កិច្ចការ 23

1ប៉ុលណាវសម្លឹងចៀបេកពឺត កឹណាវជ្មុងប៉ាយ៖ «សែមសាយវ៉ឺយ កឺដិងប៉ាយ រើងកឺវ័តេកព្នេកព្រះពឺតតាំងរ៉ើត្កតក់ត្ងៃណិង សឹតកឹលោះរ៉ើចិត្តស្អៀអនក្រៃរ៉ើព្រះ» 2កឹចួសចារ្យពឺតជ្រមោះ អាណានាស ណាវប៉ញ្ជាបេកត្យឹងបៀតប៉ុលអនទះត្នោសប៉ុល 3កឹប៉ុលណាវជ្មុងរ៉ើចួសចារ្យពឺតប៉ាយ៖ «ផ្នាំងលាបប៉ឿប្លាយវ៉ឺយ ព្រះពឺតច្បាស់កឹតឹមម៉ៃ ម៉ៃត្កូវប៉ឺរលោសក្រៃអនកឺចូវរ៉ើម៉ៃតួងកឺវ័លោសរ៉ើច្បាប់ ម៉ងកើតន្ទ័បឺនម៉ៃប៉ញ្ជាអនកួយទះកឺ លោសរ៉ើច្បាប់យ៉ាំងណិង?» 4កឹបេកត្យឹងបៀតប៉ុលណាវជ្មុងប៉ាយ៖ «កើតន្ទ័បឺនម៉ៃហានប៉ាយអនចួសចារ្យពឺត បេកប៉ម្រើព្រះពឺត យ៉ាំងណិង?» 5ប៉ុលឆ្លើយប៉ាយ៖ «សែមសាយវ៉ឺយ កឺម៉ឹដិងប៉ាយណាវចួសចារ្យពឺតអឺ ចូវរ៉ើឡឹងគម្ពីរ៍កើតសសេរដកប៉ាយ “ម័ងម៉ឹក្រៃជ្មុងប្រោរ៉ើបេកក្ដាប់បេកស្រុកអែងអឺ”#ជំពូក ២៣ ខ ៥ ពាក្យណិងកួឡឹងគម្ពីរ៍សញ្ញាតៀតេកជ្រមោះ និក្ខមនំ ជំពូក ២២ ខ ២៨។»។

6ពេលប៉ុលដិងប៉ាយ តេកបនប៉្រជុំកើតបេកសាឌូស៊ីនឺច កើតបេកផារិស៊ីនឺច កឹណាវជ្មុងសង់ៗប៉ាយ៖ «សែមសាយវ៉ឺយ កឺបេកផារិស៊ី កឹអូវកឺណាវបេកផារិស៊ីដែល កួយណាវអនកឺត្យឹងតេកណិង អាសារកឹរើងសង្ឃឹមប៉ាយ កួយក្ចែតត្មង់ចៀក្រោយ» 7ពេលប៉ុលជ្មុងយ៉ាំងអិងរោច កឹបេកផារិស៊ី រ៉ើបេកសាឌូស៊ី ណាវត្រវាងឃ្នា វ័អនម៉ឹជាងប៉្រជុំទ័ន 8កឹបេកសាឌូស៊ីណាវម៉ឹជើប៉ាយ កួយក្ចែតបឺនត្មង់ចៀក្រោយ រ៉ើម៉ឹជើប៉ាយ កើតទេវតា កើតវិញ្ញាណន្ទ័អឺ ម៉ងបេកផារិស៊ីណាវជើប៉ាយ កើតយ៉ាំងអិងមេន 9កឹកួយណាវនាំឃ្នាច្រេកក្រេវខ្ញារ់ កឹកើតគ្រូខាងច្បាប់គម្ពីរ៍ព្រះពឺតនឺច ណាវបេកផារិស៊ី ណាវយូរត្យឹងប៉្រកែកសង់ៗប៉ាយ៖ «ហៃម៉ឹពើកកួយនីកើតលោសន្ទ័អឺ ម៉ងទ្រង់ប៉ាយ កើតវិញ្ញាណ រ៉ើទេវតាវ៉ាក ជ្មុងរ៉ើណាវ»។

