1 سَرَاكُنَ 12
12
ذُرِيَرْ أَرٜىٰوَ سُنْيِ تَاوَيٜىٰ
﴿2 تَارْ 10.1-19﴾
1رٜىٰهُواْبُواْوَمْ يَتَڢِے شٜىٰكٜىٰمْ، غَمَا دُكَنْ جَمَعَرْ إِسْرَٰٓءِيلَ سُنْ تَارُ أَوُرِنْ دُواْمِنْ سُنَطَشِ سَرْكِے؞ 2سَعَدَّ يٜىٰرُواْبُواْوَمْ طَنْ نٜىٰبَتْ يَجِ لَابَرِ ذَاعَ نَطَ رٜىٰهُواْبُواْوَمْ سَرْكِے، يٜىٰرُواْبُواْوَمْ يَنَدَ ذَمَ عَڧَسَرْ مَصَرْ، عِنْدَ يَغُجٜىٰ وَ سُلَيْمَٰنُ؞ 3مُتَنٜىٰ سُكَ عَيْكَ عَكِرَا يٜىٰرُواْبُواْوَمْ يَذُواْ؞ سَيْ شِے دَ دُكَنْ تَارُوانْ جَمَعَرْ إِسْرَٰٓءِيلَ سُكَ تَڢِے وُرِنْ رٜىٰهُواْبُواْوَمْ سُكَثٜىٰ، 4«بَابَنْكَ يَسَامُ غُنْغُمٜىٰنْدَ يَدَنّٜىٰمُ سُواْسَيْ؞ يَنْذُ عِدَنْ كَسَوْڧَڧَ مَنَ أَيُّكَنَّنْ دَ سُكَ دَنّٜىٰمُ، كَكُمَ ضَغٜىٰ أَبُبُوَ مَاسُ نَوْيِنْدَ يَسَا عَكَنْمُ، تُواْ، ذَامُيِ مَكَ حِدِمَ؞» 5سَيْ سَرْكِے رٜىٰهُواْبُواْوَمْ يَثٜىٰمُسُ «كُتَڢِے، بَايَنْ ݣُونَ عُكُ كُدَاوُاْ كُكَرْٻِ أَمْسَ؞» سَيْ مُتَنٜىٰنْ سُكَ تَڢِے؞
6سَعَنً رٜىٰهُواْبُواْوَمْ يَنٜىٰمِ شَوَرَرْ ڟُواْڢَڢِّنْ مَذَنْ دَ سُكَيِ وَبَابَنْسَ سُلَيْمَٰنُ حِدِمَ لُواْكَثِنْ دَ يَكٜىٰدَ رَيْ؞ يَثٜىٰ مُسُ «وَثٜىٰ شَوَرَا ذَاكُ بَانِ دُوانْ إِنَمْسَ وَمُتَنٜىٰنَّنْ؟» 7سُكَثٜىٰ مَسَ «عِدَنْ يَوْ كَنَ سُواْ كَيِ وَمُتَنٜىٰنَّنْ حِدِمَ، كَكُمَيِ مُسُ عَيْكِ، سَيْ كَأَمْسَ مُسُ دَ مَغَنَ مَيْݣَوْ، سُو كُوَ ذَاسُ ذَمَ بَايِنْكَ مَاسُ أَمِنْثِ حَرْ أَبَدَا؞» 8عَمَّا رٜىٰهُواْبُواْوَمْ يَڧِ شَوَرَرْ دَ ڟُواْڢَڢِّنْ مَذَنَّنْ سُكَ بَاشِ، سَيْ يَبِے شَوَرَرْ سَمَارِنْ دَ سُكَيِ غِرْمَ تَرٜىٰ دَشِ، وَطَنْدَ يَنْذُ سُونٜىٰ سُكٜىٰ بَاشِ شَوَرَا؞ 9يَثٜىٰ مُسُ «وَثٜىٰ شَوَرَا ذَاكُ بَانِ دُوانْ مُأَمْسَا وَمُتَنٜىٰنَّنْ وَطَنْدَ سُكَثٜىٰ مِنِ، ‹كَسَوْڧَڧَ مَنَ نَوْيِنْ غُنْغُمٜىٰنْ بَابَنْكَ وَنْدَ يَدَنّٜىٰمُ›؟»
