ROMA 13
13
Múk geeraharuuse ilaiwawa/aak
1Umuúqo heewo geeraharuusér serikaáli ngi ilaiwawa/i, asma aleesleemuú amór Mungú dahhaaká i kaahh, nee aleesleemuudá' dáw kuna hara'ayín nee Mungú. 2Gawaá adoorihe heé heedá' aleesleemuú koóm gu waaqaqaa', hara'ayár Mungú gan waaqaqaá'. Nee kudá' siasiiá' ti sakwasleemár i slayá'. 3Asma kudá' waawuti'ii'imá', ta múk dae tlaaqiiká tawó alé as tlehhma'aá hho', ala a as tlehhma'aá tlakw. Xáy, kuúng a slá'a heé aleesleemuú koóm kuwa da'ayumitká? Gimáy, kuúng hhooeema na tleehheek, daqaní kuúng uri xirfayees. 4Asma inós a sagadiyusmoó Mungú, as hhooeema ngiwa kuúng i tleehhi. Ala bar tlakweemaá tleehhít, da'ayuút, asma tsataay gu tawó konká, ala a as tawa sagadiyusmoó Mungú oo li/oó bu'uúm dír mukdá' muruú tlákw tlehhiita. 5Gawaá adoorihe, ilaiwa/ame i hariín, as li/aay kilós kuwa da'ayumita'aaká, ala as afoodá' baraá munerhúng wa axwees.
6Gaarí an gár kuungá' tas koódír bu'uunda'. Asma mukdá' aleesleemuú koóm a sagadiyuusér Mungú, qoomár hariímár gadiyér'ín kawa boo/eemisi. 7Umuúqo heewo tidá' inós wa hariim haniisaak. Heé koódi, koódír i haniisaak, heé ohme, ohmér i haniisaak, kudá' daér wa hariím, da'ayuumitaak, kudá' ilaiwa/amér wa hariím, ilaiwawa/aak.
Sla'aarír hhae
8Hee muwa iinuús tam gár wake, ala masók gár uwa iinuusi aqo har sla'aari kilós. Asma heé heeqá' slaá', hara'aya gaa boo/eés. 9Hara'ayaarí kah, «Fuqi ma awaar, hee mu gaasaar, gár hee ma fiisaar, gár hee ma ilatleeruusaar,» hara'ayaarí nee hara'ayár hatlá' sleémeero kana haragaás baraá hara'ayaarí wák tidá' kah, «Inslaawmoowók slaeek adoodá' kuúng tir kilók sla'.» 10Heé sla'aarír koóm ga slaiiká hee nguwa gár tlaákw i tleehhi. Gawaá adoorihe sla'aari a boo/eemisuú hara'aya.
11Adoorí tleehhaak ar ilakaahara, asma kuungá' qoomaarí ta koomaan a xuá'. Slám a xuá' kuungá' gár tunduwa hariím, hamí an tleerá' baraá gu'uteero. Asma ba/ama hamí naa diréní naká/, ta ak qoomaadá' atén haratlintaao kawa iimu/uumani. 12Xweera naa harafaakiyé', tlaatla/aangw naa haranakaá/. Gawaá adoorihe tlehhmi'iidá' ki mawaán, nee xosluudaá slaqwara awa gwa/aateema ki oohaán. 13Atén masók an hootaán ar ilaiwa/ame ar adoodá' hotaá tlatla/aangw kiwa hariím. Ala mawa hootaán ar hheehha nee xufta, laqaá ar tsaatu'uuma nee ar slafíngw slasla/arén. Nee slám mawa hootaán ar gila nee da/i. 14Ala kuungá' Aako Yesu Kristo na oohaak tawa baqamorhúng, nee slám ma kumiitara' ilatleerír slaqoohúng kawa tleemisa'.
Currently Selected:
ROMA 13: IRQW
Highlight
Copy
Compare
Share
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
