Roma 5

Ntàm nunetsin njam bamntù

1Ndùlala, mba be na' ntù' ben netsin à njam bamntù là, be ghù fite bag à bin Nsi ntshùa njam Tshùaben be Yésu Kristô. 2Njam bamntù be, a lo ghù be tsho ntùm yen kondèn nà ze be be ntsin bwe là; bag à bin num nta' nsoṅ ntùm nenywinte nkuni Nsi. 3Ke b'a nda' ndùlala, là bag à bin num nta' nsoṅ mba ntùm neyen nge', ndèn ndù nge' num njam nefènte, 4nefènte yam tshùb ntù ntùm laṅte, netshùb ntù ntùm laṅte yam nenywinte. 5Nenywinte ke' be fà tuswe, nummbe Nsi naṅ nkôni i ntùm ntù be njam Ywèt Nelàn z'a fà be là.

6Nummbe, ngelaṅ ze be na' nke' ben nebot là, Kristô lo kwù num ngelaṅ i num ghawag Nsi. 7Neyen mèn z'a be a kwù num mèn netsin nà ta, mo' ndù be mèn fènte nekwù num numebwô, 8là Nsi num nda'te kua' nkôni i be: Ngelaṅ ze be na' nke' à ben kebwô là, Kristô lo kwù num be. 9Ndùlala, ndonni mba be na' ntù' ben netsin njam lem tse là, be lèn kua' mebwô ndù be nsi tshùa njam i yôg num yantù Nsi. 10A be ze bag à bin Nsi na' ntamte ntshùa njam vù Mén i, be tse be na' mb'a ghakeban tse là, ndonni ze bag à bin bo tamte là, be lèn kua' mebwô ndù be nsi yôg njam yôg se.

11Ke b'a nda' ndùlala, bag à bin num nta' nsoṅ num Nsi ntshùa njam Tshùaben be Yésu Kristô z'a fà netamte be fe ndonni là.

Adam mba Yésu Kristô

12A #Net. 3.6ndùlala, be ndaṅndaṅ nukebwô lo tshùa njam ta' mèn ntsho ntùm njù, vù tshùa njam nukebwô, là vù lo se' nsa num njoṅ benntùn fa, nummbe njoṅ yub fa lo ghù nukebwô. 13Nummbe nukebwô lo be ntùm njù kà ntshù' nse'e, là bo ke siaṅte nukebwô nummbe ntshù' ke' be. 14Là, vù lo tô njù fe num Adam tà nèn nkum num Mosé, a lo tô mba ben tse bo ke' ghù nukebwô z'a fute mfànnu Adam z'a b'a netshaṅ mèn z'a nsi se' là.

15Là ju ze kondèn be ngù là ke' b'a mba ze mfànnu be ngù là; nummbe a be ze mfànnu ta' mèn ghù benntùn yàm kwù là, be lèn kua' mebwô ndù kondèn Nsi mba nda' ntùm kondèn ta' mèn, Yésu Kristô, lo dun ntshùate, mfètte num benntùn yàme. 16Be ndaṅndaṅ, ju ze numebwô Nsi be ngù là ke b'a mba ze nukebwô ta' mèn be ngù là; nummbe netsho'te ntsha z'a se' njam ta' nukebwô là, lo se' nevù ntsha; là kondèn Nsi z'a se' njam nukebwô yàm nà, lo se' nejù ntsha. 17A be ze mfànnu ta' mèn ghù vù tô njù ntshùa njam yen ta' mèn nà là, be lèn kua' mebwô ndù ben tse bo kwé kondèn Nsi mba nunetsin ts'a dun mfètte là, nsi tô njù ntùm yôg ntshùa njam ta' mèn, Yésu Kristô. 18Ndùlala, mba mfànnu ta' mèn ghù nevù ntsha se' num njoṅ benntùn fa là, be ndaṅndaṅ nunetsin ta' mèn ghù nunetsin z'a be mfà yôg là se' num njoṅ benntùn fa. 19Mba ta' mèn z'a ke' ju' ntshu ghù benntùn yàm tù' ghaghù nukebwô là, be ndaṅndaṅ ta' mèn z'a ju' ntshu là ghù benntùn yàm tù' ben netsine. 20Là ntshù' lo tsho bwe, ndùlala ndù mfànnu yàme; là dù' ze nukebwô yàm bwe là, kondèn dun ntshùate, 21ndùlala ndù mba nukebwô na' ntô njù ntùm vù là, be ndaṅndaṅ mba kondèn nsi tô njù njam nunetsin num yôg matmat, ntshùa njam Yésu Kristô, Tshùaben be.

Currently Selected:

Roma 5: BMa

Highlight

Copy