10سَيْ سَمَارِنْ دَ سُكَيِ غِرْمَ تَرٜىٰدَ رٜىٰهُواْبُواْوَمْ سُكَثٜىٰ مَسَ «غَا أَمْسَرْ دَ ذَاكَبَا وَطَنْدَ سُكَثٜىٰ، ‹بَابَنْكَ يَسَا مَنَ غُنْغُمٜىٰ وَنْدَ يَدَنّٜىٰمُ سُواْسَيْ، بَرِ كَيْ كَسَوْڧَڧَ مَنَ؞› كَأَمْسَ مُسُ كَثٜىٰ، ‹ڧَرَمَرْ يَڟَاتَ تَاڢِ ݣُونْݣُوسُوانْ بَابَنَ كَوْرِ؞ 11بَابَنَ يَسَا مُكُ غُنْغُمٜىٰنْدَ يَدَنّٜىٰكُ سُواْسَيْ، عَمَّا ذَنْ ڧَارَ دَنّٜىٰكُ؞ بَابَنَ يَدُوكٜىٰكُ دَ بُلَلَ، عَمَّا نِے ذَنْ هُواْرٜىٰكُ دَ كُنَمَيْ!› »
12بَايَنْ ݣُونَ عُكُ سَيْ يٜىٰرُواْبُواْوَمْ دَ دُكَنْ جَمَعَ سُكَ دَاوُاْ وُرِنْ رٜىٰهُواْبُواْوَمْ بِسَغَ يَدَّ يَڢَطَا مُسُ؞ 13سَرْكِے يَڧِ شَوَرَرْ دَ ڟُواْڢَڢِّنْ مَذَنْ سُكَ بَاشِ، سَيْ يَيِ وَمُتَنٜىٰنْ مَغَنَ مَيْ ذَاڢِ؞ 14يَيِ مَغَنَ بِسَغَ شَوَرَرْ دَ سَمَارِنْ سُكَ بَاشِ ثٜىٰوَ «بَابَنَ يَسَا مُكُ غُنْغُمٜىٰنْدَ يَدَنّٜىٰكُ سُواْسَيْ، عَمَّا ذَنْ ڧَارَ دَنّٜىٰكُ؞ بَابَنَ يَدُوكٜىٰكُ دَ بُلَلَ، عَمَّا نِے ذَنْ هُواْرٜىٰكُ دَ كُنَمَيْ؞» 15سَرْكِے بَيْ سَوْرَرِ جَمَعَرْبَ؞ غَمَا نُڢِنْ يَهْوٜىٰهْ نٜىٰ دُواْمِنْ يَكَٰوُاْ ثِكَرْ مَغَنَرْسَ دَ يَيِ غَ يٜىٰرُواْبُواْوَمْ طَنْ نٜىٰبَتْ تَبَاكِنْ أَنَّبِے أَهِيَ مُتُمِنْ شِلُواْ؞
16عَمَّا سَعَدَّ إِسْرَٰٓءِيلَ دُكَ سُكَغَ ثٜىٰوَ سَرْكِے بَيْ سَوْرَرٜىٰسُبَ، سَيْ مُتَنٜىٰنْ سُكَ أَمْسَوَ سَرْكِے سُكَثٜىٰ،
«إِنَا ضُوَنْمُ دَ دَاوُدَ!
أَيْ! بَامُ دَ غَادُواْ أَوُرِنْ طَنْ يٜىٰسّٜىٰ؞
يَا إِسْرَٰٓءِيلَ، كُواْوَ يَكُواْمَ تٜىٰنْتِنْسَ!
