រ៉ូម 9

ចួសប៉ុលសួររ៉ើរើងបេកអ៊ីស្រាអែលបេកលឹមព្រះពឺតរីសអែល

1សែមសាយវ៉ឺយ កឺស្អៀសួរសែមសាយអនដិងរ៉ើរើងចាក់កឺដែលអឺ រើងអិងយ៉ាំងអិងមេន កឹកឺម៉ឹប៉ង្ខក់អឺ ចូវរ៉ើកឺកួជាប់រ៉ើព្រះគ្រីស្ទ កឹកឺដិងប៉ាយរើងអិងយ៉ាំងអិងមេន ចូវរ៉ើចិត្តកឺអាខាងដិងលោសដិងក្រៃ រ៉ើព្រះវិញ្ញាណបរិសុទ្ធ ជោយសួរកឺឡង់ 2រើងអិងយ៉ាំងនី កឺប៉បាកចិត្តច្នាប់មេនទេន រ៉ើព្រោយចិត្តរហូត 3កឹកឺសុខចិត្តអនព្រះពឺតដាក់ប៉ណ្ដាសសាកឺអនទឹតលោះរ៉ើព្រះគ្រីស្ទជំលោសសែមសាយកឺដែលអឺ អនកឹសែមសាយកឺបឺនជាប់រ៉ើព្រះគ្រីស្ទ 4សែមសាយអិង បេកអ៊ីស្រាអែល បេកព្រះពឺតអែលវ័ចៀកនណាវ បេកព្រះពឺតកួឡង់ បេកព្រះពឺតរាប់អាន បេកព្រះពឺតអនច្បាប់ បេកព្រះពឺតអនស្គាល់របៀបគោរពណាវ បេកព្រះពឺតសន្យាប៉ាយអនអានីអាទោក់ 5បេកកើតចួសល្បីៗ កឹបើគឹតរ៉ើរើងព្រះគ្រីស្ទចូវកើតឡឹងក្ដែកណិង ណាវកើតរ៉ើស្មាបេកអិងដែល កឹព្រះអិង ណាវពឺតលើសចន្ទ័ៗតឹងម៉ាត់ កឹកួយស្នំកឹសសើរណាវរហូតមាត អៃមេន។

6សែមសាយវ៉ឺយ កឺប៉បាកចិត្តរ៉ើបេកអ៊ីស្រាអែលយ៉ាំងអិង ម៉ឹមេនស្អៀប៉ាយ ព្រះពឺតម៉ឹវ័តូនពាក្យណាវសន្យារ៉ើបេកអិងអឺ ណាវវ័ដែលអឺ កឹបេកអ៊ីស្រាអែល ម៉ឹមេនសឹតកឹបេកអ៊ីស្រាអែលពឹតតឹងម៉ាត់អឺ 7កឹកនចៅចួសអប្រាហាំ កឹម៉ឹមេនសឹតកឹកនចៅចួសអប្រាហាំពឹតតឹងម៉ាត់ដែល យ៉ាំងសសេរដកឡឹងគម្ពីរ៍ប៉ាយ “កើតកឹអ៊ីសាក រ៉ើកនចៅណាវអឺ កើតជ្រមោះប៉ាយ កនចៅម៉ៃ”#ជំពូក ៩ ខ ៧ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ២១ ខ ១២។ 8បេកកើតចូវតូនចិត្តកួយស្អៀបឺន ម៉ឹមេនក្យាប៉ាយ កនព្រះពឺតអឺ បេកកើតចូវតូនពាក្យព្រះពឺតសន្យាអឺ ក្យាប៉ាយ កនចៅព្រះពឺត 9ច្បោះព្រះពឺតបឺនសន្យារ៉ើចួសអប្រាហាំប៉ាយ “ក្សៃណិងក្មងារ ពេលកឺចូវចៀក្រោយ សារ៉ាណាវកើតកនកន្ទ្រូសមូយ”#ជំពូក ៩ ខ ៩ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ១៨ ខ ១០។។

