2 Tesalonikə 3
3
I in dan kə Ifray zə mba
1Daw ba mba, ndo' vun rum, i in dan kə Ifray zə mba kədan dan Bârî nə pla' də kofo ga'ri ɓay ke kə mbra' ce' ndə məni dan rum ke gi wə du ri, 2i o Ifray kədan nə siɗ mba wə ɓa sôwâ mə bro', zə sôwâ daŋ' cu ve dan rum mi. 3Ama Bârî nə njeŋe: Mum də mi ne gbəgboŋ, ɓay mum də mi ji hay' Satan. 4Ɓay Bârî wə mba gi njay vunduk mba wa ri, zə rum, namba we si: Hi wə gi kwa məni namba ta' ne ni, ɓay hi wə də kofo kə gi kwa rumu. 5Namba wə wa' i Bârî nə gi vunduk ri kədan hi we bə Ifray, ɓay kədan hi car ŋgəɗiŋ' ce' ndə məni Kris car ŋgəɗiŋ'ŋ.
Say swə ɗaw ɗaw daŋ' nə gi sini
6Daw ba mba, namba wə mi dlay kə semɗe Bârî mba Zezu Kris, i tak tu ri hay' daw ba mə ndal məni cu ta zə kwata' məni namba ta' ne nday nə mi. 7Hi we vari məni namba gay' wə du ri nə kə tu ri si njeŋe: Say i jənok zu mba zə namba cu ke sum ndal kəri məni namba ke wə du ri mi. 8Namba cu ti kwati ɓa swə uray ɗaw mi, zawa namba gi sin ɓay tuk cik ɓayrum, namba gi sin fəta kə dukri daŋ', zə namba cu wa' cin kwazi' wa swə ɗaw du ri mi. 9Namba kə vari kədan namba o kwati kə so ɓa ri, ama namba cu gi ndəna' mi, zawa, namba gi sin kə ɓa mba kədan namba ta' vari mi ne, i jənok zu mba. 10Kəri məni namba ke du ri, namba la' ne ni: Swə məni cu bə sin mi, i ne kwati ne num mi ta'a! 11Namba in ndəna', zə namba mun i sôwâ məsin du ri wə gaŋ kə ndala. Handay cu bə gi sin mə kəca nday mi, ama handay wə ze du dan məni cu tap nday mi. 12Namba wə dlay sôwâ mə ndani kuni, ɓay wə nday har kə semɗe Bârî mba Zezu Kris: Say kuni gi sin bəka daŋ' kədan kuni ur tu ndaya.
13Daw ba mba, mə hi, i ar gi kwa mə ɓay mi. 14Swə la' cu ta zə kwata' məni namba wə wây' wə du ɗerwa məni nə mi si, i kar bə rum kə ɓayrum, ɓay i ɓa kə rum mi, kədan zur nə gi numu. 15Ama i sî num mi, zawa i har num ce' ndə məni hi wə har vay ba mi.
Kuswa' kə kaw jeɓe
16Namba wə wa' i Bârî məni wə ne heɓ ne kə sôwâ nə ne ni heɓ kə tu rum kəri daŋ' ɓay kə vari cem cem daŋ'ŋ. Namba wə wa' i Bârî nə ke kəri daŋ'ŋ.
17Na Pol, na wây' dan kaw jeɓ məni kuni kə ɓa rini. Na wây' semɗe rin wə ndo' vun ɗerwa daŋ' ndəna'a: Kwa wây' man ndə ni na'a. 18Namba wə wa' i ɓay Bârî mba Zezu Kris nə ke kə ri daŋ'ŋ.
Currently Selected:
2 Tesalonikə 3: KMN
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.