10ពេលកួយត្រវ៉ាងឃ្នាច្នាប់ចៀច្នាប់ មេពឺតណាវប៉ញ្ជាកនតេហៀនណាវអនសែងចូវអែលប៉ុលលោះរ៉ើបនកួយក្លឹង បឺនកឹណាវនាំចៀឡឹងមន្ទីរ៍ ចូវរ៉ើណាវតួងកួយទេងប៉ុលរហែករហាត់ 11កឹត្ប៊ឺអិង ព្រះចូវត្យឹងបៀតប៉ុល ជ្មុងប៉ាយ៖ «ម៉ៃហានចៀ ម៉ៃក្រៃសួរកួយរ៉ើរើងកឺតេកទីក្រុងរ៉ូម យ៉ាំងម៉ៃសួរកួយតេកទីក្រុងយេរូសាឡឹមដែល»។

ចួសលូកាសួររ៉ើរើងបេកយូដាស្អៀកម្ចែតចួសប៉ុល

12ពោះច្លះសោះ កើតបេកយូដានឺច ណាវនាំឃ្នាស្បថប៉ាយ ណាវម៉ឹចា ណាវម៉ឹង័ចអឺ ទាល់កឹកម្ចែតប៉ុលបឺន 13បេកស្អៀកម្ចែតប៉ុល ទ្រង់ប៉ាយសែសិបណាក់លើស 14កឹបេកអិងណាវនាំឃ្នាចៀជួបរ៉ើមេៗចួសចារ្យ រ៉ើក្រេងទុំ កឹណាវសួរប៉ាយ៖ «ហៃនាំឃ្នាស្បថប៉ាយ ហៃម៉ឹចា ម៉ឹង័ចអឺ ទាល់កឹកម្ចែតប៉ុលបឺន 15ម័ងរ៉ើបេកពឺត ប៉្រើកួយអនចៀប៉កទារមេពឺតអននាំប៉ុលចូវជួបម័ងចៀ កឹម័ងវ័តាងប៉ាយ ស្អៀដិងរើងចួសប៉ុលអនច្បាស់ចៀច្បាស់ទ័ន កឹហៃត្រៀមចាក់ហឺយ ចាំកម្ចែតប៉ុល ញោងណាវចូវបៀតម័ង»។

16ពេលក្មនប៉ុលដិងល្បិចបេកអិង ណាវចៀមន្ទីរ៍តេហៀន ចៀប៉កសួរប៉ុល 17កឹប៉ុលណាវក្យាមេតេហៀនមូយណាក់អនចូវ បឺនកឹណាវសួរប៉ាយ៖ «នាំកន្ទ្រូសនីចៀប៉កជួបរ៉ើមេពឺតម៉ៃចៀ ណាវកើតរើងស្អៀសួរមេពឺតម៉ៃ» 18កឹមេតេហៀនអិង ណាវនាំកន្ទ្រូសអិងចៀប៉កជួបរ៉ើមេពឺតណាវ កឹណាវសួរប៉ាយ៖ «បេកទោសជ្រមោះប៉ុល ណាវក្យាកឺអននាំកន្ទ្រូសណិងចូវជួបម៉ៃ ណាវកើតរើងនឺចស្អៀសួរម៉ៃ» 19កឹមេពឺតអិងណាវតឹកតីកន្ទ្រូសអិងចៀឆ្ងាយរ៉ើកួយង្គិត ណាវមោះប៉ាយ៖ «ណា ម៉ៃកើតរើងន្ទ័នឺចស្អៀសួរកឺ?» 20កន្ទ្រូសអិងសួរប៉ាយ៖ «ច្លះបេកយូដាណាវតឹងចូវទារម៉ៃអននាំប៉ុលចៀជួបរ៉ើបេកពឺត ណាវវ័តាងប៉ាយ ស្អៀដិងរើងប៉ុលអនច្បាស់ចៀច្បាស់ទ័ន 21ម៉ងម៉ៃញ្ជ័ក់ជើបេកអិងដឺ ច្បោះកើតឃ្នាណាវសែសិបណាក់លើសកួចាំកម្ចែតប៉ុល បេកអិងណាវស្បថប៉ាយ ណាវម៉ឹចា ម៉ឹង័ចអឺ ទាល់កឹកម្ចែតប៉ុលបឺនសិន រ៉ើណិងណាវត្រៀមចាក់ហឺយ កួចាំកឹម៉ៃអនណាវប៉ុលអឺ» 22កឹមេពឺតអិងណាវអនកន្ទ្រូសអិងចៀចៀក្រោយ ណាវសួរប៉ាយ «ម៉ៃញ្ជ័ក់សួរកួយនារ៉ើរើងម៉ៃចូវសួរកឺដឺ»។