10សែមសាយវ៉ឺយ រើងយ៉ាំងអិងម៉ឹមេនកើតកឹម្អិងអឺ លឹមយាក់រេបិកាពុងពឺតរ៉ើចួសអ៊ីសាកចួសហៃរ៉ើដើមកឹយ៉ាំងអិងដែល 11ចូវរ៉ើព្រះពឺតណាវរេបគំរោងរីសអែលកួយ ណាវម៉ឹគឹតរ៉ើរើងកួយវ័អឺ ណាវរីសអែលកួយតូនចិត្តណាវស្អៀរីស កឹលឹមយាក់រេបិកាពុងពឺតកនព្លោះ ម៉ឹប៉ាយកនយាក់អិងន្ទាន់កើតចូវ រ៉ើន្ទាន់ជាងវ័រ័កវ័ប្រោយ៉ាំងនាអឺ 12ព្រះពឺតណង់កឹសួរយាក់អិងប៉ាយ “ពោះកី សាយប៉ម្រើសែម”#ជំពូក ៩ ខ ១២ ពាក្យណិងកួឡឹងគម្ពីរ៍សញ្ញាតៀតេកជ្រមោះ លោកុប្បត្តិ ជំពូក ២៥ ខ ១៣។ 13កឹរើងអិងកើតសសេរដកឡឹងគម្ពីរ៍ដែលអឺប៉ាយ “កឺស្រឡាញ់យ៉ាកុប កឺស្អប់អេសាវ”#ជំពូក ៩ ខ ១៣ ពាក្យណិងកួឡឹងគម្ពីរ៍សញ្ញាតៀតេកជ្រមោះ ម៉ាឡាគី ជំពូក ១ ខ ២ តក់ ៣។។

14សែមសាយវ៉ឺយ បើយ៉ាំងអិង ណា ហៃគឹតយ៉ាំងនា? ព្រះពឺតណាវវ័ម៉ឹត្រង់វ៉ាក? ម៉ឹមេនអឺ 15កឹរ៉ើដើមព្រះពឺតបឺនសួរចួសម៉ូសេប៉ាយ “កឺជោយកួយនា តូនកឺស្អៀជោយ កឺច្ដាលកួយនា តូនកឺស្អៀច្ដាល”#ជំពូក ៩ ខ ១៥ ពាក្យណិងកួឡឹងគម្ពីរ៍សញ្ញាតៀតេកជ្រមោះ និក្ខមនំ ជំពូក ៣៣ ខ ១៩។ 16យ៉ាំងអិង ហៃពើកប៉ាយព្រះពឺតណាវជោយកួយ តូនណាវស្អៀជោយ ណាវម៉ឹមេនជោយកួយតូនកួយស្អៀអនណាវជោយ រ៉ើម៉ឹមេនជោយកួយតូនចន្ទ័ៗកួយខំវ័អឺ 17កឹឡឹងគម្ពីរ៍កើតរើងមូយទ័នដែលអឺវ័អនហៃស្គាល់ព្រះពឺត លឹមព្រះពឺតសួរស្ដាច់បេកអេស៊ីព្ទប៉ាយ “កឺរីសអែលកួយកង់យ៉ាំងម៉ៃអនវ័ស្ដាច់ អនកួយពើកប៉ាយកឺប៉្កែ រ៉ើអនជ្រមោះកឺបឺនល្បីត្បាល់ម៉ើក្ដែកណិង”#ជំពូក ៩ ខ ១៧ ពាក្យណិងកួឡឹងគម្ពីរ៍សញ្ញាតៀតេកជ្រមោះ និក្ខមនំ ជំពូក ៩ ខ ១៦។ 18យ៉ាំងអិង ម៉ឹប៉ាយវ័ន្ទ័អឺ ព្រះពឺតណាវវ័តូនចិត្តណាវរហូតដែលអឺ ណាវស្អៀជោយកួយនាកឹបឺន ណាវស្អៀវ័អនកួយនាកង់កឹបឺន។

