Kolosə 3

1Ifray ra' ni mbə mar kə Kris, zə rum i keɓ kwa məni wə wafray, wə ri məni Kris suk han wə ɓa fun Ifraya#Nye 110.1. 2I ɗik dan wa kwa mə wafray, i ɗik dan wa kwa mə nya mi. 3Zə hi mar si, ɓay nyî ri mə kəzin' pe' kə Kris wə du ɓa mi kə Ifraya. 4Nyî ri mə kəzin' nə Kris, ɓay kəri məni mum wə də mbə, hi də mbə kə rum, ɓay hi də gay' kə rum wə du mbra' umu.

Ta mə kəmbar kə ta mə mbrewe

5Zə rum, i ci kwa səna' məni tu ri wə wa' wa nya məni na: Ghəghay, kwa mə kə day, ləlem, fəfô, ɓay səna' kwa mə bro' zə səna' kwa nə ta zə ifray məsin cem cem na. 6Zə kwa mə ndani kuni, bak Ifray də ke wa sôwâ məni cu mun vun rum mi, 7hi ke ta ndəna' ɓa' si, kəri məni kwa mə bro' rum ke gay' wa ri. 8Ama mgbaŋ ni nə, i ar kwa məni kuni si daŋ'ŋ: Ra' vunduk, bak, kwa mə bro', ge dan mə bro', ɓay dan mə kə zur məni wə pâ mbə vun ri. 9I hay dan kə nji mbok nji mi, zə hi ulay' kpak tu ri mə kəmbar kə sin gi um si#Efe 4.22, 10ɓay hi ge kpak tu mə mbrew wə tu ri, kpak rum nə swə mə mbrew məni Ifray wə gila' rum bəka ɗaw ɗaw daŋ' hâ mum faŋ ce' ndə bə ri rum, kədan bə rum gak we Ifray cete. 11Ndəna', sôwâ grek cu mi, sôwâ Zuwif cu mi, sum tagura cu mi, jeɓ cu mi, sôwâ mə dan we kwa cu mi, sôwâ mə dan ar i cu mi, bek cu mi, ko sôwâ məni fe wa tu nday cu mi, ama Kris nə daŋ', ɓay mum du kwa daŋ'ŋ.

12Hi wə du raw sôwâ Ifray, Ifray bə ni, ɓay mum da' ni kədan hi ke kə rum, zə rum say i ge kwa məni kuni wə tu ri: Ci' ca, sin mə ɓay, hom tu, 'yeŋ, ɓay reɗ vunduku. 13I rom nji mbok nji, ɓay i vrum kwa mə bro' nji mbok nji kəri daŋ' məni swə ɗaw du ri kə dan wa swə məsini. I vrum kwa mə bro' sôwâ məsin ce' ndə məni Bârî wə vrum kwa mə bro' mi#Efe 4.32. 14Ɓay pâ daŋ' rum, i ke kə ba: Mum nə zew məni wə mi jew də tu nji kədan hi ke ɗawa. 15Na wə wa' i heɓ Kris nə suk wə vunduk ri, zə Ifray ɗe ni kədan hi faŋ tu mə ɗaw kədan hi fe heɓ rumu. I gi soko ne numu. 16Na wə wa' i dan Kris kə ndak um daŋ' nə suk wə vunduk ri: I ta' kwa ne kə nji mbok nji, ɓay i har nji mbok nji kə gwet, i bur Ifray kə kəɗam wə vunduk ri kə nyem, kə nyem mə gi mbra', ɓay kə nyem məni Simbeɗ Ifray wə mi ne. 17Wə du kwa daŋ' məni hi wə gi, ɓay dan daŋ' məni hi wə in, i gi kwa rum daŋ' kə semɗe Bârî Zezu, kə gi soko ne kə Ba mi Ifray zə rumu.

Bə mə mbok sôwâ Kris wə du ta nday mə mbrewe

18Rawkwa, i mun vun njiwkwa mi, zə hi gak gi ndəna' wə du ɓa mi kə Bârî. 19Njiwkwa, i bə rawkwa mi, ɓay i ra' bak kə nday mi#Efe 5.25; 1Pi 3.7.

20Dawre', sin məni hi gak gi kor Bârî nə ni na: Say i mun vun sôwâ mi du kwa daŋ', zə dan rum wə kəɗam tu Ifraya. 21Ba daw, i gi daw mi ra' vunduk kədan handay ɗik dan mi.

22Bek, i mun vun sum coɓ ri mə wa nya du kwa daŋ'ŋ. I gi ndəna' kədan hi kəɗam tu nday kəri məni handay wə mi kar taw mi, ama i mun vun nday kə vunduk mə ɗaw, zə hi wə ô Bârî mi. 23Ko sin məni hi wə gi, i gi sin rum kə vunduk ri daŋ', ce' ndə məni hi wə gi zə Bârî, cu zə sumra' mi, 24i dla' wa dan mə ni na: Bârî wə də po' bal cik mi, hi də fe bayɗa məni mum njay zə sôwâ umu. Zə Bə coɓ ri mə kəzin' məni hi wə gi zə rum nə Kris. 25Ama swə məni wə gi vur vur, bə rum də fe bal cik rum ce' ndə vur vur məni mum gi, zə Ifray cu gi sôwâ cem cem mi#Ddd 10.17; Efe 6.9.

Currently Selected:

Kolosə 3: KMN

Highlight

Copy