Mose I 46

Yakob kple eƒe ƒometɔwo yi Egipte

1Ale Yakob ƒo ƒu eƒe nuwo katã eye wòdze mɔ yi Beer-Seba. Esa vɔ na tɔ́a Isak ƒe Mawu la le afi ma. 2Mawu ƒo nu nɛ le ŋutega me le zã me. Eyɔe be: “Yakob, Yakob!” Etɔ be: “Nyee nye esi!” 3Tete Mawu gblɔ nɛ be: “Nyee nye Mawu, tɔ́wò ƒe Mawu la. Mègavɔ̃ Egipte yiyi o, elabe mawɔ wò nàzu dukɔ gã aɖe le afi ma. 4Nye ŋutɔ mayi Egipte kpli wò, eye nye ŋutɔ magakplɔ wò agbɔe. Yosef akpɔ wò kuƒe eye wòalé wò ŋkuyiwo akpe.” 5Azɔ Yakob dze mɔ tso Beer-Seba. Via ŋutsuawo tsɔ eya, wo viwo kple wo srɔ̃wo de tasiaɖam siwo Egipte Fiagã ɖo ɖa la me. 6#Dɔw 7.15. Wokplɔ woƒe lãwo, eye wotsɔ woƒe kesinɔnu siwo katã wokpɔ le Kanaan-nyigba dzi, eye woyi Egipte. Yakob kplɔ eƒe dzidzimeviwo katã hã yii. 7Ekplɔ via ŋutsuwo kple eƒe tɔgbuiyɔviŋutsuwo, via nyɔnuwo kple eƒe tɔgbuiyɔvinyɔnuwo katã yi Egipte.

8Yakob vi siwo yi Egipte kplii la woe nye: eƒe ŋgɔgbevi Ruben. 9Ruben viŋutsuwoe nye: Henox, Palu, Xezron kple Karmi. 10Simeon viŋutsuwoe nye: Yemuel, Tamin, Ohad, Yaxin, Zoxar kple Saul, Kanaan-nyɔnu ƒe vi. 11Levi viŋutsuwoe nye: Gerson, Kahat kple Merari. 12Yuda viŋutsuwoe nye: Er, Onan, Sela, Perez kple Serax. Er kple Onan ya ku le Kanaan-nyigba dzi. Perez viŋutsuwoe nye Xezron kple Xamul. 13Isaxar viŋutsuwoe nye: Tola, Puva, Yob kple Simron. 14Zebulon viŋutsuwoe nye: Sered, Elon kple Yaxleel. 15Viŋutsuvi siwo Lea dzi na Yakob le Padan-Aram hekpe ɖe via nyɔnu Dina ŋu lae nye esiawo. Via ŋutsuwo kple via nyɔnuwo katã le ame bla etɔ̃ vɔ etɔ̃. 16Gad viŋutsuwoe nye: Zifyon, Hagi, Suni, Ezbon, Eri, Arodi kple Areli. 17Aser viŋutsuwoe nye: Yimna, Yisva, Yisvi, Beria kple wo nɔvinyɔnu Serax. Beria viŋutsuwo nye Xeeber kple Malkiel. 18Silpa, kosi si Laban na via nyɔnu Lea viŋutsu siwo wòdzi na Yakob lae nye esiawo. Wo katã le ame wui ade. 19Yakob srɔ̃ Raxel viŋutsuwoe nye Yosef kple Benyamin. 20#Mos I, 41.50-52. Viŋutsu siwo On nunɔla, Potifera ƒe vinyɔnu Asnat dzi na Yosef le Egipte-nyigba dzi lae nye Manase kple Efrayim. 21Benyamin viŋutsuwoe nye Bela, Bexer, Asbel, Gera, Naeman, Exi, Ros, Muspim, Xupim kple Ard. 22Raxel viŋutsu siwo wòdzi na Yakob lae nye esiawo. Wo katã le ame wui eve. 23Dan viŋutsue nye Xusim. 24Naftali viŋutsuwoe nye: Yaxzeel, Guni, Yezer kple Silem. 25Bilha, kosi si Laban na via nyɔnu Raxel la ƒe viŋutsu siwo wòdzi na Yakob lae nye esiawo. Wo katã le ame adrẽ. 26Yakob ƒe dzidzimevi ŋutɔŋutɔ siwo ʋu yi Egipte kplii la le ame bla ade vɔ ade; via ŋutsuawo srɔ̃wo mele eme o. 27#Dɔw 7.14. Wodzi viŋutsu eve na Yosef le Egipte. Yakob ƒe ƒometɔ siwo katã va Egipte la le ame bla adrẽ.

Yakob kple eƒe ƒome la le Egipte

28Yakob dɔ Yuda ɖe Yosef gbɔ do ŋgɔ be wòava kpe yewo le Gosen. Esi wòɖaɖo la, 29Yosef dzra ɖo, eye wòɖo eƒe tasiaɖam la yi tɔ́a Israel kpe ge le Gosen. Esi wòdo go tɔ́a la, ekpla asi kɔ nɛ, eye wòfa avi ɖe edzi ʋuu. 30Israel gblɔ na Yosef be: “Mate ŋu aku azɔ faa, elabe mekpɔ wò nègale agbe.” 31Tete Yosef gblɔ na nɔviawo kple tɔ́a ƒemetɔwo be: “Mayi aɖagblɔe na fia la be: ‘Nɔvinye kple tɔ́nye ƒometɔ siwo le Kanaan-nyigba dzi la va. 32Lãnyilawo wonye, eye wova kple woƒe lãhawo: alẽ, nyi kple woƒe nunɔamesiwo katã.’ 33Ne fia la yɔ mi, eye wòbia be: ‘Dɔ ka wɔlawo mienye?’ hã la, 34miɖo eŋu nɛ be: ‘Lãnyilawo wò dɔlawo nye tso ɖevime ke abe mía tɔgbuiwo ene.’ Ne miegblɔ nenema la, aɖe mɔ na mi mianɔ Gosen-nutome.” Elabe alẽkplɔlawo nye ŋunyɔnu na Egiptetɔwo.

Currently Selected:

Mose I 46: EB14

Highlight

Compare

Copy