ចួសប៉ុលសួររ៉ើរើងព្រះពឺតកើតសិទ្ធិវ័ន្ទ័តឹងម៉ាត់

19សែមសាយវ៉ឺយ ពេលកឺសួរយ៉ាំងអិង ច្បាស់កឹកើតសែមសាយនឺចស្អៀមោះកឺប៉ាយ “បើយ៉ាំងអិង កើតន្ទ័បឺនព្រះពឺតណង់កឹប៉ន្ទោសកួយ? ចូវរ៉ើម៉ឹកើតកួយនាជាងវ័តូនចិត្តអែងបឺនតើ” 20បើប៉ាយកើតសែមសាយនឺចស្អៀមោះកឺយ៉ាំងអិងមេន កឺស្អៀមោះសែមសាយអិងប៉ាយ កួយវ៉ឺយកួយ ណា ម័ងចន្ទ័បឺនហានតវ៉ារ៉ើព្រះពឺតយ៉ាំងអិង? “ណា ក្ដែកអឹតណាវទ្លាប់មោះបេកវ័ណាវអនកើតចៀអានីអាទោក់ប៉ាយ កើតន្ទ័បឺនម៉ៃវ័កឺអនកើតចៀយ៉ាំងណិងដែលវ៉ាក?”#ជំពូក ៩ ខ ២០ ពាក្យណិងកួឡឹងគម្ពីរ៍សញ្ញាតៀតេកជ្រមោះ អេសាយ ជំពូក ២៩ ខ ១៦ ជំពូក ៤៥ ខ ៩ រ៉ើជំពូក ៦៤ ខ ៧។ 21ណា បេកវ័ក្ដែកអឹតអនកើតចៀអានីអាទោក់ ណាវម៉ឹកើតសិទ្ធិអែលក្ដែកអឹតមូយដុលចូវវ័ចៀចន្ទ័ៗបារធឺ អាមូយធឺដកប៉្រើពេលសំខាន់ រ៉ើអាមូយធឺដកប៉្រើពេលថាំម្ដាវ៉ាក? 22ព្រះពឺតកឹយ៉ាំងអិងដែល ណាវអនកួយអាលឹមណាវច្លក់ចៀកួអាថាននរកពេលនាកឹបឺន ម៉ងណាវអាត់អនបេកក្រៃចៀកួអាថាននរកច្នាប់យ៉ាំងអិង ចូវរ៉ើណាវដកចម្បាយរើងណាវច្លក់ រ៉ើដកចម្បាយរើងណាវប៉្កែ ពោះអាព្នេកទ័ន 23កឹពោះអាព្នេកទ័ន ណាវម៉ឹមេនគ្រាន់កឹចម្បាយរើងណាវច្លក់ រ៉ើម៉ឹមេនគ្រាន់កឹចម្បាយរើងណាវប៉្កែម្អិងអឺ ណាវវ័រ័កច្នាប់ដាក់បេកណាវច្ដាលឡង់ កឹបេកអិង សឹតកឹបេកលឹមណាវរេបគំរោងដកប៉ាយណង់កឹរីសអែលអនចៀកួអាថានសួ 24កឹហៃណិងហឹយ បេកព្រះពឺតរីសអែល ណាវម៉ឹមេនរីសអែលកឹសាសន៍យូដាម្អិងអឺ ណាវរីសអែលសាសន៍ផ្សិងៗឡង់ 25យ៉ាំងពាក្យលឹមព្រះពឺតអនបេកសួរកួយពាក្យចូវរ៉ើណាវជ្រមោះហូសេសួរកួយប៉ាយ “បេកម៉ឹមេនរាស្ដ្រកឺ ពោះកីកឺក្យាណាវប៉ាយរាស្ដ្រកឺ បេកកឺម៉ឹស្រឡាញ់ ពោះកីកឺសួរបេកអិងប៉ាយកឺស្រឡាញ់ណាវ”#ជំពូក ៩ ខ ២៥ ពាក្យណិងកួឡឹងគម្ពីរ៍សញ្ញាតៀតេកជ្រមោះ ហូសេ ជំពូក ២ ខ ១។ 26កឹរើងអិងក្រៃរ៉ើពាក្យលឹមព្រះពឺតសួរចួសហូសេប៉ាយ “តេកណាកឺទ្លាប់សួរបេកអិងប៉ាយ ម័ងម៉ឹមេនរាស្ដ្រកឺអឺ ពោះកីតេកអិង កឺសួរបេកអិងប៉ាយ ម័ងកនកឺ កនព្រះពឺត ព្រះត្មង់រហូតមាត”#ជំពូក ៩ ខ ២៦ ពាក្យណិងកួឡឹងគម្ពីរ៍សញ្ញាតៀតេកជ្រមោះ ហូសេ ជំពូក ២ ខ ២៥។ 27កឹបេកសួរកួយពាក្យចូវរ៉ើព្រះជ្រមោះអេសាយណាវប៉្រកាសសួរកួយរ៉ើរើងបេកអ៊ីស្រាអែលប៉ាយ “ម៉ឹប៉ាយសាសន៍អ៊ីស្រាអែលកើតកនចៅក្លឹងយ៉ាំងក្ដែកស្កាចតូនសមុទ្រមេន ម៉ងបេកបឺនសង្គ្រស់កើតកឹង្គិតមូយអឺ 28កឹព្រះណាវតឹងវ័ដាក់កួយឡឹងក្ដែកណិង តូនពាក្យណាវសួរតឹងម៉ាត់ដែលអឺ កឹណាវតឹងវ័ម្ពែច់ៗណិងហឺយ”#ជំពូក ៩ ខ ២៧ តក់ ២៨ ពាក្យណិងកួឡឹងគម្ពីរ៍សញ្ញាតៀតេកជ្រមោះ អេសាយ ជំពូក ១០ ខ ២២ តក់ ២៣។ 29កឹចួសអេសាយណាវបឺនសួរដកទ័នប៉ាយ “បើព្រះមេកងទាប់កួអាទី ណាវម៉ឹដកស្មាហៃនឺច ហៃច្បាស់កឹម៉ាត់ស្មាយ៉ាំងបេកក្រុងសូដុម រ៉ើបេកក្រុងកូម៉ារ៉ាហឺយ”#ជំពូក ៩ ខ ២៩ ពាក្យណិងកួឡឹងគម្ពីរ៍សញ្ញាតៀតេកជ្រមោះ អេសាយ ជំពូក ១ ខ ៩ រ៉ើតេកជ្រមោះ លោកុប្បត្តិ ជំពូក ១៩ ខ ២៤ តក់ ២៥។។

