أَيُّكَنْ مَنْذَنِّے 25
25
بُلُسْ يَطَوْكَكَ ڧَارَ ذُوَا غَبَنْ كَيْسَرْ
1تُواْ، بَايَنْ ݣُونَ عُكُ دَ ڢٜىٰسْتُسْ يَ إِسُواْ دُواْمِنْ يَكَامَ عَيْكِنْ ڠُومْنَ، سَيْ يَتَاشِ دَغَ كَيْسَرِيَ يَتَڢِے عُرُوشَلِيمَ؞ 2سَيْ مَنْيَنْ ڢِرِسْتُواْثِے دَ شُوغَبَنِّنْ يَهُودَاوَا سُكَ كَيْ ڧَارَرْ بُلُسْ أَوُرِنْسَ؞ سُكَ ضُواْڧٜىٰشِ، 3يَسَا أَ مَيْدَ بُلُسْ عُرُوشَلِيمَ دُواْمِنْ سُنْ شِرْيَ وَطَنْسُ سُجِرَا سُكَشٜىٰشِ أَ حَنْيَ؞ 4ڢٜىٰسْتُسْ يَأَمْسَ يَثٜىٰ «أَنَ غَادِنْ بُلُسْ أَ كَيْسَرِيَ، نِے دَكَيْنَ ذَنْجٜىٰ ثَنْ بَادَ جِمَاوَا بَ؞ 5سَبُواْدَ حَكَ سَيْ مَنْيَنْكُ سُذُواْ تَرٜىٰدَنِ، عِدَنْ كُوَ مُتُمِنَّنْ يَنَدَ وَنِ لَيْڢِے سَيْ سُكَٰوُاْ ڧَارَرْسَ؞»
6بَيْڢِے ݣُونَ تَݣُوسْ كُواْ غُواْمَ أَوُرِنْسُ بَ، سَيْ يَكُواْمَ كَيْسَرِيَ؞ وَشٜىٰغَرِ كُمَ يَذَوْنَ عَكُجٜىٰرَرْ شَرِيعَ، يَسَا عَكَٰوُاْ بُلُسْ أَغَبَنْسَ؞ 7دَ بُلُسْ يَذُواْ، يَهُودَاوَنْ دَ سُكَذُواْ دَغَ عُرُوشَلِيمَ سُكَتَاشِ سُكَ كٜىٰوَيٜىٰشِ، سُنَ تَكَٰوُاْ ڧَارَ مَاسُيَوَ، مَاسُ ڟَنَنِ عَكَنْسَ، وَطَنْدَ مَا بَسُ عِيَ تَبَّتَرْوَبَ؞ 8عَمَّا بُلُسْ يَكَارٜىٰ كَنْسَ يَثٜىٰ «نِے بَنْيِ وَكُواْيَرْوَرْ يَهُودَاوَا لَيْڢِے بَ، بَنْكُمَيِ وَهَيْكَلِ، كُواْ كَيْسَرْ لَيْڢِے بَ كُواْ كَطَنْ؞»
9عَمَّا ڢٜىٰسْتُسْ يَنَ سُواْ يَڢَرَنْتَ وَ يَهُودَاوَا رَيْ، يَتَمْبَيِ بُلُسْ «كُواْ كَيَرْدَ كَجٜىٰ عُرُوشَلِيمَ عَيِمَكَ شَرِيعَ أَغَبَنَ عَثَنْ غَمٜىٰدَ وَطَنَّنْ أَبُبُوَ؟»
10عَمَّا بُلُسْ يَثٜىٰ «إِنَ غَبَنْ كُواْتُنْ كَيْسَرْ، أَنَنْ نٜىٰ يَا كَمَاتَ عَيِمِنِ شَرِيعَ؞ بَنْيِ وَ يَهُودَاوَا وَنِ لَيْڢِے بَ، كَيْ مَا كَسَنْ دَ حَكَ سُواْسَيْ؞ 11عِدَنْ نِے مَيْ لَيْڢِے نٜىٰ، حَرْ نَيِ لَيْڢِنْدَ يَ إِسَ عَكَشٜىٰنِ، أَيْ، بَذَنْڧِ عَكَشٜىٰنِبَ؞ عَمَّا عِدَنْ بَا وَتَ غَسْكِيَ عَثِكِنْ ڧَارَرْ دَسُكٜىٰيِ، تُواْ، بَا مَيْ عِيَ بَادَنِ غَرٜىٰسُ؞ نَا ضُواْڧَا أَطَوْكَكَ ڧَارَتَ ذُوَا غَبَنْ كَيْسَرْ؞»