يَا دَاوُدَ، سَيْكَلُورَ دَ غِدَنْكَ؞»#2 سَمْ 20.1
دُواْمِنْ حَكَ مُتَنٜىٰنْ إِسْرَٰٓءِيلَ سُكَ وَڟٜىٰ، كُواْوَ يَكُواْمَ غِدَنْسَ؞ 17عَمَّا رٜىٰهُواْبُواْوَمْ يَثِيغَبَدَ يِنْ مُلْكٍ مُتَنٜىٰنْ إِسْرَٰٓءِيلَ وَطَنْدَ سُكٜىٰ أَغَرُضُوً يَنْكِنْ يَهُودَ؞
18سَعَنً سَرْكِے رٜىٰهُواْبُواْوَمْ يَعَيْكِ أَدُواْنِرَمْ شُوغَبَنْ عَيْكِنْ دُواْلٜىٰ ذُوَاغَ مُتَنٜىٰنْ إِسْرَٰٓءِيلَ، سَيْ دُكَنْ مُتَنٜىٰنْ إِسْرَٰٓءِيلَ سُكَ جٜىٰجّٜىٰڢٜىٰشِ دَ دُوَڟُو سُكَ كَشٜىٰشِ؞ غَنِنْ حَكَ، رٜىٰهُواْبُواْوَمْ يَيِ سَوْرِ يَشِغَ كٜىٰكٜىٰنْ دُواْكِنْسَ يَغُدُ ذُوَا عُرُوشَلِيمَ؞ 19تُنْدَغَ وَنَّنْ لُواْكَثِ، مُتَنٜىٰنْ أَرٜىٰوَثِنْ إِسْرَٰٓءِيلَ سُكَ شِغَ غَابَادَ غِدَنْ دَاوُدَ هَرْوَيَوْ؞
20سَعَدَّ كُمَ دُكَنْ إِسْرَٰٓءِيلَ سُكَجِ ثٜىٰوَ يٜىٰرُواْبُواْوَمْ يَدَاوُاْ، سُكَ عَيْكَ مَسَ يَذُواْ وُرِنْ تَارُوانْ جَمَعَرْ إِسْرَٰٓءِيلَ سُكَ نَطَشِ سَرْكِنْ إِسْرَٰٓءِيلَ؞ بَابُوَنْدَ يَبِے غِدَنْ دَاوُدَ، سَيْ ذُرِيَرْ يَهُودَ كَطَيْ؞
رَبُوَرْ مُلْكِ
﴿2 تَارْ 11.1-4﴾
21دَ رٜىٰهُواْبُواْوَمْ يَ إِسُواْ عُرُوشَلِيمَ، سَيْ يَتَارَ سُواْجُواْجِ مَڢِيَ عِيَ يَاڧِ دُبُو طَرِے دَ دُبُو تَمَٰنِنْ دَغَ غِدَنْ يَهُودَ دَ نَ بِلِيَامِنُ؞ عَكَ شِرْيَ كَيْ وَ غِدَنْ إِسْرَٰٓءِيلَ يَاڧِ، دُواْمِنْ أَ مَيْدَسُو ڧَرْڧَشِنْ مُلْكٍ رٜىٰهُواْبُواْوَمْ طَنْ سُلَيْمَٰنُ؞ 22عَمَّا اللَّهْ يَيِ مَغَنَ دَ شٜىٰمَيَ مُتُمِنْ اللَّهْ ثٜىٰوَ 23«كَثٜىٰ وَ رٜىٰهُواْبُواْوَمْ طَنْ سُلَيْمَٰنُ سَرْكِنْ يَهُودَ دَ دُكَنْ غِدَنْ يَهُودَ دَ نَ بِلِيَامِنُ دَ كُمَ سَوْرَنْ مُتَنٜىٰنْ، 24‹إِنْجِ يَهْوٜىٰهْ «كَدَ كُڢَاطَ وَیَنْعُوَنْكُ إِسْرَٰٓءِيلَاوَا دَ يَاڧِ؞ بَرِ كُواْوَنٜىٰ مُتُمْ يَكُواْمَ غِدَنْسَ، غَمَا وَنَّنْ أَبُ دَغَ وُرِينَ نٜىٰ؞» › » سَيْ سُكَيِ بِيَيَّ دَ مَغَنَرْ يَهْوٜىٰهْ، سُكَ كُواْمَ غِدَاجٜىٰنْسُ بِسَغَ عُمَرْنِنْ يَهْوٜىٰهْ؞
رَبُوَرْ مُلْكِ سَبُواْدَ أَدِّينِ
