Romə 13
13
I mun vun sum rôwâ nya
1Say sa su daŋ' mun vun sum rôwâ məni gay' gbəgboŋ wa nya, zə sum rôwâ məni gay' wə gi sin dan gbəgboŋ məni car mbə hay' Ifray cu mi, zə Ifray kə məni njay sum rôwâ məni wə gi sin wa nya mgbaŋ ni na. 2La' ndəna' si, swə məni wə jeɗ sum rôwâ nya, ka bə rum wə jeɗ dan dlay məni Ifray cini. Ɓay sôwâ məni wə jeɗ gbəgboŋ rum, Ifray wə də ɓok dan wa ndaya. 3Zə sôwâ məni wə gi kwa mə ɓay, wəlok sum rôwâ cu nday gi mi, say sôwâ məni wə gi kwa mə bro'o. Ha la' bə i wəlok sum rôwâ nya gi nu mi si, say a gi kwa mə ɓaya. Ha la' gi ndəna' si, handay də wû sâ'a. 4Zə handay wə gi sin zə Ifray kədan handay kawɓa ru kədan ha gi kwa mə ɓaya. Ama ha la' gi kwa mə bro' si, a ne wəlok nday, zə handay cu ra' masəlam ɓa uray mi. Kəri məni handay wə gi boni ne kə sôwâ məni gi kwa mə bro', kwa rum wə tak bak Ifraya. 5Zə rum, wə ɓay kədan sôwâ mun vun sum rôwâ nya, cu zə tak bak Ifray taw mi, ama zə dan ɗik vunduk nday wə nday ta' gi kwa rumu. 6Zə hi wə po' grama ta'a: Zə sum rôwâ məni wə ɓawa grama, handay wə gi sin Ifray kə ri məni handay wə ɓawa grama kə vari rumu. 7I po' kwa daŋ' məni handay wə ci vun rum ɓa ri: I po' grama ne kə sôwâ məni wə ci vun grama ɓa ri, ɓay i po' «duwanə» ne kə sôwâ məni wə ci vun «duwanə» wa kwa mə ɓa ri. I mbâ sum rôwâ daŋ' ɓay i ne wəlok nday, zə handay nde i fe kwa rum si#Mat 22.21; Mak 12.17; Luk 20.25.
I bə jik mi
8I gay' kə bal swə ɗaw wa ri mi, bal məni hi gak gay' kə ndi, say i bə nji mbok nji. Swə məni wə bə sôwâ məsin, bə rum wə ta zə dan dlay cete. 9Dan dlay məni kuna: «A gi nja mi, a ci mar mi, a kəy hura mi, a səna' kwa mi,» dan dlay rum daŋ' ɓa wə du dan dlay mə ɗaw məni na: «A bə jik wû ce' ndə məni ha wə bə tu ru.» 10Swə məni wə bə jik um, bə rum cu gak gi kwa mə bro' hay' jik um mi. Swə məni wə bə sôwâ məsin, bə rum wə ta zə dan dlay cete.
I gila' tu ri zə bəka gewa Kris
11I gi ndəna', zə hi we bəka gewa Kris nə həre'e: Ri dla' sen mi mbə si. Zə siɗ mbə həre' kə mba mgbaŋ ni nə pâ mə kəri məni namba ve Kris vun kofo nə si. 12Dukri wə ndo' ye, bəka wə ra' ye. Zə rum mə ar sin məni sôwâ wə gi kə dukri ɓay mə ra' kwa zi kədan namba zi wə ri mə ɓu. 13Mə ta njeŋ ce' ndə məni sôwâ wə ta kə fəta. I ji tu ri wə du ru mə bro', gal kə sum, gi ghəghay, gi kwa mə kə zur dan zur, dle vun ɓay gi sây'i#Psi 20.13-15; Ddd 5.17-19; Lev 19.18. 14Ama i ge kpak Bârî mba Zezu Kris ɓay i ar kpak tu ri mə bro' ɓu ni kədan hi gi kwa məni mum wə wa' nə mi.
Currently Selected:
Romə 13: KMN
Highlight
Share
Compare
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
