Milimo 4

Pita na Yowano bakuyatishiwa

1Oho Pita na Yowano bambilenga na bantu, bakankombela na mukulwane wa bakakulama ku Litala lya Nyambi na Bashanduki bezile kukwabo. 2Bapilamine ndaba baya bantumwana babili balongeshelenga bantu, kami bashimikililenga ngayi Yeshu washangukile ku bafu, oku kukumonesha ngayi bafu bakashanguka. 3Niho bakwatile Pita na Yowano, pe babayakile mu tolongo, kutatila ngayi kushe taha ndaba engile mazolo. 4Ngoboni bantu babengi baya bayuvwile lizu betabilile. Aba balifungilile bashingile kukuma ku makulukazi mutanu.

5Oho kwashile bakulwane ba Bayunda na bakulwane na bakakulongesha ndayano, bakungulukile mu Yelushalema. 6Baliwanine na Anashi Mukulwane wa Bakankombela Nimwabo na Kayafwashi na Yowano na Alekizanda na bamina ba livumo lya Mukulwane wa Bakankombela Nimwabo. 7Baletele Pita na Yowano mukati kabo, pe babepwile ngayi, “Kati munatende ebye na ngovu ngani? Hinge na lizina lya yani?”

8Niho Pita hinga enzala na Moyo Wakuyela, wambile kukwabo ngayi, “Enu bakakutwaminina bantu, nanenu bakulwane, 9ndi lelo mukutwipula ndaba ya mulimo wawuwahe unatendiwi ku nou wakupenga, ngayi unanyongomana nahiti? 10Haya mukufwanina kulimuka nimwenu, kami na bantu nimwabo ba Ishalela banafwanini kulimuka ngayi, ou muntu unemana kumbili yenu, unanyongomana mu lizina lya Yeshu Kilishitu wa ku Nazaleta. Ou niye mwakolekele, ngoboni Nyambi wamushangwile ku bafu. 11#Nyi 118:22. Yeshu niye ukutoyiwa mu byatikitiwa ngayi,

‘Limanya mwakanine enu bakakutenda matala,

nilyo linafutuku kwinga limanya lya kushuma

lya mu mbango.’

12Pe kupulwishiwa kukawaniwa mumwendi tuhu, ndaba kowa lizina lyamina munceto ya liyilu linapanikiwi ku bantu, muya ukapulukila.

13Bakankuta oho bamonene kukanca kwa Pita na Yowano, na kulimuka ngayi bengile bantu tuhu nahiya bakakubula kulilongesha, bakomokele. Babalimukile ngayi bekalilenga hamo na Yeshu. 14Ngoboni oho bamonene uya muntu wanyongomanine hinga emana na Pita na Yowano, kaliha batweshele kukanangana. 15Niho babatongwezele ngayi bafume mu nkuta baye hamunkanda. Balyambashanine mukati kabo ngayi, 16“Tukubatenda nahiti aba bantu? Ndaba eshe shikomokesho banatende shashinene, kami shinalimukiwi ku bantu nimwabo bazika mu Yelushalema, pe kutwesha kushikana tufwako. 17Ngoboni ndi tukushinga ngayi ebye hinga bipanzana ku bantu nimwabo, tubakanishenu ngayi hinga bamba kami mu lizina elye ku muntu hinge umo.”

18Niho babehanine kami, babambilile ngayi, hinga bamba hinge kulongesha mu lizina lya Yeshu kami. 19Ngoboni Pita na Yowano babakumbwile ngayi, “Liyatenu enu bamwine ndi shashiwahe ku meho a Nyambi kuyuvwa byenu kupitakana Nyambi. 20Ndaba kutwesha kuleha kushimikila ebye tunamono nanebye tunayuvwu tufwako.” 21Oho bamanishile kubambila shikuma babalehele ngayi baye, bakwangile kuwana nzila ya kubashushula, ndaba bantu nimwabo bayemezele Nyambi hanebye byatendiwile. 22Uya muntu, ou shikomokesho sha kumunyongomanisha shatendiwile kukwendi, wekalile na myaka ya kupitakana makumi anaa.

Bakakukulupila bakulombela ngayi bakance

23Oho Pita na Yowano babashobolwele, babokele ku baminabo, pe babatongwezele nimwabyo bambile kukwabo bakankombela ba bakulwane na bakulwane ba Bayunda. 24#Kut 20:11; Neh 9:6; Nyi 146:6. Oho bayuvwile ebye, nimwabo batatikile kulombela na kukatula mazu wabo kuli Nyambi na mutima umo ngayi, “Obe Nyambi Shakalenga walengele liyilu na hanci na liwate na byuma nimwabyo bilimo. 25#Nyi 2:1-2. Wambile kuli tatiyetu Ndavita mukamulimo wobe mu Moyo Wakuyela ngayi, ‘Kati ndabangani Bakamatunga bapilamine?

Kati ndabangani bantu bekalile

na bihanganiko byowa bya kumfutukila?

26Bamyene ba hano hanci baliwahishililile,

na batulela bakungulukile hamo,

balwishile Mwene na Kilishitu wendi.’

27 # Mat 27:1-2; Mak 15:1; Luk 23:1, 7-11; Yowa 18:28-29. Ndaba mwashikuma Helonda na Pontiyashi Pilato bakungulukile hamo na Bakamatunga na bantu ba Ishalela mu lukena luno, balwishile Mukamulimo wobe wakuyela Yeshu ou obe wamwingile Kilishitu. 28Batendele byuma nimwabyo ebye wahanganikile mwaka na ngovu zobe na shifungo shobe ngayi bikatendiwe. 29Haya Mwene, mona mafumbila wabo, yitabilisha etu bakamilimo bobe ngayi tushimikile lizu lyobe na kukanca. 30Tandubula liboko lyobe na kunyongomanisha bantu, kami bilimukisho na bikomokesho bitendiwe mu lizina lya Yeshu Mukamulimo wobe wakuyela.”

31Oho bamanishile kulombela, mwanya ou bakungulukilile wanyenkanine. Bantu nimwabo benzalile na Moyo Wakuyela, bashimikilile lizu lya Nyambi na kukanca.

Bakakukulupila bakulitapila byabo hamo

32 # Mil 2:44-45. Nimwabo baya bakakukulupila bekalile na mutima umo na bihanganiko bimo. Pe kwabulile muntu wakwamba ngayi byuma ebye ahetele byengile byendi, ngoboni balitapilile nimwabyo ebye bekalile nabyo. 33Na ngovu zazinene bantumwana bapanine wupaki wa kushanguka kwa Mwene Yeshu, pe Nyambi wabapanikile mfuywezi zazingi. 34Kami kowa muntu mukati kabo wabulile shuma. Nimwabo baya bekalile na mafuba, hinge matala, bawalandishile, pe baletele mali yabiya balandishile, 35bawaletele ku bantumwana. Bantumwana batapishililenga mali ku muntu na muntu kwezekesha nabiya abulile.

36Yoshefwa ou wengile Kalevi wa ku litunga lya Shayipulashi, uya bantumwana batumbile ngayi Mbanambashi (kunungulula ngayi, “Mukakushumankanisha”), 37walandishile mfuba yendi, waletele mali, wawapanikile kuli bantumwana.

Currently Selected:

Milimo 4: KK2008

Highlight

Copy