Romə 9
9
Ifray kə sôwâ Israyel məni mum da'a
1Na wə in tu dan, na nə mə Kris ɓay na cu hay dan mi. Simbeɗ mə Kəleŋ ta' ne kə dan ɗik mə vunduk rin i dan məni na wə in nə kəzini: 2Vunduk rin wə ɗik dan juk ɓay boni rum wə də kofo kofo. 3Na kə tu rin wə wa' i Ifray nə ge nê' rin ɓay man ɓul kə Kris, kəzə kwa rum la' gak jin daw ba man məni handay zu saŋ man si na. 4Handay daw rawti Israyel, Ifray gi nday faŋ daw um ɓay mum ta' mbra' um ne ndaya. Mum ne dan kawvun um ne nday, mum ne dan dlay ne nday, mum ta' vari bur Ifray ne nday, ɓay mum kawvun wa dan cem cem ne ndaya#Psi 9.4. 5Handay daw rawti ba mbri randay mə kə mbra'a. Ɓay Kris, wə du tu sumra' um, mum mbə pâ zu saŋ nday ta'a. Na wa' i sôwâ daŋ' bur Ifray bəka daŋ', mum kə məni suk gbəgboŋ wa kwa daŋ'ŋ. Amen.
6Na cu wa' in i dan kawvun Ifray nə cu kə sin mi mi: Ndəna' daw rawti Israyel, handay cu sôwâ Israyel mə kəzin' daŋ' mi. 7Ɓay daw rawti Abraham, handay cu daw um mə kəzin' daŋ' mi. Zə Ifray in ne kə Abraham: Na də in daw rawti Isak ce' ndə daw wû ta'a. 8Dan rum wa' dan in i daw məni vra' kə gbəgboŋ tu, handay cu daw Ifray mi. Ama Ifray wə in daw məni vra' ce' ndə dan məni mum kawvun wa rum kə nday nə daw um mə kəzin' tawa. 9Zə Ifray kawvun kə dan mə ni na: «Siwti ndə ni na', na də faŋ mbə, ɓay na mbə za' Sara kə vay mə nji wə ɓa sa#Tzk 18.10.» 10Cu ndəna' taw mi, daw Rebeka mə hoɓ, handay kə ba ɗaw, ba mbri ramba Isak. 11-12Ama Ifray da' sôwâ kə dan ɗik vunduk rum, kədan ta' i Ifray wə car njeŋ wa dan ɗik vunduk rum, mum in ne kə Rebeka: «Vay maŋ mə mbri wə də gi sin zə vay mə nyêwe.» Mum in ndəna' kəri məni ta cu njay daw mə njiwkwa kuni məto', ko handay cu gi kwa mə ɓay ko kwa mə bro' məto'o. Mum gi ndəna' kədan mum ta' i dan um cu car wa sin nday mi, ama car wa ɗe məni mum ɗe nday kə ndi. 13Ce' ndə məni Dan rum wây' wə du ɗerwa: Na bə Yakub, ama na sî Eso#Mal 1.2-3.
14Namba də in ma su? Ifray cu swə mə njeŋ mi su? Cu ndəna' mi! 15Zə Ifray in ne kə Moyizə: «Na də we ca wa swə məni na wə wa' we ca wa bə rum, ɓay na də ci' ca wa swə məni na wə wa' ci' ca wa bə rumu.» 16La' ndəna' si, dan rum cu car wa kwa wa' swə ko sin bə rum mi, ama dan rum car wa we ca mə Ifray tawa. 17Wə du Ɗerwa Ifray, Ifray in ne kə jwə nya Egip: «Na cin nu jwə kədan na ta' gbəgboŋ man kə ru, ɓay kədan semɗe rin nə pla' wa nya daŋ'ŋ.» 18Ndəna', Ifray we ca wa swə məni mum wə wa' we ca wa bə rum, ɓay mum ne wa ɓokrok ne kə swə məni mum wə wa' ne wa ɓokrok ne kə bə rumu.
