drwat.
63Mo solider ar bann ki ador twa
e ki obeir to instriksion.
64SEGNER, liniver ranpli ar to lamour infini;
gid mwa atraver to lansegnman.
65To finn onor to parol, SEGNER,
e to finn fer dibien pou to serviter.
66Donn mwa sazes ek konesans
parski mo fer konfians to komannman.
67Avan to ti imilie mwa, mo ti egare
me aster mo gard to parol.
68To bon e to leker li gran!
Ansegn mwa to regleman.
69Malgre ki ena dimounn fezer ki finn rakont zistwar lor mwa,
mwa ar leker kler mo swiv to instriksion.
70Sa bann-la zot pa konpran nanye;
me mwa, mo trouv boukou plezir dan to lalwa.
71To pinision finn fer mwa boukou dibien;
li finn fer mwa konpran to leson.
72Lalwa ki to prononse, samem meyer pou mwa,
li vo plis ki tou bann trezor dan lemond.
73To ti kree mwa, to finn fasonn mwa;
nouri mo lespri pou mo konpran to bann komannman.
74Bann ki respekte twa pou kontan ler zot trouv mwa
parski mo finn met mo lesperans dan to parol.
75Mo kone ki to bann zizman zot baze lor drwatir, SEGNER,
e to ti ena rezon pou imilie mwa dan to fidelite.
76Konsol mwa ar to lamour infini,
kouma to finn promet mwa, to serviter.
77Ena pitie pou mwa e mo pou kontigne viv
parski mo kontan to lalwa.
78Fer bann gran-nwar dekonserte
pou zot bann fos akizasion lor mwa;
dan mo kote, mo pou medit lor to bann instriksion.
79Fer bann ki respekte twa vinn ver mwa
pou ki zot konn to bann lord.
80Ed mwa pou respekte to lansegnman kouma bizin
pou anpes mwa sibir imiliasion dan defet.
81Mo epwize telman mo atann to delivrans,
mo finn met mo lespwar dan to parol.
82Mo lizie pe trouv som telman mo atann to promes;
mo dir momem, “Kan to pou konsol mwa?”
83Mo santi mwa initil koumadir mo enn touk perse;
pourtan zame mo pa finn bliye to bann lansegnman.
84Komie letan mo pou bizin atann?
Kan to pou pini bann ki persekit mwa?
85Bann gran-nwar ki pa respekte to lalwa
finn plas bann piez partou lor mo sime.
86To bann instriksion ranpli ar laverite.
Mo lennmi pe persekit mwa san okenn rezon; ed mwa!
87Bann-la ti pre pou fini mwa, mo manke trouv lamor,
me mo pa finn abandonn to lansegnman.
88Ar to lamour infini, prezerv mo lavi,
pou ki mo kapav obeir lord ki to done.
89To parol, O SEGNER, li eternel
li fixe pou touletan dan lesiel.
90To fidelite li dire zenerasion apre zenerasion;
to finn met later dan so plas e li res stab.
91Par to lord tou kiksoz finn tini ziska zordi,
e kouma bon serviter, zot ekout twa.
92Si to lalwa pa ti lasours mo lazwa
depi lontan mo douler ti pou fini touy mwa.
93Zame mo pou inior to bann instriksion
parski gras-a zot mo ankor vivan.
94Mo lavi dan to lame! Sov mwa!
Mo finn touletan fer tou pou respekte to instriksion.
95Bann ki pratik lemal pe veye pou touy mwa
me mwa mo pou kontigne medit lor to ansegnman.
96Mo kone ki mem kiksoz parfe ena so limit
me to komannman li pena limit.
97O komie mo kontan to lalwa!
Lanwit-lizour mo medit lor to lalwa.
98To komannman grave dan mo latet;
akoz sa mo ena plis sazes ki mo lennmi.
99Parfwa mo konpran plis ki profeser
parski mo touletan pe medit lor to lansegnman.
100Mo lespri pli for ki lespri bann gran-dimounn
parski mwa mo obeir to instriksion.
101Mo finn evit konportman malsin
parski mo krwar dan to parol.
102Mo pa finn bliye okenn to bann regleman
parski twa ki mo profeser.
103To parol zot extra dou,
pli dou ki dimiel.
104To instriksion fer mwa vinn saz
akoz sa mo deteste move konportman.
105To lalwa li enn lalanp ki ekler mo sime;
enn far ki diriz mwa dan marenwar.
106Mo fer serman mo pou onor mo promes
pou obeir to bann instriksion ki baze lor drwatir.
107Mo douler, SEGNER, li atros;
re-donn mwa lavi selon to parol.
108Aksepte mo lapriyer aksiondegras, SEGNER,
e ansegn mwa to bann leson.
109Mo touletan pe pran risk ar mo lavi
me zame mo pa finn bliye to lalwa.
110Bann ki pratik lemal ti met piez partou lor mo larout;
malgre sa mo ti refiz dezobeir to lansegnman.
111To bann exizans finn grave dan mo lespri pou leternite;
zotmem ki met lazwa dan mo leker.
112Mo pou kontigne obeir to volonte
pou touzour, ziska lafin net.
113Mo deteste bann ki ezite pou swiv twa
me mwa, mo kontan to lalwa.
114Tomem mo protekter, mo sover;
mo fer konfians to parol.
115Sort divan mwa ale, zot tou serviter lemal!
Mwa mo respekte komannman mo Bondie.
116Donn mwa lafors kouma to ti promet pou ki mo viv;
pa desevwar mo lesperans.
117Ar to soutien mo pou an sekirite
e mo pou kontigne met to bann instriksion an pratik.
118To kondann bann ki dezobeir to instriksion
parski bann plan fos ki zot fer pa servi nanye.