25سَيْ يٜىٰرُواْبُواْوَمْ سَرْكِنْ إِسْرَٰٓءِيلَ يَڠَغْڠَرَ شٜىٰكٜىٰمْ وَنْدَ يَكٜىٰ عَيَنْكِنْ تُدَّيْ نَ إِڢْرَيِمْ، يَيِ ذَمَ أَوُرِنْ؞ دَغَ وُرِنْ يَتَڢِے يَڧَارَ غِنَا غَرِنْ ڢٜىٰنُوٜىٰلْ؞ 26يٜىٰرُواْبُواْوَمْ يَيِ تُنَانِ أَ ذُوثِيَارْسَ يَثٜىٰ «لَلَّيْ مُلْكٍ ذَيْ كُواْمَ وُرِنْ غِدَنْ دَاوُدَ 27عِدَنْ نَا بَرْ مُتَنٜىٰنَّنْ سُهَوْرَ ذُوَا عُرُوشَلِيمَ سُمِيڧَ هَدَايُنْسُ غَ يَهْوٜىٰهْ؞ عِدَنْ سُنْيِ حَكَ، ذُوثِيَارْسُ ذَاتَ كُواْمَ غَ رٜىٰهُواْبُواْوَمْ سَرْكِنْ يَهُودَ، ذَاسُ كُوَ كَشٜىٰنِ سُكُواْمَ غَرٜىٰشِ؞»
28سَبُواْدَ حَكَ سَرْكِے يَنٜىٰمِ شَوَرَا، يَيِ صِڢُّواْڢِنْ یَنْ بِجِمَيْ بِيُ نَظِينَارِيَ؞ سَعَنً يَثٜىٰ وَمُتَنٜىٰنْ «كُنْ دَطٜىٰ كُنَ تَڢِيَ ثَنْ عُرُوشَلِيمَ دُواْمِنْ سُجَّدَ؞ تُواْ، غَا أَلُّواْلِنْكُ، يَا إِسْرَٰٓءِيلَ، وَطَنْدَ سُكَ ڢِتَرْ دَكُو دَغَ ڧَسَرْ مَصَرْ؞»#ڢِتْ 32.4 29يَكَڢَ طَيَ أَغَرِنْ بٜىٰتٜىٰلْ، سَعَنً طَيَنْ كُمَ أَغَرِنْ دَنْ؞ 30وَنَّنْ يَذَمَ ذُنُوبِ، غَمَا مُتَنٜىٰ سُنَ تَڢِيَ يِوَصِڢُّواْڢِنْ یَنْ بِجِمَيْ سُجَّدَ أَ بٜىٰتٜىٰلْ دَ دَنْ؞ 31يٜىٰرُواْبُواْوَمْ يَغِنَ وَطَنْسُ وُرَارٜىٰنْ سُجَّدَ، يَكُمَ نَطَ ڢِرِسْتُواْثِے بَرْكَتَيْ دَغَ ثِكِنْ مُتَنٜىٰنْدَ بَ نَظُرِيَرْ لَوِ بَ؞
32يٜىٰرُواْبُواْوَمْ يَكُمَ كَڢَ بِكٍ أَدِّينِ أَ رَانَ تَغُواْمَشَا بِيَرْ نَوَتَنْ تَݣُوسْ دَيْدَيْ كَمَرْ بِكٍ أَدِّينِنْ دَ عَكٜىٰيِ أَ يَهُودَ؞ عَكَنْ بَغَدٜىٰنْ دَيَكٜىٰ أَ بٜىٰتٜىٰلْ، يٜىٰرُواْبُواْوَمْ يَمِيڧَ هَدَايُ غَ صِڢُّواْڢِنْ یَنْ بِجِمَيْ نَظِينَارِيَرْ نَنْ دَ يَيِ؞ أَ بٜىٰتٜىٰلْ كُمَ يَنَطَ ڢِرِسْتُواْثِے نَوَطَنْسُ وُرَارٜىٰنْ سُجَّدَ، وَطَنْدَ يَغِغِّنَ؞#لِـ ڢِرْ 23.33-34 33أَ رَانَ تَغُواْمَشَا بِيَرْ غَ وَتَنْ تَݣُوسْ، وَدَّ تَكٜىٰ رَانَرْدَ شِے كَنْسَ يَشِرْيَ، يَكَڢَ بِكٍ أَدِّينِ دُواْمِنْ مُتَنٜىٰنْ إِسْرَٰٓءِيلَ؞ أَ رَانَرْ يَتَڢِے بٜىٰتٜىٰلْ يَهَوْ بَغَدٜىٰنْ دُواْمِنْ يَڧُواْنَ تُرَارٜىٰ عَكَيْ؞
Currently Selected:
1 سَرَاكُنَ 12: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
