ROMA 16
16
Intsihhiisani
1Hho'oorén tí ta bay Foibe ngi dabaahúng i saayiím. Inós a sagadiyuso'ór kríshaanoó yaamaá Kenkrea. 2Inós ilaoohaak tawa Krishanto'ór adór kuungá'. Ilaoohaak ar adoodá' múk Mungú wa hariim. Inós umuúqo gár i sla'a dirhunge alee/iisaak. Asma inós múk yaariír gwa alee/iimaamís, tam aníng sleeme.
3Priska nee Akila intsihhiisaak. Inooín a sagadiyuuse dinkwa nee aníng ar baraá Kristo Yesu. 4Inooín kina lak iso tlaáq as slafingw'eé' nguwa ba/amisiya'. Aníng inooín in sluufmiís. Ala a aníng kilooeeneeká, ala tam kríshaanáy sleémeero oo múk xoordaá hatlá' inooín gin sluufmiis. 5Múk kríshaanáy kudá' baraá dooín wa saalaaliím intsihhiisaak sleeme.
Epaineto, sla'aarusmooeé', intsihhiisaak. Inós baraá yaamaá Asiaro a heé Kristo gwa geerí ya/an. 6Maria intsihhiisaak. Inós ina ló'wa daawimít as kuungá'. 7Androniko nee Yunia intsihhiisaak. Inooín a múk Yahudi adór aníng wa ale, kudá' aáng taa tseék dinkwa nee aníng. Inooín baraá ya/abuuseero ki iia tleer. Nee slám inooín nina giiriné' Kristo haratlintaaooro ta aninge.
8Ampliato intsihhiisaak. Inós a sla'aarusmooeé' baraá Aakoowo. 9Urbano intsihhiisaak. Inós a sagadiyusmo dinkwa nee atén baraá gadiyér Kristowo. Nee sla'aarusmooeé' Staku sleeme intsihhiisaak. 10Apele kudá' taa ya/án baraá Kristowo intsihhiisaak. Aristobulo nee múk do'ose intsihhiisaak. 11Herodiana intsihhiisaak, inós ar tlahhay'eé'. Nee múk doó Narkisi kudá' Kristo ngwa haratlinti'iyé' sleeme intsihhiisaak.
12Trufena nee Trufosa intsihhiisaak. Inooín gadiyér Aako ngina tlehhiitiyé' ar ilakaahara. Persi intsihhiisaak. Inós a sla'aarusmooeé' oo gadiyér Aako gaa ló'wa tleehh. 13Rufo intsihhiisaak. Inós a heé taa tsawaár baraá Aakoowo. Nee aayírós sleeme. Inós a adór aayír'eé' sleeme. 14Asunkrito intsihhiisaak, nee Flegoni nee Herme, nee Patroba nee Herma, nee hhaeedá' nee inooín dinkwa. 15Filologo nee Yulia intsihhiisaak, nee Nerea nee hho'oorós, nee Olumpa, nee múk hhohhó' oo Mungú sleémeero kudá' dinkwa nee inooín.
16Kuungá' kiloohúng ti intsihhiimise' ar ma'amisuú hhohhó'. Múk kríshaanáy sleémeero oo umuúqo dii kuungá' nu intsihhiimiis.
Axweesanoó alhhe'eesaay
17Hhaee'eé', án kuungá' nu harhheehhe'eés, ti harmagahhe' dír mukdá' tlaahhír qamiima nee kudá' dukuutsér qamiima. Asma inooín intsaahhasadár haratlintaao kuungá' taa sleeré' kaa sií'. Kuungá' ti paratle' dir'ine. 18Asma múk adór kwí Aakoorén Yesu Kristo gu sagadiyuusiiká, ala a gur'er'ín kilós kan sagadiyuus. Inooín múk hhaawuuse ngun al/aginá' ar axweesanay'ín oo tsatsaa'arén nee oo sla'atimís. 19Umuúqo heewo kangwhúng gwa axaás adór kuungá' tar múk iialoén dír Ya/abtór hhoe. Gawaá adoorihe aníng a qwalalaá/ as kuungá'. Ala aníng gár ni slaa' a kuungá' masók an múk sageloén baraá muruú hhoe, nee an daktana baraá muruudá' tlakwe. 20Nee Munguúduú wayduú hanmiís, inós kuungá' nu /uurií haniis oo Neetlaangw kuwa nakaa/aruura' ar gaanslaay baraá tsa/a'aá ya'aahúng i alé.
Aakoorén Yesu Kristo kuungá' nu tsuuqi.
21Timoteo, kudá' nee aníng algadiyuusá', inós kuungá' nu intsihhiimiis. Nee Lukio nee Yasoni nee Sosipateri sleeme nu intsihhiimisiyá'. Inooín a múk tlahhay'eé'.
22Anuúwí Tertio barwaárí ngaa gooiim, nu intsihhiimiís ar baraá Aako.
23Gayo kuungá' nu intsihhiimiis sleeme. Aníng a dahaaymoowós, nee múk kríshaanáy sleémeero in dír do'ós wa saalaalín. Erasto nu intsihhiimiis. Inós a heé peésár gixsari ga amohhe'eemaamiís. Nee hhiyaarén Kwarto sleeme kuungá' nu intsihhiimiis.
[ 24Aakoorén Yesu Kristo kuungá' nu tsuuqi. Amin.]
Xirif dír Mungú
25Mungú i xirfuuti. Inós ga aleesláy kuungá' nuwa gawdeesi baraá haratlintaaooro ar Ya/abtór hho', tidár daanduú Yesu Kristo, aníng ni alki/iit, nee ar lu/aaráydá' taa iimír aáng wa luú/ kuwa geehhooeés. 26Ala hamí lu/aaráydá' kwaa geehhooeés ar baraá gooír aaruuse. Nee lu/aaráydá' kwaa alki/iít dír múk xoordu sleémeero ar hara'ayaadár Munguúduú alhhe'eesay wásl, as múk xoordu sleémeero masók Ya/abtoodá' hho' ga iialooees kawa haratlintii'i.
27Munguúwí, inós kilós an Munguú sagalooár koóm. Inós i xirfuuti ar baraá Yesu Kristo ay alhhe'eesay wasle. Amin.
Currently Selected:
ROMA 16: IRQW
Highlight
Copy
Compare
Share
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
