Roma 7

Mènkristô tum kuan bu ntshù'

1Fèt tshàm, bin ke' lèn ndù (me tshob à ben tse bo ke' lèn ntshù' là) ntshù' num ntô mèn num njoṅ ngelaṅ fa z'a tshwèt njôg là ké? 2Nummbe ntshù' lat mènnzwi nandà num ndu i ngelaṅ a ke' ntùn nà, là, a be ze ndu i kwù là, mba ntshù' nandà keb num i. 3Ndùlala, a be z'a ghù mo' mandum ngelaṅ ndu i ke' ntùn nà, mba bo a' tsiaṅ i ndù mènnzwi màndà. Là, a be ze ndu i kwù là, mb'a tum bu ntshù', nku'ni neghù mo' mandum, bo ke bèn ntsiaṅ i mènnzwi màndà. 4Fèt tshàm ndùlala mba bin, bo lo ghù bin kwù mbwe ntshù' njam wut Kristô, ndùlala ndù bin ghù mo' mèn, yen nà z'a lo num vù là, mba ndù bin yam ntàm num Nsi. 5Nummbe ngelaṅ ze bag à bin be ben mbàb wut là, ghe'te nukebwô ts'a fe ntshù' là lo ke mfa' num nkam wut be, ndù bag à bin yam ntàm num vù. 6Là, ndonni nkù ntshù' keb num be, ngelaṅ ze bag à bin kwù, mfagte bag à bin ju z'a ke ntaṅ be là, ndùlala ndù bag à bin fa' ntùm yôg nswe s'a fe Ywèt là, ke bèn mb'a ntùm njwèn yôg miag ṅwa'ni.

Ntshù' mba nukebwô

7Ndùlala #Netu. 20.17; Neb. 5.21be nsi tshob à ndùke? Ntshù' b'a nukebwô ké? Nga, a ke b'a ndùlala. Là ntshù' bèn ngù kà me ndèn nukebwô; nummbe ntshù' na' mbe ke tshob ndù: Kà ghe'te, mba me ke' lèn ghe'te. 8Là, nukebwô lo lo' ntshù' mba ze dù' neyi'te bwe là, njam ghe'te nzenze ntùm ntù àm, nummbe ntshù' be ke be, mba nukebwô b'a fe i. 9Me lo ke njôg tà ngelaṅ mbwe, ngelaṅ ze ntshù' be ke be là, là, ngelaṅ ntshù' se' là, nukebwô bèn ngù yôg, tu wul àm me kwù. 10Me lo yen ndù ntshù' mi a b'a mi yôg là, lo tù' mi vù num àm. 11Nummbe #Net. 3.13nukebwô lo lo' ntshù' mba ze dù' neyi'te bwe là, mfùt'àm, mbèn ntshùa njam i, nzwi àm. 12Là, ntshù' b'a nelàne, ntshù' làn, ntsine, mbwô.

Nebot mènntùn mbwe ntshù'

13Num nela'te wul i mba nukebwô là, nukebwô tshùa num ju mebwô, mfà vù me, ndùlala ndù nukebwô z'a tshùa là, tù' nukebwô z'a bag ntshùate là. 14Nummbe, bag à bin lèn ndù ntshù' b'a Ywèle, là tu wul àm be mèn mbàb wut, ndù bo swèn àm bu nukebwô. 15Ndùlala, #Gal. 5.17me ke' lèn ju ze me tshwèt ngù là; ju ze me num nkô là ke' b'a ju ze me num ngù là, ju ze me num mbàn i là, a b'a yi ze me ke ngù là. 16Là, a be ze me num ngù ju ze me ke' kô là, mba me lèn ndù ntshù' bwô. 17Là, ndonni, a ke' bèn mb'a me bèn nke ngù yen nà, là, a b'a nukebwô z'a be ntswe num àm nà. 18Nummbe me lèn ndù numebwô ke' be tswe num àm (yen nà b'a ndù ntùm mbàb wul àm). Nekô neghù numebwô num num àm, là neghù a bumte ke' be me. 19Nummbe me ke' be ghù numebwô ze me num nkô là; me ke ngù à nukebwô ze me ke' kô là. 20Là, a be ze me num ngù ju ze me ke' kô là, mb'a ke' bèn mb'a me bèn nke ngù yen nà, là, a b'a nukebwô z'a be ntswe num àm nà.

21Ndùlala me yen men ntshù' li num àm ndù: Nukebwô num num àm, ngelaṅ me kô neghù numebwô là. 22Nummbe me num ntsiaṅte num ntshù' Nsi, kua' ntùm ntù àm, 23là, ntùm nkam wut màm, me yen mo' ntshù' z'a tshwèt ma' ntsho bo ntshù' zenu àm, ngù me tù' ngandàtsha bu ntshù' nukebwô z'a be ntùm nkam wut màm nà, 24njennge' mènntùn mba me là! We z'a nsi kwé àm bu yen wut vù li à? 25Ghamte be Nsi njam Yésu Kristô Tshùaben be. Ndùlala, mba tu wul àm be là, me num ntshùa num zenu mfa' ntshù' Nsi, me num ntshùa num mbàb wut mfa' nukebwô.

Currently Selected:

Roma 7: BMa

Highlight

Copy