Baloma 2
2
Nyatilo ya Nyambi
1 #
Mat 7:1; Luk 6:37. Nohobene, kawushinda wami, obe ukuyata baminobe bya kuliyawila ufwabyo, ndaba oho ukuyata baminobe, ukuliyata obe mwine, ndaba watendanga byuma biya wayatanga baminobe. 2Ngoboni tukulimuka ngayi kuyata kwa Nyambi kwenga kwakupwisha ku baya bakutenda byuma byanoho. 3Ngoboni obe mukakuyata aba bakutenda byanoho, kati nanobe kami watendanga byuma biya batendanga baya ukuyata. Ukuhanganika ngayi ukapanza ku kuyata kwa Nyambi ndi? 4Kati ukulimbulula nceshe za Nyambi zazingi na kubomba kwendi na kutatilila kwendi ndi? Kati kaliha ukulimuka ngayi nceshe za Nyambi zikukutwaminina kukutenguluka ndi? 5Ngoboni uli na mutima wawukalu shikuma, kami ulinakunenehesha kashushwilo kobe ha Mutena wa wukali wa Nyambi oho kuyata kwakwoloka kukaholoka. 6#Nyi 62:12; Zing 24:12. Nyambi ukapana muntu na muntu kwezekesha na milimo yendi. 7Baya bali na lunzewe lwa kutenda byabiwahe, bakushinga wuwahe na maleema nakubula kubola, pe Nyambi ukabapana wumi wa mwayile myaka. 8Ngoboni ku bakankani na bakakukana kupwisha, ngayi bakonke bya kutengama, Nyambi ukabakalihila na kubapilamina. 9Kukekala makalikiza na makando ku muntu nimwendi ukutenda wubi. Kutatika taha na Bayunda niho ku Bakamatunga. 10Ngoboni Nyambi ukapana wuwahe na maleema na kumwena, ku muntu nimwendi ukutenda byabiwahe. Kutatika taha na Bayunda niho ku Bakamatunga. 11#Nday 10:17. Ndaba Nyambi kaliha wekala na shihota.
12Bakamatunga batendele wubi kwakubula Ndayano za Moshesha bakanonga kami kwakubula Ndayano za Moshesha. Kami Bayunda batendele wubi hinga bekala na Ndayano za Moshesha, bakayatiwa kami na Ndayano za Moshesha. 13Ndaba kaliha ngayi baya bakuyuvwa mazu a Nyambi nibo bakenga bakwoloka ku meho a Nyambi, ngoboni baya bakwombatala mazu a Nyambi nibo bakenga bakwoloka. 14Ndaba oho Bakamatunga baya babula mazu a Nyambi, ndi munyoyelo yabo ya shihemwa hibakutenda ebye akwamba mazu a Nyambi, pe ebye bakutenda, bikenga mazu a Nyambi yabo nibo bamwine, hinge ndi mazu a Nyambi bafwawo. 15Ebye bakutenda, bikumonesha ngayi biya bili mu mazu a Nyambi, byatikitiwa mu mitima yabo. Ngana zabo kami zikubapaka, pe bihanganiko byabo ha shikati shamina bikubayatisha, kami ha shikati shamina bikubemanina. 16Nohobene kuya na ncango zaziwahe eze nikushimikila, nisho kukekale ha Mutena uyo oho Nyambi akayata bihanganiko bya bantu bya kulimba, kupitila muli Yeshu Kilishitu.
Bayunda na mazu a Nyambi
17Haya obe ndi ukulitumba obe mwine ngayi uli Kayunda, kami ukukulupila mu mazu a Nyambi, na kuliyemeza muli Nyambi, 18pe ukulimuka ebye akushinga Nyambi ngayi ubitende, kami unalilongeshe mu mazu a Nyambi ngayi uhate byabiwahe. 19Unalikulupishi obe mwine ngayi uli mukakutwaminina tushishitwa, na lumuni lwa baya bali mu mincimpwe, 20uli mukakufundiziza bakuyeba na mukakulongesha batwanuke. Unalimuku shiwahe ngayi mu mazu a Nyambi, muli kalimukisho na kupwisha. 21Nohobene oho ulinakulongesha baminobe, kati na nobe mwine ulinakulilongesha ndi? Obe ukushimikila ngayi, “Hinga muyiba.” Kati obe wayibanga ndi? 22Obe ukwamba ngayi, “Hinga mutenda wunjenge.” Kati obe watendanga wunjenge ndi? Obe wazimba tunankishi, kati obe wayibanga bya mu matala akulemeshela tunankshi ndi? 23Obe mukakuliyemeza na mazu a Nyambi ngoboni waletanga lisheni kuli Nyambi ha kukiluka mazu wendi. 24#Isha 52:5. Nehi kwatikitiwa ngayi, “Lizina lya Nyambi linakuhanduliwa ku Bakamatunga ndaba yanenu Bayunda.”
25Mwashikuma mukanda ukuyavwa, ndi ukwombatala mazu a Nyambi, ngoboni ndi obe ukukiluka mazu a Nyambi, pe ukwinga ngo kaliha waya ku mukanda. 26Nohobene wakubula kuya ku mukanda ndi ukulama mazu a Nyambi, kati Nyambi kaliha ukalabila uya muntu ngo uya waya ku mukanda ndi? 27Mukamatunga ndi ukwombatala mazu a Nyambi ukamiyata hinge ndi enu muli na mazu atikitiwa kami mwaya ku mukanda. Ukamiyata ndaba mukukiluka mazu a Nyambi. 28Ndaba Kayunda mwine, kaliha ou ukwinga tuhu Kayunda hamunkanda, kami mukanda wine, kaliha ou ukutendiwa tuhu hamunkanda ku lutu. 29#Nday 30:6. Ngoboni Kayunda wakupwisha, muntu uya nengi Kayunda na mukati. Nohobene na mutima wendi unayi ku mukanda mu moyo, kaliha na mazu atikitiwa tuhu. Muntu wanehe, kaliha ukuyemeziwa ku bantu, ngoboni ukuyemeziwa kuli Nyambi.
Currently Selected:
Baloma 2: KK2008
Highlight
Copy
Compare
Share
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.