ចួសប៉ុលសួររ៉ើរើងបេកអ៊ីស្រាអែលម៉ឹព្រ័មជើតំណិងរ័ក

30សែមសាយវ៉ឺយ សែមសាយគឹតមីចៀ សាសន៍ផ្សិងណាវម៉ឹបឺនខំវ័នីវ័ទោក់អនបឺនក្រៃរ៉ើព្រះដាយ ម៉ងកើតន្ទ័បឺនណាវបឺនក្រៃរ៉ើព្រះ? ណាវបឺនក្រៃរ៉ើព្រះ អាសារកឹណាវជើ 31កឹបេកអ៊ីស្រាអែលណាវខំវ័តូនច្បាប់ចួសម៉ូសេសួរច្នាប់ដែលអឺអនបឺនក្រៃរ៉ើព្រះ ម៉ងណាវម៉ឹបឺនក្រៃរ៉ើព្រះអឺ 32ណា កើតន្ទ័បឺនយ៉ាំងអិង? ចូវរ៉ើណាវពឹងរបៀបវ័តូនច្បាប់សួរ ណាវម៉ឹពឹងរបៀបជើ បេកអិងណាវលាក់អាសារកឹក្ទូសត្មាវអាវ័អនកួយក្ទូសលាក់ 33កឹរើងអិង កើតសសេរដកឡឹងគម្ពីរ៍ដែលអឺ តេកសសេរប៉ាយ “កឺអែលត្មាវមូយចៀដកតេកក្រុងស៊ីយ៉ូន#ជំពូក ៩ ខ ៣៣ ពាក្យក្រុងស៊ីយ៉ូនណិង ស្អៀប៉ាយទីក្រុងយេរូសាឡឹម។ ត្មាវអិងវ័អនកួយក្ទូសលាក់ រ៉ើវ័អនកួយប៉បាក បើកួយនាជើត្មាវអិង កួយអិងម៉ឹស្ដាយក្រោយអឺ”#ជំពូក ៩ ខ ៣៣ ពាក្យណិងកួឡឹងគម្ពីរ៍សញ្ញាតៀតេកជ្រមោះ អេសាយ ជំពូក ៨ ខ ១៤ រ៉ើជំពូក ២៨ ខ ១៦។។

Currently Selected:

រ៉ូម 9: KNT

Highlight

Copy

Compare