TLEHHMA'AÁ YA/ABUUSE 28
28
Taa hardáh yaamaá Malta
1Tawa saxareemár hardahaán, kari tsaahhaán adór yaamuudá' kaahaar umuuwós tar Malta. 2Múk yaamuudá' tiri wa hhooáy. Qoomaadae tluwaay i tluuw nee tsaaqwa i ló'wa deer, inooín asla kari oohiís, atén tiri dahi'isiyé'. 3Paulo buhhaá migír giri buruumbuúr, giri qamín baraá asla. Dayshamo iri baraadá' wa ti'iít asma asla, dákw Paulo guri kiíhh, iri gawaá dákwí hambaleleiít. 4Múk yaamuudá' dayshamoodá' nguwa ár iwa hambaleele'miti, tiri kilooín babayé', «Heewí ánga/áw a tsu/utusmo, ala tim aa /uyi baraá tlawto, ala lo'o gu gáwtí geexeeraaká.» 5Ala Paulo dayshamoodá' guri kuukuú' baraá asla, ala inós adór aa laáq i káhh. 6Inooín geera ka xui in xir'iit, laqaá i yaamií huu' nee iri gwaa' ar gaanslaay. Kuri ló'wa daamarán naxés gár gwa eer iwa káhh, inslawoó muner'ín iri warqáy, tari káh, «Inós a mungú.»
7Didá' tseewe qamukaari i dayá' awa heé úr oo yaamuudá', umuuwós a Publio. Heewí tina dahi'ís ar mulqi'iima, har deelo tame atén tari dahaayeerós. 8Qoomaadae baabuú Publio i tiiq ga/atanto, nee i tseerdaá gusín. Paulo iri amoorós i dáh, iri firín, guri dabaawós i qaás, guri hungu/uús. 9Tí sleémeero iwa tleehharút, múk hatlá' oo tiqtuuse oo baraá yaamuudá', niri didií hardaráh, kuri hungu/uumiís. 10Inooín atén tiri ilaiwawa/iyé'. Qoomár tleemuurén iwa xáy, tiri muruú yaariír i hanmiís oo taqo sla'aana.
Paulo iwa Maltár wa tláy ay Roma
11Alaá slahheeraá tám niwa waaraahhiyé', tari tlawaán ar miringamooko amór Aleksandriár daáhh. Qoomár tsaaqwaro miringamoowí ina dír yaamuudá' wa hoót. Miringamoodá' umuuwós ku bay «Munguaá danga.» 12Tari hardahaán dír gixsár ta bay Sirakusa, tay didá' wa hootaán deelo tám. 13Tawa didá' wa tlawaán, tay hardahaán dír gixsár ta bay Regio. Looaytleérós fur'ár baskwá daahh iri fukukueeliín, nee bál tsár tari hardahaán dír gixsár ta bay Puteoli. 14Hhae kay amoodá' i awaán. Atén tiri ló'wa firiné' tawa al iwiwiitaan nee inooín deelo faanqwe. Nee aluudae tari hardahaán baraá yaamaá Roma. 15Amoodae hhae kangwrén nguna axaasiyé', atén tiri al'ayé' dirka mura' kuwa weerimaamisi ar ta bay Apio, nee dirka ta bay «Maraá tám awa /ayma.» Paulo hhae ngiwa ár, Mungú guri sluufiís, iri gurkwaá/.
Paulo iwa baraá yaamaá Roma
16Tawa dahaán baraá yaamaá Roma, Paulo pa/aangw guri sláy oo iwa hooti dír doó inós tawa kilós, inós nee askaarmoodá' gu xuúm.
17Alaá deelór tám iwa waaráhh, Paulo geeraharuusér múk Yahudi gari ateét as tiwa doogiya'. Tawa burumburiít, giri báy, «Hhaee'eé', aníng gár naa tleéhh i káhh, ar hariimaaká dír mukrene, nee tam uunuú baabi'iirén iga si'iiká. Ala tam adoorihe tina tseék Yerusalemú wa ale, tiri qaás baraá dabaá múk Roma. 18Nee inooín aníng yaahamisuuwo tiwa hhe'eés, tina slaá' tiwa gweeri, asma gár naa tleéhh i káhh ar tis gaasi. 19Ala múk Yahudi adoodá' ngiwa sií', aníng adór hatlá' ar ni laaq iri qwát, aqo har kwasleemar'eé' ngiwa waarahhaas amór waawutmoó múk Roma. Ala aníng /aymuú múk xooror'eé' nguwa sakwasleemuut i kaahh. 20Ala gawaá adoorihe án kuungá' nuna ateét, iwa artá eera' nee tawa al'axweesaan. Asma aníng taa tseék ar pínguuwí as haraxu'utír múk Israeli.»
21Inós kuri báy, «Atén barwár kangók koom aga slawaaniiká, ar amór yaamaá Yudeár daahh. Ala tam hhiyoó wák oo naa amoorí hardah i kaahh, oo kangók ngwa oo', laqaá oo /aymuú tlaákw ngwa oo' daanduuwoge. 22Ala hamí a dirók wa sla'aán axaasaro adór kuúng ta ara'aan. Asma atén gár taa axaasaán a diínisíng kuúng taa eehát, kan afo tlakweemiis umuúqo diiro.»
23Deelo kari al'axweés ar kuwa iiárií qaasár ay. Múk ló'wa yaariír guri i daqáy dír do'dá' inós i hooti. Iimír matlaatle ay tsiindo Paulo kángw waawuti'iimár Mungú guri dir'íní alki/iít ar axweesanoó aleesleemuú koóm, gari laqaqán ar gooír Mose nee aaruuse adór Yesu tar Kristo. 24Bahh'alé axweesantadá' ngiri haratlinti'iyé', ala bahh'alé ngaa haratlinti'ii'iiká. 25Ala inooín awa kilá' ti slaslay'aaká, qoomár tawa tlatlay Paulo /aymi'iiká' ngina oó', «Qeeruú hhoohhoó' oo Mungú looeema gaa káh qoomár iwa axweés dír baabi'iihúng ar afkú aarusmo Isaya. 26Asma gár aa oó' a tí,
‹Tláw amór mukwí, ku beer,
kuungá' a mak axamisá',
ala a tsahha'aaká.
A mak xumisá',
ala a aanda'aaká.
27Asma fuqurángw mukwí aa daktu'uút,
nee iaaín ki ilo' gaa axaasaro.
Slám ilaaín kaa gumamaá',
gaa makawa ár ilaaine,
nee makawa axaás iaaine,
nee makawa tsaáhh fuqurangw'ine,
nee muner'ín makawa warqeés
án ngiri hungu/uús.›
28«Ala kuungá' xuaak adór ba/amár Mungú kara huúw amór xoordaá hatlá', nee inooín ka iiárií qaas.» [ 29Adoodá' ooaro ngiwa hhe'eés, múk Yahudi iri diya/aát, muruú yaariire tiri kilooín yaahamisiyé'.]
30Paulo do'dá' aa hoót, inósuú kilá' guna bu'ún, iri hoót didá' wa ale kureeri tsár. Muu sleémeero kudá' aa amoorós kakay guri dahi'imís. 31Kángw waawuti'iimár Mungú guri alki/iít, nee kángw Aako Yesu Kristo guri intsaahhatimís ar pihh'uuma, nee heé inós gwa ilaa/ i kaahh.
Currently Selected:
TLEHHMA'AÁ YA/ABUUSE 28: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