Bak Ifray ɓay we ca umu
19Məsin swə də ci vun rini: La' ndəna' si, zə mi Ifray wə də kofo kə mgbor sôwâ su? Sa gak tak kwa məni Ifray wə wa' gi nə su? 20Ama ha sa kədan ha way dan kə Ifray su? Dənay ruɓ gak ci vun i ri rumu: «Zə mi həŋ gi nan ndəna' su si su#Esa 29.16; 45.9?» 21I ri dənay kə vari gi kwa məni ta wə wa' kə ruɓ dənay sə kə cin ruɓ mə ɗaw məni ta ge, ta gak ri dənay məsin kə mbâ ɓay məsin cu ke kə mbâ mi. 22Hi də in ma wa kwa məni Ifray wə gi nə su? Mum wa' ta' bak um, ɓay mum wa' ta' gbəgboŋ um ta'a. Zə rum, mum reɗ vunduk rum juk kə ji sôwâ məni mum tle bak wa nday, ɓay mum həre' kə nday ci. 23Ndəna', mum wa' ta' mbra' um mə mbri mba ne, namba sôwâ məni mum we ca wa mba. Namba sôwâ məni mum gila' mba ɓa' si kədan namba fe mbra' um, 24zə namba sôwâ məni mum da' mba, mum cu ɗe sum rum wə du sôwâ Zuwif taw mi, ama mum ɗe nday wə du sôwâ məni cu zu saŋ sôwâ Zuwif mi ta'a. 25Ce' ndə məni mum in wə du ɗerwa bə ka' dan mə ɗe kə Oze:
«Sôwâ məni cu wə du sôwâ man mi,
na də nday ɗe: Sôwâ mana.
Ɓay zu saŋ məni na cu bə mi,
na də nday ɗe: Sôwâ man məni na ba#Oze 2.25.
26Ɓay wə ri məni na in ne kə sôwâ:
Hi cu sôwâ man mi,
wə ri rum to', sôwâ də nday ɗe:
Daw Ifray mə kə i.»
27Ɓay bə ka' dan mə ɗe kə Esaya nə ka' dan wa sôwâ Israyel: «Ko sôwâ Israyel la' raw ce' ndə nyetl vun ya mbi daŋ', Ifray də siɗ kam sôwâ du ndaya. 28Zə Bârî də gi dan ge um məni mum in wa nya nə daŋ' ga'ri.» 29Ɓay ce' ndə bə ka' dan mə ɗe kə Esaya nə in vun kofo:
«Bârî mə kə gbəgboŋ daŋ' la' cu
ar daw rawti mba kəzə mi si,
namba də ke ce' ndə sôwâ so Sodomə,
namba də ke ce' ndə sôwâ so Gomorə.»
Sôwâ Israyel kə Dan mə Kəɗama
30Namba də in ma su? Namba ini: Sôwâ məni cu zu saŋ sôwâ Zuwif mi, məni cu keɓ kədan handay faŋ sôwâ mə njeŋ kor Ifray mi, Ifray gi nday njeŋ kor rum zə handay ve Kris. 31Ama raw sôwâ Israyel məni wə keɓ dan dlay məni gak nday gi njeŋ kor Ifray kə ndi, handay cu za' dan dlay rum mi. 32Zə mi su? Zə handay cu keɓ kədan handay ke njeŋ kor Ifray zə handay ve dan um mi, ama handay wə ɗik i handay faŋ njeŋ zə sin ndaya. Handay dle wa sem wa gway' mə dle wa sem, 33ce' ndə məni Dan rum wây' wə du ɗerwa:
«I kar ri'i: Na cin gway' məni wə gi sôwâ
dle wa sem wə so Siyoŋ,
pra məni wə gi sôwâ nde.
Ama swə məni ve num,
zur cu də gi bə rum mi#Esa 28.16.»
Currently Selected:
Romə 9: KMN
Highlight
Share
Compare
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