119To tret bann move dimounn lor later kouma salte
akoz sa mo kontan to bann regleman.
120Mo rekonet ki mo per twa, mo mem gagn frison;
e mo gagn per to bann zizman.
121Mo finn fer tou seki mo krwar bon ek korek;
pa abandonn mwa dan grif bann opreser.
122Promet mwa ki to pou ed to serviter;
pa les bann gran-nwar fer dominer ar mwa.
123Mo lizie ki res ouver, zot fatige rod to sekour;
zot kontign rod delivrans ki to promet.
124Donn mwa zis seki to lamour infini komande
e ansegn mwa to bann regleman.
125Mwa mo zis to serviter; ekler mo lespri
pou mo aprann ek konpran to lansegnman.
126SEGNER, finn ler pou to azir,
parski dimounn pe dezobeir to lalwa.
127Mo vreman kontan to komannman plis ki lor,
plis ki lor pli fin ki ena.
128Alor san ezite mo swiv tou to bann instriksion
e mo deteste larout mansonz.
129Tou to bann lansegnman zot merveye;
alor ar tou mo leker mo met zot an pratik.
130Kan dimounn dekouver to parol sa li ekler zot lavi
e bann inioran trouv lizour.
131Telman mo anvi bwar to bann komannman
ki mo labous res gran ouver.
132Vinn ed mwa, akord mwa to lagras,
kouma to fer ar tou dimounn ki kontan twa.
133Dapre to parol, diriz mo pa pou mo pa tonbe;
pa les lemal devir mo lavi.
134Tir mwa dan latrap opreser
pou ki mo lib pou obeir to instriksion.
135Fer lalimier to prezans briy lor mwa, to serviter,
e ansegn mwa to regleman.
136Mo larm koule kouma robine
kan mo trouv dimounn dezobeir to lalwa.
137SEGNER, tomem lasours drwatir
e to lalwa li zis.
138To bann instriksion zot baze lor drwatir ek lazistis,
zot ranpli ar fidelite.
139Lakoler anflam mo lespri
akoz mo lennmi bliye to parol.
140To promes finn pas tou leprev.
Sa mo lavi sa, mo pli gran trezor!
141Mem si mo pa inportan e lezot mepriz mwa
zame mo tourn ledo ar to lansegnman.
142To drwatir li eternel
e to lalwa li laverite pou touletan.
143Traka ek tourman trangle mo lexistans
me to lalwa ranpli mo leker ar lazwa.
144To bann instriksion zot drwat pou leternite;
ekler mo lespri, koumsa mo kapav viv.
145Ar sinserite mo dimann to led; reponn mwa SEGNER
e mo pou fer tou seki to regleman dir.
146Mo sipliy twa: sov mwa,
e mo pou respekte to bann lord.
147Avan soley leve, mo priye twa pou dimann to led;
mo lespwar repoz lor to parol.
148Aswar mo pa dormi pou mo kapav medite,
mo medit lor tou to bann lansegnman.
149O SEGNER, akoz to lamour infini, ekout mo lapriyer;
e protez mo lavi, dapre to desizion.
150Bann ki persekit mwa avek kriote, zot pe raprose,
sa bann-la zot bien lwin ar to lalwa.
151Me twa SEGNER, to la koste ar mwa
e to komannman li vre pou touletan.
152Bien-bien lontan, mo ti aprann ki to bann instriksion
to finn etablir zot pou leternite.
153Pran kont mo douler e sov mwa
parski zame mo finn bliye to lalwa.
154Pran mo par e liber mwa;
sov mwa kouma to finn promet.
155Bann ki pratik lemal pa pou gagn delivrans
parski zot pa rod to bann regleman.
156Me twa, SEGNER, to konpasion li infini;
atraver to zizman prezerv mo lavi.
157Mo ena boukou lennmi e boukou persekiter,
me zame mo finn abandonn to regleman.
158Kan mo get sa bann tret-la mo gagn maloker
parski zot pa respekte to instriksion.
159Get mwa kouma mo kontan to lansegnman.
Parski to lamour li infini, prezerv mo lavi.
160Laverite samem leker to parol,
e to bann zizman ki drwat, zot pou reste pou leternite.
161Bann dimounn pwisan pe atak mwa pou nanye,
mwa mo ena gran respe pou to parol.
162To parol donn mwa gran lazwa
kouma kikenn ki finn dekouver enn gran trezor.
163Mo ayir ek deteste mansonz,
me mo kontan to lalwa.
164Set fwa par zour mo loue twa
pou to bann bon zizman baze lor lazistis.
165Bann ki kontan to lalwa zot viv dan lape
e nanye pa kapav fer zot tonbe.
166Mo pe atann ki to sov mwa SEGNER,
e mo akonplir to bann komannman.
167Mo obeir to lansegnman
ki mo kontan ar enn lamour sinser.
168Mo obeir to leson ek to instriksion;
to lizie trouv tou seki mo fer.
169SEGNER, les mo lapriyer rant dan to prezans;
ekler mo lespri dapre to parol.
170Aksepte mo siplikasion vinn dan to prezans
e sov mwa kouma to ti promet.
171Mo pou sant to louanz
parski to ansegn mwa to regleman.
172Mo pou sant to promes
parski to bann komannman li vre ek drwat.
173Res touletan la pou ed mwa
parski mwa mo touletan pe swiv to lord.
174Mo gran dezir se ki to sov mwa, O SEGNER,
e se to lalwa ki lasours mo boner.
175Protez mo lavi pou ki mo kapav kontigne
sant to grander e ed mwa ar to bann instriksion.
176Mo finn egare kouma enn brebi ki finn perdi sime;
vinn sers mwa, to serviter;
zame mo finn bliye to bann komannman.
Currently Selected:
Psom 119: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