ចួសលូកាសួររ៉ើរើងកួយអនចួសប៉ុលចៀបេកពឺតខាងរ៉ូម៉ាំងជ្រមោះភេលីច

23លោះរ៉ើអិង មេពឺតណាវក្យាមេតេហៀនបារណាក់ កឹណាវសួរប៉ាយ៖ «ម័ងរេបតេហៀនអនចៀក្រុងសេសារាចៀ អនប៉កបាររ័យណាក់ អនជិះសេះចិតសិបណាក់ អនកាន់លំពែងបាររ័យណាក់ អនទាន់ម៉ោងត្គេសត្ប៊ឺណិង 24កឹរេបសេះអនប៉ុលជិះឡង់ នាំណាវចៀជួបរ៉ើបេកពឺតជ្រមោះភេលីចអនបឺនអអ្ចម»។

25មេពឺតអិងណាវសសេរសំបុត្រមូយប៉ាយ៖ 26«កឺជ្រមោះក្លូឌាសលូស៊ា សសេរអនលោកពឺតជ្រមោះ ភេលីច កឺស្អៀអនម៉ៃដិងប៉ាយ 27កួយណិង បេកយូដាកបប៉្រុងតឹងកម្ចែតច្ពស់ កឹកឺនាំកនតេហៀនចៀប៉កជោយកួយណិង ចូវរ៉ើកឺបឺនដិងប៉ាយ ណាវបេករ៉ូម៉ាំង 28កឺស្អៀដិងប៉ាយ បេកអិងកើតរើងន្ទ័បឺនណាវច្លក់រ៉ើកួយណិង កឹកឺនាំកួយណិងចៀប៉កជួបរ៉ើបេកពឺតបេកអិង 29កឹកឺពើកប៉ាយ បេកអិងច្លក់រ៉ើកួយណិងរ៉ើរើងច្បាប់ឡឹងគម្ពីរ៍ណាវ ម៉ងកួយណិងម៉ឹបឺនវ័ន្ទ័ អ្ចោះក្រៃកម្ចែត រ៉ើក្រៃដាក់គុកអឺ 30លោះរ៉ើអិង កើតកួយសួរកឺប៉ាយ បេកយូដានាំឃ្នាប៉្រុងកម្ចែតកួយណិង យ៉ាំងអិងហឹយ បឺនកឺអនណាវចៀម៉ៃម្ពែច់ កឹកឺសួរបេកអិង អនណាវចៀសួរម៉ៃរ៉ើរើងកួយណិងអនម៉ៃដិង»។

31តេហៀនណាវនាំប៉ុលចៀក្រុងអាន់ទីប៉ាទ្រីសតឹងស្ដាវ តូនមេណាវប៉ញ្ជា 32ពោះច្លះសោះ តេហៀនលឹមប៉កណាវនាំឃ្នាចូវមន្ទីរ៍ចៀក្រោយ កឹណាវអនតេហៀនខាងជិះសេះចៀរ៉ើប៉ុល 33ពេលណាវចៀតក់ក្រុងសេសារា ណាវអែលសំបុត្រចៀប៉កអនបេកពឺត បឺនកឹណាវអែលប៉ុលចៀអនចួសអិងឡង់ 34ពេលបេកពឺតអិងណាវអានសំបុត្រចប់ ណាវមោះប៉ុលប៉ាយ៖ «ម៉ៃចូវរ៉ើខែតនា?» កឹពេលណាវដិងប៉ាយ ប៉ុលចូវរ៉ើខែតគីលីគា 35កឹណាវជ្មុងប៉ាយ៖ «ចាំបេកច្លក់រ៉ើម៉ៃចូវតក់សិន បឺនកឺច្ងាត់រើងម៉ៃតឹងម៉ាត់» លោះរ៉ើអិង ណាវប៉ញ្ជាអនកួយខាំងប៉ុលដកឡឹងដុងលឹមស្ដាច់ហេរ៉ូឌចោះរ៉ើដើម។

Currently Selected:

កិច្ចការ 23: KNT

Highlight

Copy

Compare