12بَايَنْدَ ڢٜىٰسْتُسْ يَيِ شَوَرَا دَ مَجَلِسَرْسَ، سَيْيَأَمْسَ يَثٜىٰ «تُواْ، كَا ضُواْڧَا أَطَوْكَكَ ڧَارَرْكَ ذُوَا غَبَنْ كَيْسَرْ، وُرِنْ كَيْسَرْ كُوَ ذَاكَتَڢِے؞»
بُلُسْ أَغَبَنْ أَغِرِڢَّ دَ بَنِسْ
13بَايَنْ یَنْ ݣُونَكِے، سَرْكِے أَغِرِڢَّ دَ بَنِسْ سُكَذُواْ كَيْسَرِيَ دُواْمِنْ سُمَرَبْثِ ڢٜىٰسْتُسْ؞ 14تُنْدَ ذَاسُيِ ݣُونَكِے دَ دَامَ أَوُرِنْ، سَيْ ڢٜىٰسْتُسْ يَكَٰوُاْ مَغَنَرْ بُلُسْ غَ سَرْكِے؞ ڢٜىٰسْتُسْ يَثٜىٰ «أَݣَويْ وَنِ مُتُمِنْ دَ ڢٜىٰلِسْ يَبَرْ مِنِ عَكُرْكُكُ؞ 15لُواْكَثِنْ دَ نَكٜىٰ عُرُوشَلِيمَ مَنْيَنْ ڢِرِسْتُواْثِے دَ شُوغَبَنِّنْ يَهُودَاوَا سُكَ كَٰوُاْ مِنِ ڧَارَرْ مُتُمِنَّنْ، سُكَ ضُواْڧٜىٰنِ إِنْيَنْكٜىٰ مَسَ حُكُنْثِ؞ 16عَمَّا نَا غَيَ مُسُ ثٜىٰوَ مُو رُواْمَاوَا بَمُسَابَايِ وَمَيْ لَيْڢِے شَرِيعَبَ، سَيْ أَنْكَٰوُاْ شِ أَغَبَنْ مَاسُ ڧَارَرْسَ ڢُسْكَ دَ ڢُسْكَ، سَيْ أَنْكُمَ بَاشِ ظَرَڢِ دُواْمِنْ يَكَارٜىٰ كَنْسَ غَمٜىٰدَ ڧَارَرْ دَ عَكَيِ؞ 17سَبُواْدَ حَكَ دَ سُكَذُواْ نَنْ تَرٜىٰدَنِ، بَنْ ٻَاتَ لُواْكَثِبَ، وَشٜىٰغَرِ كَوَيْ نَهَوْ كُجٜىٰرَرْ شَرِيعَ، نَكُمَ سَا عَكَٰوُاْ مُتُمِنْ؞ 18دَ مَاسُ ڧَارَرْ سُكَتَاشِ، بَسُ كَٰوُاْ ڧَارَرْسَ عَكَنْ وَنِ مُومُّنَنْ لَيْڢِنْدَ نَكٜىٰ ڟَمَّنِ يَيِبَ؞ 19سَيْ دَيْ سُنَدَ وَطَنْسُ مَغَنْغَنُنْ دَ بَسُ يَرْدَ دَ بُلُسْ عَكَيْبَ، غَمٜىٰدَ أَدِّينِنْسُ دَ وَنِ عِيسَىٰ وَنْدَ يَمُتُ، وَنْدَ بُلُسْ يَنَاثٜىٰ ثٜىٰوَ يَنَدَ رَيْ؞ 20نِے كُوَ دَ نَرَسَ يَدَّ ذَنْ بِنْثِكٜىٰ وَطَنَّنْ أَبُبُوَ، سَيْ نَتَمْبَيِ بُلُسْ كُواْ يَيَرْدَ يَجٜىٰ عُرُوشَلِيمَ عَيِمَسَ شَرِيعَ عَثَنْ غَمٜىٰدَ أَبُبُوَنَّنْ؞ 21عَمَّا دَ يَنٜىٰمَ أَڟَيَرْ دَ مَغَنَرْسَ دُواْمِنْ بَبَّنْ سَرْكِے كَيْسَرْ يَيَنْكٜىٰ مَسَ شَرِيعَ، سَيْ نَبَادَ عُمَرْنِ عَيِ غَادِنْسَ حَرْ ذُوَا لُواْكَثِنْ دَ ذَنْعَيْكَ دَشِ وُرِنْ كَيْسَرْ؞»
22سَيْ سَرْكِے أَغِرِڢَّ يَثٜىٰ وَ ڢٜىٰسْتُسْ «نِے مَا دَيْ ذَنْسُواْ إِنْسَوْرَرِ مُتُمِنَّنْ دَكَيْنَ؞»
ڢٜىٰسْتُسْ يَثٜىٰ «ذَاكَ كُوَ جِيشِ غُواْبٜىٰ؞»
23تُواْ، وَشٜىٰغَرِ سَيْ أَغِرِڢَّ دَ بَنِسْ سُكَ شِغُواْ دَ دَرَجَ إِرِنْ تَسَرَاكُنَ، سُنْذُواْ تَرٜىٰدَ شُوغَبَنِّنْ يَاڧِ دَ كُمَ مَنْيَنْ غَرِنْ؞ سَيْ ڢٜىٰسْتُسْ يَبَادَ عُمَرْنِ أَ شِغُواْ دَ بُلُسْ؞ 24سَيْ ڢٜىٰسْتُسْ يَثٜىٰ «سَرْكِے أَغِرِڢَّ دَ دُكَنْ مُتَنٜىٰنْ دَسُكٜىٰ نَنْ تَرٜىٰدَمُو، غَا مُتُمِنْ دَ دُكْ جَمَعَرْ يَهُودَاوَا سُكَ كَٰوُاْ مِنِ ڧَارَرْسَ أَ عُرُوشَلِيمَ دَ كُمَ أَنَنْ، حَرْ سُنَ إِيهُ وَيْ بَيْكَمَتَ عَبَرْشِ دَ رَيْبَ؞ 25عَمَّا نِے بَنْ غَا يَيِ وَنِ أَبِنْدَ يَ إِسَ عَكَشٜىٰشِيبَ؞ تُنْدَ كُمَ شِ دَكَنْسَ يَنٜىٰمَ عَكَيْ شَرِيعَرْسَ غَبَنْ مَيْغِرْمَ كَيْسَرْ، نَثٜىٰ تُواْ ذَنْعَيْكَ دَشِ وُرِنْسَ؞ 26عَمَّا بَانِ دَ وَتَ تَبَّتَاثِّيَرْ مَغَنَرْ دَ ذَنْ رُبُوتَ وَمَيْغِرْمَ سَرْكِنْ رُواْمَ عَكَنْسَ؞ سَبُواْدَ حَكَ نَكَٰوُاْشِ غَبَنْكُ، مُسَمَّنْ غَبَنْكَ، سَرْكِے أَغِرِڢَّ، دُواْمِنْ بَايَنْدَ مُكَ بِنْثِكٜىٰشِ، كُواْ ذَنْسَامِ أَبِنْدَ ذَنْ رُبُوتَ؞ 27دُوانْ نِے أَغَنِينَ، وَوَنْثِنٜىٰ أَعَيْكَ دَ طَنْ كُرْكُكُ، بَاتَرٜىٰدَ أَنُّونَ لَيْڢُواْڢِنْ دَ يَيِبَ؞»
Currently Selected:
أَيُّكَنْ مَنْذَنِّے 25: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
